കാസർകോട് വിവിധയിടങ്ങളിലായി പുലർച്ചെ 3 വാഹനാപകടങ്ങൾ; നിരവധി പേർക്ക് പരിക്ക്, രക്ഷാപ്രവർത്തനവുമായി അഗ്നിരക്ഷാസേന

കാസർകോട്: (KasargodVartha) ജില്ലയിൽ ഞായറാഴ്ച (സെപ്റ്റംബർ 20) പുലർച്ചെ വിവിധയിടങ്ങളിലായി മൂന്ന് വാഹനാപകടങ്ങൾ നടന്നു. ബദിയടുക്ക കന്യപ്പാടിയിൽ രണ്ട് കാറുകൾ ലോറിയിൽ ഇടിച്ചും, നയന്മാർമൂലയിൽ നിയന്ത്രണംവിട്ട ഇന്നോവ കൈവരിയിൽ ഇടിച്ചും, ബോവിക്കാനം ടൗണിൽ കാറും ബൈക്കും കൂട്ടിയിടിച്ചുമാണ് അപകടങ്ങളുണ്ടായത്. വിവിധ അപകടങ്ങളിൽ പരിക്കേറ്റവരെ ആശുപത്രികളിൽ പ്രവേശിപ്പിച്ചു. കാസർകോട് അഗ്നിരക്ഷാസേനയുടെ നേതൃത്വത്തിൽ രക്ഷാപ്രവർത്തനങ്ങളും റോഡിലെ അപകടാവസ്ഥ ഒഴിവാക്കുന്നതിനുള്ള നടപടികളും നടത്തി.

ബദിയടുക്ക കന്യപ്പാടിയിലെ അപകടം

ബദിയടുക്ക പഞ്ചായത്ത് പരിധിയിലെ കന്യപ്പാടി ആശ്രമഭാഗം വളവിൽ ഞായറാഴ്ച (സെപ്റ്റംബർ 20) പുലർച്ചെ 1.45-ഓടെയാണ് ആദ്യ അപകടമുണ്ടായത്. അമിതവേഗത്തിൽ എതിർദിശയിൽ സഞ്ചരിച്ച രണ്ട് സ്വിഫ്റ്റ് കാറുകൾ എതിർദിശയിൽ വന്ന ലോറിയുടെ ഡീസൽ ടാങ്ക് ഭാഗത്ത് ഇടിക്കുകയായിരുന്നു. 

ഉപ്പള ഭാഗത്തുള്ള വാഹനങ്ങളാണ് അപകടത്തിൽപ്പെട്ടത്. കെ എ 21 സി 0338 ലോറി, കെ എൽ 14 എ ഇ 0915 സ്വിഫ്റ്റ് കാർ, കെ എൽ 14 എ ജെ 0035 സ്വിഫ്റ്റ് കാർ എന്നിവയാണ് ലോറിയുമായി കൂട്ടിയിടിച്ചത്. ലോറിയിൽ ജബ്ബാർ എന്നയാളും വെള്ള സ്വിഫ്റ്റിൽ അഫ്സൽ എന്നയാളും കറുത്ത സ്വിഫ്റ്റിൽ അജ്സൽ എന്നയാളും ഉണ്ടായിരുന്നതെന്നാണ് വിവരം. അപകടത്തിൽ പരിക്കേറ്റവരെ ആസ്റ്റർ മിംസ് ആശുപത്രിയിലേക്ക് മാറ്റി.

അപകടവിവരമറിഞ്ഞ് കാസർകോട് അഗ്നിരക്ഷാസേന സ്ഥലത്തെത്തി രക്ഷാപ്രവർത്തനം നടത്തി. സീനിയർ ഫയർ ആൻഡ് റെസ്ക്യൂ ഓഫിസർ സുകു വർഗീസിന്റെ നേതൃത്വത്തിൽ ഫയർ ആൻഡ് റെസ്ക്യൂ ഓഫിസർമാരായ കെ വി ജിതിൻ കൃഷ്ണൻ, അതുൽ രവി, സി കെ അഭിനന്ദ്, എൻ പി രാകേഷ്, ഒ കെ പ്രജിത്ത് എന്നിവർ രക്ഷാപ്രവർത്തനത്തിൽ പങ്കെടുത്തു. 

ഇടിയുടെ ആഘാതത്തിൽ വാഹനങ്ങൾ പരസ്പരം ഇടിച്ചുകോർത്ത് കിടന്നതിനാൽ അഗ്നിരക്ഷാസേനയുടെ വാഹനത്തിലെ വിഞ്ച് ഉപയോഗിച്ച് വാഹനങ്ങൾ വശങ്ങളിലേക്ക് മാറ്റിയാണ് ഗതാഗത തടസ്സം ഒഴിവാക്കിയത്. അപകടത്തിൽ ലോറിയുടെ ഡീസൽ ടാങ്കും ഓയിൽ ടാങ്കും തകർന്നതിനെ തുടർന്ന് ഡീസലും ഓയിലും റോഡിൽ വ്യാപിച്ചിരുന്നു. ഇത് റോഡിൽ വലിയ വഴുക്കൽ സൃഷ്ടിച്ചിരുന്നു. സേനാംഗങ്ങൾ റോഡിലെ ഇന്ധനവും എണ്ണയും നീക്കം ചെയ്ത് അപകടസാധ്യത ഒഴിവാക്കിയ ശേഷമാണ് ഗതാഗതം പുനഃസ്ഥാപിച്ചത്.

നയന്മാർമൂലയിലെ അപകടം

ദേശീയപാത 66-ൽ നയന്മാർമൂലയിൽ ഞായറാഴ്ച രാവിലെ ഉണ്ടായ അപകടത്തിൽ ഇന്നോവ ക്രിസ്റ്റ വാഹനം നിയന്ത്രണംവിട്ട് റോഡിന്റെ കൈവരിയിൽ ഇടിച്ചു. കെ എൽ 14 വി 3527 നമ്പർ വാഹനമാണ് അപകടത്തിൽപ്പെട്ടത്. ഇടിയുടെ ആഘാതത്തിൽ വാഹനത്തിന്റെ മുൻഭാഗം തകർന്നു. തുടർന്ന് വാഹനത്തിൽ നിന്ന് പുക ഉയരുകയായിരുന്നു. അപകടവിവരം ലഭിച്ചതിനെ തുടർന്ന് കാസർകോട് അഗ്നിരക്ഷാസേന സ്ഥലത്തെത്തി. 

സീനിയർ ഫയർ ആൻഡ് റെസ്ക്യൂ ഓഫിസർ സുകു വർഗീസിന്റെ നേതൃത്വത്തിൽ ഫയർ ആൻഡ് റെസ്ക്യൂ ഓഫിസർമാരായ വി എസ് ഗോകുൽ കൃഷ്ണൻ, ടി അമൽരാജ്, എം എം അരുൺകുമാർ, ഇ പ്രസീദ്, പി വി രഞ്ജിത്ത് എന്നിവർ രക്ഷാപ്രവർത്തനം നടത്തി. 

വാഹനത്തിലുണ്ടായിരുന്നവർക്ക് സാരമായ പരിക്കുകൾ ഉണ്ടായിരുന്നില്ല. ഇവർ ആശുപത്രിയിൽ പരിശോധന നടത്തിയ ശേഷം മറ്റൊരു വാഹനത്തിൽ വിമാനത്താവളത്തിലേക്ക് പോയതായി അഗ്നിരക്ഷാസേനയ്ക്ക് വിവരം ലഭിച്ചു. അപകടത്തെ തുടർന്ന് പുക ഉയർന്നുകൊണ്ടിരുന്ന വാഹനത്തിന്റെ എൻജിൻ ഭാഗം സേനാംഗങ്ങൾ തണുപ്പിച്ചു. ഇതോടെ തീപിടിത്തത്തിനുള്ള സാധ്യത ഒഴിവാക്കുകയും അപകടസ്ഥലം സുരക്ഷിതമാക്കുകയും ചെയ്തു.

ബോവിക്കാനത്തെ അപകടവും രക്ഷാപ്രവർത്തനവും

മുളിയാർ പഞ്ചായത്ത് പരിധിയിലെ ബോവിക്കാനം ടൗണിൽ ഞായറാഴ്ച പുലർച്ചെ 6.30-ഓടെയാണ് മൂന്നാമത്തെ അപകടം നടന്നത്. കാറും ബൈക്കും കൂട്ടിയിടിച്ചാണ് അപകടമുണ്ടായത്. അഗ്നിരക്ഷാസേന സ്ഥലത്തെത്തുമ്പോൾ ബൈക്ക് പൂർണമായും തകർന്ന നിലയിലും ജിപ്സി തലകീഴായി മറിഞ്ഞ നിലയിലുമായിരുന്നു. വാഹനങ്ങളിലുണ്ടായിരുന്നവരെ നാട്ടുകാർ ഉടൻ ആശുപത്രിയിലേക്ക് മാറ്റിയിരുന്നു. അപകടത്തിൽപ്പെട്ട വാഹനങ്ങൾ റോഡിൽ കിടന്നത് കൂടുതൽ അപകടങ്ങൾക്ക് കാരണമാകാനുള്ള സാധ്യത കണക്കിലെടുത്ത് അഗ്നിരക്ഷാസേന വാഹനങ്ങൾ നിവർത്തി സുരക്ഷിതമായ സ്ഥലത്തേക്ക് മാറ്റി.

അപകടത്തിൽ വാഹനങ്ങളിൽ നിന്ന് ഓയിലും പെട്രോളും ചോർന്നിരുന്നു. ഇതുമൂലം റോഡിൽ വഴുക്കൽ ഉണ്ടാകാനുള്ള സാധ്യതയുണ്ടായതിനാൽ ഫയർ ആൻഡ് റെസ്ക്യൂ ഓഫിസർമാരായ ടി അമൽരാജ്, കെ വി ജിതിൻ കൃഷ്ണൻ, എം എ വൈശാഖ്, എം എം അരുൺകുമാർ, ഒ കെ പ്രജിത്ത് എന്നിവർ മരപ്പൊടി വിതറി റോഡ് വൃത്തിയാക്കി ഗതാഗതം പുനഃസ്ഥാപിച്ചു. 

അപകടത്തിൽപ്പെട്ടവർക്ക് ഗുരുതരമായ പരിക്കേറ്റതായാണ് അഗ്നിരക്ഷാസേനയ്ക്ക് ലഭിച്ച വിവരം. പരിക്കേറ്റവരെ ആദ്യം തൊട്ടടുത്ത സിഎം ആശുപത്രിയിൽ പ്രവേശിപ്പിക്കുകയും തുടർന്ന് ഒരാളെ മംഗളൂരുവിലെ ആശുപത്രിയിലേക്ക് മാറ്റുകയും ചെയ്തതായി വിവരം ലഭിച്ചു. ഒരേ ദിവസം പുലർച്ചെ കാസർകോടിന്റെ വിവിധ ഭാഗങ്ങളിലുണ്ടായ 3 അപകടങ്ങളിലും അഗ്നിരക്ഷാസേനയുടെ സമയോചിതമായ ഇടപെടലാണ് റോഡിലെ ഇന്ധനച്ചോർച്ചയും പുക ഉയരുന്നതുമടക്കമുള്ള അപകടസാധ്യതകൾ ഒഴിവാക്കാൻ സഹായിച്ചത്.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Three separate road accidents occurred in various parts of Kasaragod district on Sunday morning, September 20, 2026, with the Fire and Rescue team leading swift rescue operations.

#KasargodVartha #KasaragodAccidents #Badiadka #Naymaramoola #Bovikanam #KeralaFireForce #RoadSafety #MalayalamNews #AparnaNews