തട്ടിക്കൊണ്ടുപോകലിൽ ട്വിസ്റ്റ്: രണ്ട് കേസുകളിലായി എട്ടുപേർ അറസ്റ്റിൽ; സൂത്രധാരൻ ബേക്കൽ സ്വദേശി

കാസർകോട്: (KasargodVartha) പട്ടാപ്പകൽ നടന്ന തട്ടിക്കൊണ്ടുപോകൽ കേസിൽ നിർണായക വഴിത്തിരിവ്. സംഭവവുമായി ബന്ധപ്പെട്ട് വാദികളും പ്രതികളും ഉൾപ്പെടെ എട്ടുപേരെ കാസർകോട് ടൗൺ പൊലീസ് അറസ്റ്റ് ചെയ്തു. വ്യാഴാഴ്ചയാണ് (ഡിസംബർ 18) കേസിൽ നിർണായക പുരോഗതി ഉണ്ടായതായി പൊലീസ് അറിയിച്ചത്.

മേൽപ്പറമ്പിലെ മുഹമ്മദ് ഹനീഫിനെ (36) തട്ടിക്കൊണ്ടുപോയത്, നിരോധിത നോട്ടുകൾ വെളുപ്പിക്കുന്ന ആന്ധ്ര സംഘത്തിലെ ഒരാളെ തടഞ്ഞുവെച്ച് പണം തട്ടിയതിനെ തുടർന്നുണ്ടായ പ്രതികാര നടപടിയാണെന്ന് പൊലീസ് വ്യക്തമാക്കി. രണ്ട് സംഘങ്ങൾക്കുമെതിരെ തട്ടിക്കൊണ്ടുപോകൽ, പണം തട്ടൽ തുടങ്ങിയ വകുപ്പുകൾ ചുമത്തി കേസെടുത്തിട്ടുണ്ട്.

കേസിന്റെ പശ്ചാത്തലം

നിരോധിത നോട്ടുകൾ മാറ്റിനൽകണമെന്നാവശ്യപ്പെട്ട് ആന്ധ്ര സംഘത്തെ മലയാളി സംഘം കാസർകോട്ടേക്ക് വിളിച്ചുവരുത്തുകയായിരുന്നു. തുടർന്ന് ആന്ധ്ര സംഘത്തിലെ പ്രധാനിയായ ഓംകാറിനെ തടഞ്ഞുവെച്ച് ഏഴര ലക്ഷം രൂപ തട്ടിയെടുത്തു. ഇതിലുള്ള പ്രതികാരമായാണ് പിന്നീട് മലയാളി സംഘത്തിലെ മേൽപ്പറമ്പിലെ ഹനീഫയെ ആന്ധ്ര സംഘം തട്ടിക്കൊണ്ടുപോയതെന്ന് അന്വേഷണത്തിൽ വ്യക്തമായി.

അറസ്റ്റിലായവർ:

ആന്ധ്ര സംഘം:

● സിദാന ഓംകാർ (25)

● മാരുതി പ്രസാദ് റെഡി (33)

● ശ്രീനാഥ് എ (26)

● പൃത്വിരാജ് റെഡി (31)

മലയാളി സംഘം: 

●മുഹമ്മദ് ഹനീഫ (36)

● മുഖ്യ സൂത്രധാരൻ ഷെരീഫ് എം (44)

● ബി നൂറുദ്ദീൻ (42)

● കെ വിജയൻ (55)

ആന്ധ്രയിലെ വൈഎസ്ആർ കോൺഗ്രസിന്റെ ഒരു നേതാവിന് വേണ്ടിയാണ് നിരോധിത നോട്ട് ഇടപാട് നടത്തിയതെന്ന സൂചനകളാണ് പൊലീസ് നൽകുന്നത്. കേസിൽ വിശദമായ അന്വേഷണം തുടരുകയാണെന്ന് പൊലീസ് അറിയിച്ചു.

ഈ വാർത്ത ഷെയർ ചെയ്യൂ 

Article Summary: Kasaragod police arrested 8 people in a kidnapping case linked to a banned currency exchange scam involving Kerala and Andhra gangs.

#KasaragodNews #KidnappingCase #PoliceArrest #CurrencyScam #KeralaCrime #AndhraGang