കാസർകോട്ട് ദേവി ക്ഷേത്രത്തിൽ കവർച്ച; പണവും ഉപകരണങ്ങളും കാണാതായി

കാസർകോട്: (KasargodVartha) പുലിക്കുന്നിലെ ജഗദംബ ദേവി ക്ഷേത്രത്തിൽ കവർച്ച നടന്നതായി ക്ഷേത്ര ഭരണ സമിതി ജനറൽ സെക്രട്ടറി സുജിത് കുമാർ കസബ പോലീസിൽ പരാതി നൽകി. ഞായറാഴ്ച (19.10.2025) രാത്രിയോടെയാണ് കവർച്ച നടന്നതെന്നാണ് അധികൃതരുടെ പ്രാഥമിക നിഗമനം. ക്ഷേത്രത്തിലെ സേവാ കൗണ്ടറും ക്ഷേത്ര കമ്മിറ്റി ഓഫീസ് മുറിയും സ്റ്റോർ റൂമും ഉൾപ്പെടെ നിരവധി സ്ഥലങ്ങളിലെ പൂട്ടുകൾ തകർത്ത നിലയിലാണ് കണ്ടെത്തിയതെന്നാണ് പരാതിയിൽ പറയുന്നത്.

സേവാ കൗണ്ടറിൽ ഉണ്ടായിരുന്ന 1000 രൂപ കവർന്നതായി ക്ഷേത്ര അധികൃതർ പോലീസിനെ അറിയിച്ചു. കൂടാതെ, ക്ഷേത്രത്തിൽ സ്ഥാപിച്ചിരുന്ന സിസിടിവി സംവിധാനത്തിൻ്റെ ഹാർഡ് ഡിസ്‌ക് റിസീവർ മോഷ്ടാക്കൾ അഴിച്ചെടുത്ത് കൊണ്ടുപോയിരുന്നു. എന്നാൽ, പിന്നീട് ഇവ ക്ഷേത്ര വളപ്പിലെ കിണറിനുള്ളിൽ ഉപേക്ഷിച്ച നിലയിൽ കണ്ടെത്തിയതായി അധികൃതർ പറഞ്ഞു.

മോഷ്ടാക്കൾ ക്ഷേത്രത്തിലെ സൗണ്ട് സിസ്റ്റത്തിൻ്റെ ആംപ്ലിഫയറും അപഹരിച്ചെങ്കിലും, അത് ക്ഷേത്രത്തിനു പുറത്ത് ഉപേക്ഷിച്ച നിലയിൽ കണ്ടെത്താൻ സാധിച്ചതായി പരാതിയിൽ പറയുന്നു. സ്റ്റോർ റൂമിന്റെയും മറ്റ് മുറികളുടെയും പൂട്ടുകൾ തകർത്ത നിലയിലാണ്. പരാതിയുടെ അടിസ്ഥാനത്തിൽ കസബ പോലീസ് കേസെടുത്ത് അന്വേഷണം ആരംഭിച്ചു.

അതേസമയം, ശനിയാഴ്ച  (18.10.2025) രാത്രി തന്നെ കാസർകോട് കെ എസ് ആർ ടി സി ഡിപ്പോക്ക് സമീപമുള്ള നാഗക്കട്ടയുടെ ഭണ്ഡാരം പൊളിക്കാൻ ശ്രമം നടന്നതായി പോലീസിന് വിവരം ലഭിച്ചിട്ടുണ്ട്. എന്നാൽ, അവിടെ നിന്നും ഒന്നും കാണാതായിട്ടില്ലാത്തതിനാൽ പരാതി നൽകിയിട്ടില്ലെന്ന് കമ്മറ്റി ഭാരവാഹികൾ പോലീസിനോട് വ്യക്തമാക്കി. ക്ഷേത്ര കവർച്ചക്ക് പിന്നിൽ ഈ സംഘം തന്നെയാണോ എന്നും പോലീസ് അന്വേഷിക്കുന്നുണ്ട്.

ക്ഷേത്രങ്ങളിലെ സുരക്ഷ വർദ്ധിപ്പിക്കുന്നതിനെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Burglary at Jagadamba Devi Temple Kasargod; Cash and CCTV disk stolen.

#Kasargod #TempleTheft #JagadambaDeviTemple #CrimeNews #CCTVHardDisk #PoliceInvestigation