നടുറോഡിൽ ലഹരിമാഫിയ കുടുങ്ങി; എംഡിഎംഎ കടത്തിയ രണ്ടുപേർ കാസർകോട്ട് അറസ്റ്റിൽ
● പ്രതികൾ ജില്ലയിലെ പ്രധാന ലഹരി വിതരണക്കാരാണെന്ന് പോലീസ്.
● ജില്ലാ പോലീസ് മേധാവിയുടെ നിർദ്ദേശപ്രകാരമായിരുന്നു അറസ്റ്റ്.
● നാർക്കോട്ടിക് നിയമപ്രകാരം കേസെടുത്ത് അന്വേഷണം തുടരുന്നു.
● കൂടുതൽ വിവരങ്ങൾ ചോദ്യം ചെയ്യലിലൂടെ പുറത്തുവരും.
കാസർകോട്: (KasargodVartha) ജില്ലയിൽ വൻ ലഹരിവേട്ട. ലക്ഷങ്ങൾ വിലമതിക്കുന്ന എം.ഡി.എം.എയുമായി രണ്ടുപേരെ കാറിൽ കടത്തുന്നതിനിടെ പിടികൂടി. ആദൂർ പോലീസ് സ്റ്റേഷൻ പരിധിയിലെ മുഹമ്മദ് ഡാനിഷ് (30), വിദ്യാനഗർ പോലീസ് സ്റ്റേഷൻ പരിധിയിലെ അബ്ദുൽ ഖാദർ (40) എന്നിവരെയാണ് ജില്ലാ ലഹരിവിരുദ്ധ സ്ക്വാഡും ബേക്കൽ പോലീസും ചേർന്ന് അറസ്റ്റ് ചെയ്തത്.
രഹസ്യവിവരത്തെ തുടർന്ന് നടത്തിയ അന്വേഷണത്തിലാണ് പ്രതികൾ പിടിയിലായത്. മുത്തനടുക്കം എന്ന സ്ഥലത്ത് സംശയം തോന്നി വാഹനം തടഞ്ഞുനിർത്തി പരിശോധിച്ചപ്പോൾ, ബോക്സിനുള്ളിൽ ഒളിപ്പിച്ച നിലയിൽ 256.02 ഗ്രാം എം.ഡി.എം.എ കണ്ടെത്തുകയായിരുന്നു. തുടർന്ന് വാഹനമുൾപ്പെടെ പ്രതികളെ പോലീസ് കസ്റ്റഡിയിലെടുത്തു.
പ്രതികൾ ജില്ലയിലെ പ്രധാന ലഹരി വിതരണക്കാരാണെന്ന് പോലീസിന്റെ പ്രാഥമിക അന്വേഷണത്തിൽ വ്യക്തമായി. ജില്ലാ പോലീസ് മേധാവി ബി.വി. വിജയ ഭരത് റെഡ്ഡി ഐ.പി.എസിന്റെ നിർദ്ദേശപ്രകാരം ബേക്കൽ ഡിവൈ.എസ്.പി മനോജ് വി.വി, ഇൻസ്പെക്ടർ ശ്രീദാസ് എം.വി എന്നിവരുടെ മേൽനോട്ടത്തിലാണ് പരിശോധനയും അറസ്റ്റും നടന്നത്.
ഈ ദൗത്യത്തിൽ സബ് ഇൻസ്പെക്ടർ സവ്യസാചി എം, പ്രൊബേഷനറി എസ്.ഐമാരായ അഖിൽ സെബാസ്റ്റ്യൻ, മനു കൃഷ്ണൻ, ജില്ലാ സ്ക്വാഡ് അംഗങ്ങളായ സി.പി.ഒ. നിജിൻ കുമാർ, രജീഷ് കാട്ടാമ്പള്ളി, അനീഷ് കുമാർ, ഭക്ത ശൈവൽ, സബ് ഡിവിഷൻ സ്ക്വാഡ് അംഗങ്ങളായ എസ്.സി.പി.ഒ. സുഭാഷ്, സജീഷ് കെ.കെ, സുഭാഷ് ചന്ദ്രൻ, സി.പി.ഒ. സന്ദീപ് എം, സൈബർ സെൽ സി.പി.ഒ. മനോജ് എന്നിവരും പങ്കെടുത്തു.
പ്രതികളെ ചോദ്യം ചെയ്യുന്നതിലൂടെ കൂടുതൽ വിവരങ്ങൾ പുറത്തുവരാൻ സാധ്യതയുണ്ട്. നാർക്കോട്ടിക് നിയമപ്രകാരം കേസെടുത്ത് ബേക്കൽ പോലീസ് അന്വേഷണം തുടരുകയാണ്.
ഈ ലഹരിവേട്ടയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക
Article Summary: Two arrested in Kasaragod with MDMA, major drug bust.
#Kasaragod #DrugBust #MDMA #KeralaPolice #AntiDrugSquad #CrimeNews
