മയക്കുമരുന്ന് തേടിയെത്തിയ പോലീസിന് കിട്ടിയത് 200 അനധികൃത ഗ്യാസ് സിലിണ്ടറുകൾ!

കാസർകോട്: (KasargodVartha) മയക്കുമരുന്ന് റെയ്ഡിനെത്തിയ പോലീസിന് ഒരു വീട്ടിൽ നിന്ന് കണ്ടെത്താനായത് അനധികൃതമായി സൂക്ഷിച്ച ഇരുനൂറോളം ഗ്യാസ് സിലിണ്ടറുകൾ. വിവരം ലഭിച്ചതിനെ തുടർന്ന് സ്ഥലത്തെത്തിയ സിവിൽ സപ്ലൈ വിഭാഗം സിലിണ്ടറുകൾ കസ്റ്റഡിയിലെടുക്കുകയും മഹസർ തയ്യാറാക്കി ജില്ലാ കളക്ടർക്ക് റിപ്പോർട്ട് സമർപ്പിക്കുകയും ചെയ്തു.

ഈ വിഷയത്തിൽ തുടർനടപടികൾ കളക്ടറുടെ ഭാഗത്ത് നിന്നുണ്ടാകുമെന്ന് ജില്ലാ സപ്ലൈ ഓഫീസർ പ്രഭാകരൻ കാസർകോട് വാർത്തയോട് പറഞ്ഞു. പിടിച്ചെടുത്ത സിലിണ്ടറുകളിൽ നാൽപ്പതോളം വാണിജ്യാവശ്യത്തിനുള്ളതും ബാക്കി ഗാർഹികാവശ്യത്തിനുള്ളതുമാണ്.

ചെങ്കള ചേരൂരിലെ എം.വി. സക്കറിയയുടെ വീട്ടിൽ നിന്നാണ് ഇത്രയധികം ഗ്യാസ് സിലിണ്ടറുകൾ കണ്ടെത്തിയത്. ഭാരത് ഗ്യാസിന്റെ ആറ് സിലിണ്ടറുകളും ബാക്കി എച്ച്.പി. ഗ്യാസ് സിലിണ്ടറുകളുമായിരുന്നു.

കാസർകോട് ഡിവൈ.എസ്.പി.യുടെ സ്ക്വാഡ് അംഗങ്ങളും വിദ്യാനഗർ ഇൻസ്പെക്ടർ യു.പി. വിപിന്റെ നേതൃത്വത്തിലുള്ള പോലീസുമാണ് രഹസ്യവിവരത്തിന്റെ അടിസ്ഥാനത്തിൽ മയക്കുമരുന്ന് റെയ്ഡിനെത്തിയത്. റെയ്ഡിനിടെയാണ് വീട്ടിൽ വൻതോതിൽ ഗ്യാസ് സിലിണ്ടറുകൾ അനധികൃതമായി സൂക്ഷിച്ചിരിക്കുന്നത് കണ്ടത്. ഉടൻതന്നെ സിവിൽ സപ്ലൈ വിഭാഗത്തെ വിവരമറിയിക്കുകയായിരുന്നു.

ഹോട്ടലുകൾക്കും മറ്റ് ആവശ്യക്കാർക്കും മറിച്ചുവിൽക്കുന്നതിനാണ് ഈ ഗ്യാസ് സിലിണ്ടറുകൾ സൂക്ഷിച്ചതെന്നാണ് പ്രാഥമിക വിവരം. ഈ അനധികൃത ഇടപാടിൽ ഗ്യാസ് ഏജൻസികൾക്കോ വിതരണക്കാർക്കോ പങ്കുണ്ടോ എന്നും സംശയിക്കുന്നുണ്ട്.

കാസർകോട് താലൂക്ക് സപ്ലൈ ഓഫീസർ കൃഷ്ണനായിക്, റേഷനിംഗ് ഓഫീസർമാരായ കൊറഗപ്പ, ദിലീപ് പ്രഭ, പ്രഭാകര എന്നിവർ ചേർന്നാണ് സിലിണ്ടറുകൾ കസ്റ്റഡിയിലെടുത്തത്. പിന്നീട് ഇവ കാസർകോട്ടെയും ചെർക്കളയിലെയും ഏജൻസികൾക്ക് കൈമാറി.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Police seize over 200 illicit gas cylinders during drug raid in Kasaragod.

#Kasaragod #GasCylinders #IllicitTrade #DrugRaid #KeralaPolice #CivilSupplies