ഡിജിറ്റൽ അറസ്റ്റ് തട്ടിപ്പ്: കാസർകോട് സൈബർ പോലീസ് 50 ലക്ഷം രൂപ തിരികെ പിടിച്ചു

കാസർകോട്: (KasargodVartha) ‘ഡിജിറ്റൽ അറസ്റ്റ്’ എന്ന പേരിൽ നടന്ന സൈബർ തട്ടിപ്പിൽ കാഞ്ഞങ്ങാട് സ്വദേശികളായ ദമ്പതികളിൽ നിന്ന് തട്ടിയെടുത്ത 2 കോടി 40 ലക്ഷം രൂപയിൽ 50 ലക്ഷം രൂപ കാസർകോട് സൈബർ പോലീസ് തിരികെ പിടിച്ചു.

ഇൻഡസ് ബാങ്കിന്റെ ബീഹാറിലെ ഒരു ബ്രാഞ്ചിൽ നിന്നാണ് ഈ തുക തിരിച്ചുപിടിച്ചത്. എട്ട് ആഴ്ച നീണ്ട അന്വേഷണത്തിനൊടുവിലായിരുന്നു സൈബർ പോലീസിന്റെ ഈ നിർണായക നേട്ടം. 2025 ഓഗസ്റ്റ് 12 മുതൽ 21 വരെ നിരവധി തവണയായിട്ടാണ് തട്ടിപ്പ് നടന്നത്.

മണി ലോണ്ടറിംഗ് കേസിൽ ഉൾപ്പെട്ടുവെന്ന് പറഞ്ഞ് ഭീഷണിപ്പെടുത്തിയ തട്ടിപ്പുകാർ, ‘ഡിജിറ്റൽ അറസ്റ്റ്’ ചെയ്യുകയാണെന്ന് പറഞ്ഞ് ദമ്പതികളെ വഞ്ചിക്കുകയും അക്കൗണ്ടിലെ പണം അവർ നിർദ്ദേശിച്ച അക്കൗണ്ടുകളിലേക്ക് അയപ്പിക്കുകയും ചെയ്യുകയായിരുന്നു.

തട്ടിപ്പ് തിരിച്ചറിഞ്ഞ ഉടൻ തന്നെ ദമ്പതികൾ 1930 എന്ന സൈബർ ക്രൈം ഹെൽപ്‌ലൈൻ നമ്പറിലേക്ക് വിളിച്ച് പരാതി നൽകുകയും കാസർകോട് സൈബർ പോലീസിന്റെ സഹായം തേടുകയും ചെയ്തതോടെയാണ് തട്ടിപ്പുകാർക്ക് നൽകിയ പണം തിരിച്ചുപിടിക്കാൻ സാധിച്ചത്. 

തട്ടിപ്പിനുശേഷം ഏതാനും മണിക്കൂറുകൾക്കുള്ളിൽ പരാതി നൽകിയതിനാലാണ് പണം ഫ്രീസ് ചെയ്യാനും തിരികെ നേടാനുമായതെന്ന് പോലീസ് അറിയിച്ചു.

ഇതിനകം മൊത്തം 57 ലക്ഷം രൂപ മരവിപ്പിക്കാൻ സാധിച്ചിട്ടുണ്ടെന്നും അതിൽ 50 ലക്ഷം രൂപ കോടതി മുഖേന ഡിമാൻഡ് ഡ്രാഫ്റ്റായി കാസർകോട് കോടതിയിൽ എത്തിയതായും പോലീസ് അറിയിച്ചു.

ജില്ലാ പോലീസ് മേധാവി ബി വി വിജയഭരത് റെഡ്ഡിയുടെ നിർദ്ദേശപ്രകാരം കാസർകോട് സൈബർ പോലീസ് സ്റ്റേഷൻ എസ് എച്ച് ഓ വിപിൻ യു പിയുടെ മേൽനോട്ടത്തിൽ എസ് ഐ രവീന്ദ്രൻ, ഷിനു കെ ബി, എ എസ് ഐ പ്രശാന്ത്, രഞ്ജിത്ത്, എസ് സി പി ഓ സുധേഷ് എന്നിവർ ചേർന്ന സംഘമാണ് അന്വേഷണം നടത്തിയത്.

സൈബർ തട്ടിപ്പിൽ നഷ്ടപ്പെട്ട പണം തിരികെ കിട്ടിയത് എങ്ങനെയെന്ന് മനസ്സിലായില്ലേ? ഈ സംഭവം മറ്റുള്ളവരുമായി പങ്കുവെച്ച് അവരെ ബോധവത്കരിക്കുക.

Article Summary: Kasaragod Cyber Police recovered 50 lakhs out of 2.40 crore lost in a 'Digital Arrest' cyber fraud.

#DigitalArrestScam #CyberCrime #KasaragodPolice #FraudRecovery #CyberSafety #KeralaPolice