പുലർച്ചെ വെടിയൊച്ച; കാസർകോട് വൊർക്കാടിയിൽ വീട്ടിൽ ഭീകരാന്തരീക്ഷം!

കാസർകോട്: (KasargodVartha) മഞ്ചേശ്വരം പോലീസ് സ്റ്റേഷൻ പരിധിയിലെ വൊർക്കാടിയിൽ, ബേക്കറി ജംഗ്ഷന് സമീപം താമസിക്കുന്ന ഒരു വർക്ക് ഷോപ്പ് ജീവനക്കാരന്റെ വീടിന് നേരെ വെടിവെപ്പുണ്ടായി. വ്യാഴാഴ്ച പുലർച്ചെ 2:30-ഓടെയാണ് സംഭവം. 

വീട്ടിൽ ഉറങ്ങിക്കിടന്നിരുന്ന കുടുംബം തലനാരിഴയ്ക്കാണ് വലിയ ദുരന്തത്തിൽ നിന്ന് രക്ഷപ്പെട്ടത്. മൃഗവേട്ടക്കാരാണ് വെടിവെപ്പിന് പിന്നിലെതെന്ന സംശയത്തിൽ പോലീസ് അന്വേഷണം ഊർജ്ജിതമാക്കിയിട്ടുണ്ട്.

വൊർക്കാടി നല്ലങ്കിപ്പദവിലെ പുഷ്പക നിവാസിൽ ബി.എം. ഹരീഷിന്റെ വീടിന് നേരെയാണ് വെടിവെപ്പുണ്ടായത്. വെടിവെപ്പ് നടന്ന സമയത്ത് ഹരീഷും ഭാര്യ ശശികലയും ഇളയ മകൻ ഗീതേഷും കോൺക്രീറ്റ് വീടിന്റെ ഒരു മുറിയിലും, മൂത്തമകൻ നിതീഷ് മറ്റൊരു മുറിയിലുമായിരുന്നു ഉറങ്ങിയിരുന്നത്. വെടിയൊച്ചയും ജനൽ ഗ്ലാസ് തകർന്നു വീഴുന്നതിന്റെ ഉഗ്രശബ്ദവും കേട്ടാണ് വീട്ടുകാർ ഞെട്ടിയുണർന്നത്. 

പെട്ടെന്ന് ലൈറ്റ് ഇട്ട് നോക്കിയപ്പോൾ ഒരു കാറും സ്കൂട്ടറും സ്റ്റാർട്ട് ചെയ്ത് പോകുന്നത് കണ്ടതായി ഹരീഷ് 'കാസർകോട് വാർത്തയോട്' പറഞ്ഞു. വിവരം ഉടൻതന്നെ മഞ്ചേശ്വരം പോലീസിനെ അറിയിച്ചതിനെ തുടർന്ന് പോലീസ് പുലർച്ചെ തന്നെ സ്ഥലത്തെത്തി അന്വേഷണം ആരംഭിച്ചു. ഫോറൻസിക് വിദഗ്ദ്ധരും സംഭവസ്ഥലത്ത് എത്തിയിട്ടുണ്ട്.

വീടിന്റെ പിൻഭാഗത്ത് നിന്നാണ് വെടിവെപ്പുണ്ടായത്. ഏകദേശം 40 മീറ്റർ അകലെ നിന്നാണ് വെടിവെപ്പ് നടന്നതെന്നാണ് പ്രാഥമിക നിഗമനം. ജനലിലൂടെ തുളച്ചുകയറിയ വെടിയുണ്ടയുടെ അവശിഷ്ടങ്ങളും വീടിനകത്തുനിന്ന് കണ്ടെടുത്തു. ഇരട്ടക്കുഴൽ തോക്കാണ് ഇതിനായി ഉപയോഗിച്ചതെന്നും സംശയിക്കുന്നു. 

ഈ ഭാഗത്ത് മൃഗവേട്ട പതിവാണെന്നും, പന്നിയെ വെടിവെച്ചപ്പോൾ ലക്ഷ്യം തെറ്റി വെടിയുണ്ട വീടിന് കൊണ്ടതാകാമെന്നുമാണ് പോലീസ് കരുതുന്നത്. തനിക്ക് ആരും ശത്രുക്കളില്ലെന്നും, അതുകൊണ്ട് തന്നെ തങ്ങളെ ആക്രമിക്കുക എന്നതായിരുന്നില്ല വെടിവെച്ചവരുടെ ഉദ്ദേശമെന്നും ഹരീഷ് വ്യക്തമാക്കി. 

സമീപത്തെ സി.സി.ടി.വി. ദൃശ്യങ്ങൾ കേന്ദ്രീകരിച്ചാണ് പോലീസ് ഇപ്പോൾ അന്വേഷണം നടത്തുന്നത്. ബാലസ്റ്റിക് വിദഗ്ദ്ധരും സ്ഥലത്തെത്തുമെന്നാണ് പ്രതീക്ഷിക്കുന്നത്. ഈ ഭാഗത്ത് പന്നികളെ വെടിവെക്കാൻ ആളുകൾ എത്താറുണ്ടെന്നാണ് പോലീസ് നൽകുന്ന സൂചന.

ഇത്തരം സംഭവങ്ങൾ ആവർത്തിക്കാതിരിക്കാൻ എന്ത് സുരക്ഷാ നടപടികളാണ് സ്വീകരിക്കേണ്ടത്? നിങ്ങളുടെ അഭിപ്രായം പങ്കുവെക്കുക.

Article Summary: House in Kasaragod's Vorkady attacked with gunfire; police suspect animal poachers.

#Kasaragod #Gunfire #Vorkady #CrimeNews #AnimalPoaching #PoliceInvestigation