വൻ മയക്കുമരുന്ന് വേട്ട; 43 ഗ്രാം എംഡിഎംഎയുമായി മൂന്ന് യുവാക്കൾ അറസ്റ്റിൽ

ഉപ്പള: (KasargodVartha) മംഗൽപാടി സോങ്കാലിൽ വൻ മയക്കുമരുന്ന് വേട്ട. 43.77 ഗ്രാം എംഡിഎംഎയുമായി മൂന്ന് യുവാക്കൾ പിടിയിലായതായി പൊലീസ് അറിയിച്ചു. ജില്ലാ പോലീസ് ചീഫിന്റെ ഡാൻസാഫ് ടീമും കുമ്പള പോലീസും ചേർന്ന് നടത്തിയ സംയുക്ത പരിശോധനയിലാണ് പ്രതികൾ പിടിയിലായതെന്ന് അധികൃതർ വ്യക്തമാക്കി. എം. അർഷഫ് (26), കെ സാദിഖ് (33), എം. കെ. ഷംസുദ്ധീൻ എന്നിവരാണ് അറസ്റ്റിലായത്.

ശനിയാഴ്ച ഉച്ചയ്ക്ക് ഡാൻസാഫ് ടീമിലെ ഉദ്യോഗസ്ഥൻ കെ. രജീഷിന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു പരിശോധന. കുമ്പള എസ്‌ഐ അനന്തകൃഷ്ണനും എഎസ്ഐമാരായ അതർ റാം, സിദ്ദിഖ് അൻവർ, വിഷ്ണുനാഥ് എന്നിവരും ചേർന്നാണ് സ്ഥലത്തെത്തിയത്.

പുതിയ വീടിനു സമീപം പരിശോധന നടത്തുകയായിരുന്ന പോലീസ് സംഘം പ്രതികളെ തടഞ്ഞു നിർത്തി പരിശോധിക്കുകയായിരുന്നു. പോലീസിനെ കണ്ടയുടനെ ഓടി രക്ഷപ്പെടാൻ ശ്രമിച്ച അർഷഫ് ഓടുന്നതിനിടെ വീണ് കാലിന് പരിക്കേറ്റു. ഇതേത്തുടർന്ന് ഇയാളെ കാസർകോട് ജനറൽ ആശുപത്രിയിൽ പ്രവേശിപ്പിച്ചതായി പൊലീസ് അറിയിച്ചു.

പ്രതികളുടെ പാന്റിന്റെ കീശയിൽ ഒളിപ്പിച്ച നിലയിലാണ് മയക്കുമരുന്ന് കണ്ടെടുത്തത്. ഷംസുദ്ധീന്റെ പക്കൽ നിന്ന് കണ്ടെടുത്ത എംഡിഎംഎ അരച്ച് പൊടിച്ച നിലയിലാണ് സൂക്ഷിച്ചിരുന്നതെന്ന് പൊലീസ് വ്യക്തമാക്കി.

ഓപ്പറേഷനിൽ ഡാൻസാഫ് ടീമിലെ ഉദ്യോഗസ്ഥരായ നിജിൻ കുമാർ, രജീഷ് കാട്ടാമ്പള്ളി, അനീഷ്‌ കുമാർ, ഭക്ത ഷൈവൽ എന്നിവരും പങ്കെടുത്തു. സംഭവത്തിൽ കൂടുതൽ അന്വേഷണം നടക്കുകയാണെന്ന് പൊലീസ് അറിയിച്ചു.

മയക്കുമരുന്ന് ഉപയോഗത്തിനെതിരെ നിങ്ങളുടെ അഭിപ്രായം കമൻ്റ് ചെയ്യുക. ഈ വാർത്ത കൂടുതൽ പേരിലേക്ക് ഷെയർ ചെയ്യുക.

Article Summary: Police arrest three youths with 43 grams of MDMA in Mangalpady, Kasaragod.

#Kasaragod #MDMA #DrugBust #KeralaPolice #Mangalpady #CrimeNews