കാസർകോട് വനംവകുപ്പ് ഗോഡൗൺ കവർച്ച; 21 വർഷത്തിന് ശേഷം പാരമ്പര്യ വൈദ്യൻ പിടിയിൽ

കാസർകോട്: (KasargodVartha) വനംവകുപ്പിന്റെ കാസർകോട് റെയിൽവേ സ്റ്റേഷനു സമീപത്തെ ഗോഡൗണിൽ നിന്ന് ആനക്കൊമ്പുകളും 100 കിലോ ചന്ദനമുട്ടികളും കവർന്നെന്ന കേസിൽ ഒളിവിലായിരിക്കെ കഴിഞ്ഞ ദിവസം ക്രൈംബ്രാഞ്ച് അറസ്റ്റ് ചെയ്തത് പാരമ്പര്യ വൈദ്യനെ. ഡോ. മുഹമ്മദ് ഫരീദ് (60) എന്ന മുഹമ്മദ് ഫതീദിനെയാണ് കാസർകോട് ക്രൈംബ്രാഞ്ച് ഡിവൈഎസ്പി മധുസൂദനൻ നായരുടെ നേതൃത്വത്തിലുള്ള അന്വേഷണസംഘം പിടികൂടിയത്. 

കുറ്റപത്രം അടക്കം സമർപ്പിച്ച കേസിലാണ് ജാമ്യത്തിലിറങ്ങി മുങ്ങിയ പ്രതിയെ ക്രൈംബ്രാഞ്ച് പിടികൂടിയത്. പ്രതിയെ കോടതിയിൽ ഹാജരാക്കിയ ശേഷം രണ്ടാഴ്ചത്തേക്ക് റിമാൻഡ് ചെയ്തു. കേരളം, കർണാടക, ആന്ധ്രാപ്രദേശ് സംസ്ഥാനങ്ങളിലായി നടന്ന സമാന നിരവധി കവർച്ചകളിൽ ഉൾപ്പെട്ട സംഘത്തിലെ സജീവാംഗമാണ് മുഹമ്മദ് ഫരീദെന്ന് ക്രൈംബ്രാഞ്ച് ഉദ്യോഗസ്ഥർ അറിയിച്ചു.

ചന്ദനമുട്ടികളും ആനക്കൊമ്പും കവർന്നു

2005 ജൂൺ 22-ന് രാത്രിയിലാണ് ഏറെ കോളിളക്കം സൃഷ്ടിച്ച കവർച്ച നടന്നത്. കാസർകോട് റെയിൽവേ സ്റ്റേഷനു സമീപത്തെ വനംവകുപ്പിന്റെ ഗോഡൗണിലെത്തിയ കവർച്ചാസംഘം അവിടെ ഡ്യൂട്ടിയിലുണ്ടായിരുന്ന രാത്രി കാവൽക്കാരനെ ആക്രമിച്ച് കീഴ്പ്പെടുത്തി കെട്ടിയിട്ട ശേഷമാണ് ഗോഡൗണിൽ സൂക്ഷിച്ചിരുന്ന രണ്ട് ആനക്കൊമ്പുകളും ഏകദേശം 100 കിലോ ചന്ദനമുട്ടികളും വാനത്തിൽ കടത്തി കൊണ്ടുപോയതെന്നാണ് കേസ്. 

വൻ സാമ്പത്തിക മൂല്യമുള്ള വനസമ്പത്താണ് സംഘം വാഹനത്തിൽ കയറ്റിക്കൊണ്ടുപോയത്. സംഭവത്തെ തുടർന്ന് കാസർകോട് ടൗൺ പൊലീസ് കേസെടുത്ത് അന്വേഷണം ആരംഭിച്ചെങ്കിലും പിന്നീട് കേസ് ക്രൈംബ്രാഞ്ചിന് കൈമാറുകയായിരുന്നു. വിശദമായ അന്വേഷണത്തിനൊടുവിൽ കവർച്ചാസംഘത്തിലെ ഏതാനും പ്രതികളെ നേരത്തെ തന്നെ അറസ്റ്റ് ചെയ്തിരുന്നു. എന്നാൽ മുഹമ്മദ് ഫരീദ് വർഷങ്ങളായി ഒളിവിൽ കഴിയുകയായിരുന്നുവെന്ന് പൊലീസ് വ്യക്തമാക്കുന്നു.

അന്വേഷണത്തിലെ നിർണായക മുന്നേറ്റം

സാങ്കേതിക തെളിവുകളും രഹസ്യാന്വേഷണ വിവരങ്ങളും അടിസ്ഥാനമാക്കി പ്രതിയുടെ സാന്നിധ്യം കണ്ടെത്തിയ ക്രൈംബ്രാഞ്ച് സംഘം കർണാടകയിൽ നടത്തിയ നീക്കത്തിനൊടുവിലാണ് അറസ്റ്റ് സാധ്യമായത്. പ്രതിയെ വിശദമായി ചോദ്യം ചെയ്തതിൽ കേസിലെ മറ്റ് വസ്തുതകളും ഒളിവിലുള്ള പ്രതികളെക്കുറിച്ചും കൂടുതൽ വിവരങ്ങൾ ലഭിച്ചിട്ടുണ്ടെന്ന് അന്വേഷണസംഘം സൂചിപ്പിക്കുന്നു. 

കേസിൽ ഇനിയും പ്രതികൾ അറസ്‌റ്റിലാകാനുണ്ട്. വർഷങ്ങൾ പഴക്കമുള്ള കേസിൽ ഒളിവിലായിരുന്ന പ്രധാന പ്രതികളിൽ ഒരാളെ കൂടി നിയമത്തിന് മുന്നിലെത്തിക്കാൻ കഴിഞ്ഞത് അന്വേഷണത്തിലെ നിർണായക മുന്നേറ്റമായാണ് വിലയിരുത്തപ്പെടുന്നത്. കേസുമായി ബന്ധപ്പെട്ട തുടർനടപടികൾ ക്രൈംബ്രാഞ്ച് ആരംഭിച്ചിട്ടുണ്ട്. കാസർകോട്ടെ ചിലർക്ക് വേണ്ടിയാണ് സംഘം വനം വകുപ്പ് ഓഫീസ് ആക്രമിച്ച് തൊണ്ടിമുതലുകൾ തട്ടിയെടുത്തതെന്നായിരുന്നു കേസിന്റെ തുടക്കത്തിൽ ഉയർന്ന ആരോപണം.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ രാഷ്ട്രീയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Traditional doctor arrested after 21 years for Kasaragod forest godown robbery.

#CrimeBranch #KasaragodNews #ForestDepartment #ElephantTusk #SandalwoodSmuggling #KeralaPolice #AparnaNews