കാസർകോട് ഫാസ്റ്റ് ഫുഡ് കടയിൽ 17കാരന് കുത്തേറ്റു; ആളുമാറിയുള്ള ആക്രമണമെന്ന് പോലീസ്; പ്രതിക്കായി തിരച്ചിൽ

കാസർകോട്: (KasargodVartha) ഫാസ്റ്റ് ഫുഡ് കടയിൽ ഭക്ഷണം കഴിക്കാനെത്തിയ 17കാരന് കുത്തേറ്റു. ഉളിയത്തടുക്കയിലെ അബ്ദുൽ ഖാദറിൻ്റെ മകൻ ഇഫ്രാനാണ് (17) ആക്രമണത്തിന് ഇരയായത്. നെഞ്ചിൽ ഗുരുതരമായി പരിക്കേറ്റ ഇഫ്രാനെ ചെങ്കളയിലെ ആസ്റ്റർ മിംസ് ആശുപത്രിയിൽ പ്രവേശിപ്പിച്ചു. അടിയന്തര ശസ്ത്രക്രിയയ്ക്ക് വിധേയനാക്കിയ യുവാവ് തീവ്രപരിചരണ വിഭാഗത്തിൽ ചികിത്സയിലാണ്. വെള്ളിയാഴ്ച രാത്രി 9.15 മണിയോടെയായിരുന്നു നാടിനെ നടുക്കിയ സംഭവം.

ആക്രമണം ആളുമാറി

ഉളിയത്തടുക്കയിലെ 'ഫുഡ് സ്റ്റോറി' എന്ന ഫാസ്റ്റ് ഫുഡ് കടയിൽ ഇഫ്രാനും മൂന്ന് സുഹൃത്തുക്കളും എത്തിയപ്പോഴാണ് ആക്രമണമുണ്ടായത്. തട്ടുകട നടത്തുന്ന അഫ്സൽ എന്നയാളാണ് ആക്രമണം നടത്തിയതെന്ന് ബന്ധുക്കൾ ആരോപിക്കുന്നു. കടയിൽ എത്തിയ ഉടൻ തന്നെ അഫ്സൽ അസഭ്യം പറഞ്ഞ് പ്രകോപിപ്പിക്കുകയും തുടർന്ന് കൈയ്യേറ്റത്തിന് ശ്രമിക്കുകയും ചെയ്തതായാണ് വിവരം. ഇതിനിടെ ഉണ്ടായ ഉന്തുംതള്ളിലും താഴെ വീണ അഫ്സൽ കത്തിയെടുത്ത് ഇഫ്രാൻ്റെ നെഞ്ചിൽ കുത്തുകയായിരുന്നുവെന്ന് പറയുന്നു. കൂടെയുണ്ടായിരുന്ന മറ്റൊരു സുഹൃത്തിനെയും കുത്താൻ ശ്രമിച്ചെങ്കിലും ഇയാൾ ഓടി രക്ഷപ്പെട്ടു.

പ്രതിക്കായി പോലീസ് തിരച്ചിൽ

അഫ്സലിൻ്റെ കടയിൽ സ്ഥിരമായി ചില കൗമാരക്കാർ വന്ന് പ്രശ്നങ്ങൾ സൃഷ്ടിക്കാറുണ്ടായിരുന്നുവെന്നും, അവരാണെന്ന് കരുതി ആളുമാറി ഇഫ്രാനെ ആക്രമിക്കുകയായിരുന്നുവെന്നുമാണ് പ്രാഥമിക വിവരം. സംഭവത്തിന് പിന്നാലെ പ്രതി അഫ്സൽ വാഹനത്തിൽ രക്ഷപ്പെട്ടു. കാസർകോട് പോലീസ് സ്ഥലത്തെത്തി അന്വേഷണം ആരംഭിച്ചിട്ടുണ്ട്. ഒളിവിൽ പോയ പ്രതിക്കായി പോലീസ് തിരച്ചിൽ ഊർജിതമാക്കി.

പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താനും മറക്കരുത്.

Article Summary: A 17-year-old boy named Ifran was critically injured after being stabbed at a fast-food joint in Kasaragod, allegedly due to mistaken identity by the shop owner.

#KasaragodNews #CrimeNews #StabbingIncident #Uliyathadukka #YouthAttacked #KeralaPolice #KasargodVartha #Hospitalized #KasaragodCrime