പൊലീസ് സ്റ്റേഷനിൽ ബഹളം വെച്ച ഉമ്മയെയും മകളെയും മർദിച്ചെന്ന് പരാതി; ടൗൺ എസ്ഐക്ക് സസ്പെൻഷൻ ​​​​​​​

കാസർകോട്: (KasargodVartha) തട്ടിക്കൊണ്ടുപോകൽ കേസിൽ അറസ്റ്റിലായ പ്രതികളെ കാണാൻ കാസർകോട് ടൗൺ പൊലീസ് സ്റ്റേഷനിലെത്തിയ ഉമ്മയ്ക്കും മകൾക്കും നേരെ അപമര്യാദയായി പെരുമാറുകയും മർദിക്കുകയും ചെയ്തെന്ന പരാതിയിൽ എസ്ഐക്ക് സസ്പെൻഷൻ. 

ടൗൺ എസ്ഐ എം ടി പി സെയ്ഫുദ്ദീനെയാണ് അന്വേഷണവിധേയമായി സസ്പെൻഡ് ചെയ്തത്. കണ്ണൂർ ഡിഐജി കെ കാർത്തിക്ക് ആണ് നടപടി സ്വീകരിച്ചത്. പൊലീസ് സ്റ്റേഷനിൽ പരാതിക്കാരോടും സ്ത്രീകളോടും ഉദ്യോഗസ്ഥർ മാന്യമായി പെരുമാറണമെന്ന നിർദേശങ്ങൾ നിലനിൽക്കെയാണ് സംഭവം വിവാദമായിരിക്കുന്നത്.

പ്രകോപനമായത് ഫോണിൽ പകർത്തിയത്

യുവാവിനെ തട്ടിക്കൊണ്ടുപോയ കേസിലെ രണ്ട് പ്രതികളിൽ ഒരാളെ കാണാനെത്തിയതായിരുന്നു ഉമ്മയും മകളും. ഇവരെ വിട്ടയക്കണമെന്ന് പറഞ്ഞ് സ്റ്റേഷനിൽ ഉച്ചത്തിൽ സംസാരിക്കുകയും പുറത്തുപോകാൻ ആവശ്യപ്പെട്ടതിനെ തുടർന്ന് വാക്കുതർക്കമുണ്ടാവുകയുമായിരുന്നു. 

തുടർന്ന് വനിതാ പൊലീസിൻ്റെ സഹായത്തോടെ ഇരുവരെയും സ്റ്റേഷനിൽ നിന്ന് പുറത്തേക്ക് കൊണ്ടുപോകുന്നതിനിടെ, യുവതി സംഭവങ്ങൾ മൊബൈൽ ഫോണിൽ പകർത്താൻ ശ്രമിച്ചു. ഈ ദൃശ്യങ്ങൾ പകർത്താനുള്ള ശ്രമമാണ് എസ്ഐയെ പ്രകോപിപ്പിച്ചതെന്നാണ് പ്രാഥമിക വിവരം.

ഇതിനിടെ മറ്റൊരു ഡ്യൂട്ടി കഴിഞ്ഞ് വിശ്രമത്തിലായിരുന്ന എസ്ഐ സെയ്ഫുദ്ദീൻ ഇടപെട്ട് മൊബൈൽ ഫോൺ തട്ടിയെറിപ്പിച്ചതായും ഇവർക്ക് നേരെ അപമര്യാദയായി പെരുമാറിയെന്നുമാണ് പരാതി. ഇതിനിടയിലാണ് ഉമ്മയ്ക്കും മകൾക്കും മർദനമേറ്റെന്ന ആരോപണവും ഉയർന്നത്.

സിസിടിവി പരിശോധിച്ച് നടപടി

പരാതി ഉയർന്നതിനെ തുടർന്ന് ജില്ലാ പൊലീസ് മേധാവി നിധിൻ രാജ് ടൗൺ സ്റ്റേഷനിലെത്തി സിസിടിവി ദൃശ്യങ്ങൾ അടക്കം വിശദമായി പരിശോധിച്ചു. ഇതിന് ശേഷമാണ് ഡിഐജിക്ക് റിപ്പോർട്ട് നൽകിയത്. സംഭവത്തെക്കുറിച്ച് വിശദമായ അന്വേഷണം നടത്താൻ കാസർകോട് നർകോട്ടിക് സെൽ ഡിവൈഎസ്പിയെ അന്വേഷണ ഉദ്യോഗസ്ഥനായി നിയോഗിച്ചിട്ടുണ്ട്. 

അന്വേഷണ ഉദ്യോഗസ്ഥൻ ഏഴ് ദിവസത്തിനകം കരട് കുറ്റാരോപണ പത്രികയും രണ്ട് മാസത്തിനകം അന്വേഷണ റിപ്പോർട്ടും സമർപ്പിക്കണമെന്ന് ഉത്തരവിൽ നിർദേശിച്ചിട്ടുണ്ട്. അന്വേഷണ റിപ്പോർട്ടിൻ്റെ അടിസ്ഥാനത്തിലായിരിക്കും എസ്ഐക്കെതിരായ തുടർനടപടികൾ തീരുമാനിക്കുക.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Kasaragod Town SI M.T.P. Saifuddin was suspended by Kannur DIG K. Karthik for allegedly assaulting a mother and daughter visiting a kidnapping suspect at the police station. 

#KasargodVartha #KasaragodNews #KeralaPolice #PoliceSuspension #MalayalamNews #CrimeNews #KasaragodTownStation #AparnaNews