കാസർകോട്ട് പോലീസിന്റെ വ്യാപക കോമ്പിംഗ് ഓപ്പറേഷൻ: കാറുകളിൽ കടത്തിയ ലക്ഷങ്ങളുടെ ലഹരി വസ്തുക്കൾ പിടികൂടി

ചെർക്കള: (KasargodVartha) ലഹരി വസ്തുക്കളായ നിരോധിത പുകയില ഉൽപ്പന്നങ്ങളും പാൻമസാലയും കടത്തുന്ന ശൃംഖലകളെ തകർക്കുന്നതിനായി കാസർകോട് ജില്ലാ പോലീസ് മേധാവി വിജയ ഭരത് റെഡ്ഡിയുടെ നിർദ്ദേശപ്രകാരം നവംബർ 14, വെള്ളിയാഴ്ച രാത്രി ജില്ലയിൽ വ്യാപകമായി നടത്തിയ കോമ്പിംഗ് ഓപ്പറേഷനിൽ നിരവധി സംഘങ്ങൾ കുടുങ്ങി.

മഞ്ചേശ്വരം, ഉപ്പള, ചെർക്കള, പാടി തുടങ്ങിയ മേഖലകളിൽ കേന്ദ്രീകരിച്ചാണ് ശക്തമായ പരിശോധനകൾ നടന്നത്. മൂന്നു കാറുകളിൽ ഒളിപ്പിച്ച് കടത്തുകയായിരുന്ന 45,930 പാക്കറ്റ് പാൻമസാലയും നിരോധിത പുകയില ഉൽപ്പന്നങ്ങളുമാണ് പിടികൂടിയത്. 

പിടികൂടിയ വസ്തുക്കൾക്ക് വിപണിയിൽ ലക്ഷങ്ങൾ വിലവരും. ലഹരി വസ്തുക്കൾ കടത്തുന്ന ശൃംഖലയിലെ മുഖ്യകണികളെന്ന് സംശയിക്കുന്ന രണ്ടുപേരെയും പോലീസ് അറസ്റ്റ് ചെയ്തു.

കൂടാതെ ജില്ലയിലുടനീളം നടത്തിയ റെയ്ഡുകളിൽ 15 വാറന്റ് പ്രതികളും രണ്ട് പിടികിട്ടാപ്പുള്ളികളും പോലീസിന്റെ വലയിലായി. നവംബർ 14, വെള്ളിയാഴ്ച രാത്രി മുതൽ ശനിയാഴ്ച രാവിലെ വരെ നീണ്ടുനിന്ന ഓപ്പറേഷനിൽ കാസർകോട് ജില്ലയിലെ വിവിധ സ്റ്റേഷനുകളിൽ 125 കേസുകൾ കൂടി രജിസ്റ്റർ ചെയ്തതായി പോലീസ് അറിയിച്ചു.

തലപ്പാടിയിൽ വൻവേട്ട

തലപ്പാടി അതിർത്തി ചെക്‌പോസ്റ്റിനടുത്ത് എസ് ഐ കെ ജി രതീഷിന്റെ നേതൃത്വത്തിൽ മഞ്ചേശ്വരം പോലീസ് നടത്തിയ വാഹന പരിശോധനയിലാണ് 26,112 പാക്കറ്റ് പുകയില ഉൽപ്പന്നങ്ങൾ പിടികൂടിയത്. കാറിന്റെ പിൻസീറ്റിനകത്ത് ചാക്കുകളിലാക്കി ഒളിപ്പിച്ച നിലയിലായിരുന്നു പുകയില സഞ്ചികൾ.

അറസ്റ്റിലായ മൊയ്തീൻ കുഞ്ഞി (47) ഉപ്പള കേന്ദ്രീകരിച്ചുള്ള ലഹരി വിൽപ്പനയുടെ പ്രധാനിയാണ്. ഇയാൾ കാറുകളിൽ കേരളത്തിലേക്ക് നിരോധിത ഉൽപ്പന്നങ്ങൾ നിരന്തരമായി കടത്തിക്കൊണ്ടുവരികയായിരുന്നുവെന്നാണ് പോലീസിന്റെ പ്രാഥമിക നിഗമനം. 

പരിശോധനാ സംഘത്തിൽ പ്രൊബേഷണറി എസ് ഐ ശബരി കൃഷ്ണൻ, എ എസ് ഐ രാജേഷ്, സിവിൽ പോലീസ് ഓഫീസർ സന്ദീപ് എന്നിവരും ഉണ്ടായിരുന്നു. പിടിച്ചെടുത്ത ഉൽപ്പന്നങ്ങളുടെ മൂല്യം മാർക്കറ്റിൽ ലക്ഷങ്ങൾ വിലവരുന്നതാണെന്ന് പോലീസ് സൂചിപ്പിച്ചു.

ചെർക്കളയിലും ലക്ഷങ്ങളുടെ ലഹരി വേട്ട

ചെർക്കള–പാടി റോഡിൽ വിദ്യാനഗർ പോലീസ് ഇൻസ്‌പെക്ടർ കെ പി ഷൈന്റെ നേതൃത്വത്തിൽ രണ്ടിടങ്ങളിൽ നടത്തിയ പരിശോധനകളിലും ലക്ഷങ്ങൾ വിലമതിക്കുന്ന ലഹരി വേട്ടയാണ് നടത്തിയത്.

ആദ്യ പരിശോധനയ്‌ക്കെത്തിയ കാറിൽനിന്ന് 12,218 പാക്കറ്റ് പുകയില ഉൽപ്പന്നങ്ങൾ കണ്ടെത്തി. ഇതുമായി ബന്ധപ്പെട്ട് വിദ്യാനഗർ പോലീസ് സ്റ്റേഷൻ പരിധിയിലെ റാഷിദിനെ (31) പോലീസ് അറസ്റ്റ് ചെയ്തു. കടത്തലിന് ഉപയോഗിച്ച കാർ പോലീസ് കസ്റ്റഡിയിലെടുത്തിട്ടുണ്ട്.

തുടർന്ന് അതേ റോഡിൽ നടത്തിയ മറ്റൊരു പരിശോധനയിൽ 7,600 പാക്കറ്റ് പാൻമസാല കൂടി പിടികൂടി. കാറിനുള്ളിൽ കെട്ടിപ്പൊതിഞ്ഞ നിലയിലായിരുന്നു ഉൽപ്പന്നങ്ങൾ. എന്നാൽ, പോലീസിനെ കണ്ട് കാർ ഓടിച്ച വ്യക്തി ഇരുട്ടിൽ ഓടിമറഞ്ഞു. 

ഇയാളെ തിരിച്ചറിയുന്നതിനായി അന്വേഷണം പുരോഗമിക്കുകയാണ്. പരിശോധനാ സംഘത്തിൽ എസ് ഐമാരായ കെ ഉമേഷ്, സഫ്‌വാൻ, എസ് പി സ്ക്വാഡ് അംഗം എസ് ഐ നാരായണൻ നായർ, ഹോം ഗാർഡ് ഷിബു കരക്കടവത്ത് എന്നിവർ പങ്കെടുത്തു.

വാറന്റ് പ്രതികൾക്കായി പ്രത്യേക റെയ്ഡ്

പുകയില വേട്ടയ്‌ക്കൊപ്പം, കുമ്പള പോലീസ് നടത്തിയ പ്രത്യേക കോമ്പിംഗ് ഓപ്പറേഷനിൽ 15 വാറന്റ് പ്രതികളും രണ്ട് പിടികിട്ടാപ്പുള്ളികളും പിടിയിലായി. ദീർഘകാലമായി ഒളിവിൽ കഴിയുന്ന പ്രതികളെ ലക്ഷ്യമിട്ടായിരുന്നു ഈ റെയ്ഡ്. പോലീസ് സ്റ്റേഷൻ പരിധിയിൽ ശക്തമായ നൈറ്റ് പട്രോളിംഗ്, ഡോർ ടു ഡോർ പരിശോധനകൾ, ഹോട്ടലുകളിലെ രേഖാ പരിശോധനകൾ തുടങ്ങിയവയും നടത്തി.

നിരോധിത ഉൽപ്പന്ന കടത്തൽ ശക്തമായി അടിച്ചമർത്തും

നവംബർ 14, വെള്ളിയാഴ്ച രാത്രിയോടെ ജില്ലയിലെ വിവിധ സ്റ്റേഷനുകളിൽ 125 കേസുകൾ കൂടി രജിസ്റ്റർ ചെയ്തതായി പോലീസ് അധികൃതർ അറിയിച്ചു. തുടർച്ചയായി വർധിച്ചുവരുന്ന നിരോധിത പുകയില ഉൽപ്പന്നങ്ങളും പാൻമസാലയും കടത്തുന്ന ശൃംഖലകളെ തുരത്താൻ ഈ റെയ്ഡ് നിർണായകമാകും എന്ന നിലപാടിലാണ് പോലീസ്.

ജില്ലാ പോലീസ് മേധാവിയുടെ നിർദ്ദേശപ്രകാരം അപ്രതീക്ഷിത പരിശോധന, നൈറ്റ് പട്രോളിംഗ്, അതിർത്തി കടന്നുവരുന്ന വാഹനങ്ങളുടെ പരിശോധന എന്നിവ കൂടുതൽ കർശനമാക്കുമെന്നും പോലീസ് വ്യക്തമാക്കി.

ഈ വാർത്ത ഷെയർ ചെയ്ത് നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Article Summary: Kasaragod Police seized 45,930 packets of pan masala/tobacco and arrested two in a massive combing operation.

#KasaragodPolice #CombingOperation #DrugSeizure #PanMasala #KeralaCrime #VijayaBharathReddy