അച്ചാറിൽ ഒളിപ്പിച്ച മയക്കുമരുന്ന്: ഗൾഫ് യാത്രക്കാരൻ തലനാരിഴയ്ക്ക് രക്ഷപ്പെട്ടു, മൂന്നുപേർ പിടിയിൽ

കണ്ണൂർ: (KasargodVartha) ഗൾഫിലേക്ക് മയക്കുമരുന്ന് കടത്താൻ പുതിയ മാർഗങ്ങളുമായി ലഹരി മാഫിയ സംഘം രംഗത്ത്. കണ്ണൂർ ജില്ലയിലെ ചക്കരക്കൽ പോലീസ് സ്റ്റേഷൻ പരിധിയിൽ നടന്ന സംഭവത്തിൽ, അച്ചാർ കുപ്പിയിൽ ഒളിപ്പിച്ച് മയക്കുമരുന്ന് കടത്താൻ ശ്രമിച്ച മൂന്നുപേരെ പോലീസ് അറസ്റ്റ് ചെയ്തു. ചക്കരക്കൽ കണയന്നൂർ സ്വദേശിയായ മിഥിലാജിനെയാണ് ലഹരി സംഘം കുടുക്കാൻ ശ്രമിച്ചത്.

ജിസിൻ, ശ്രീലാൽ, അർഷാദ് എന്നിവരെയാണ് ചക്കരക്കൽ പോലീസ് ഇൻസ്പെക്ടറുടെ നേതൃത്വത്തിലുള്ള സംഘം അറസ്റ്റ് ചെയ്തത്. വ്യാഴാഴ്ച പുലർച്ചെ 12 മണിയോടെയാണ് സംഭവം. ഗൾഫിലേക്ക് പോകാനിരുന്ന മിഥിലാജിന് കൊണ്ടുപോകുന്നതിനായാണ് അയൽവാസിയായ ജിസിൻ ഒരു പാർസൽ മിഥിലാജിന്റെ വീട്ടിലെത്തിച്ചത്. ചിപ്‌സും മറ്റ് പലഹാരങ്ങളും അടങ്ങുന്ന പൊതിയിലായിരുന്നു അച്ചാർ ബോട്ടിൽ വെച്ചിരുന്നത്.

ഈ അച്ചാർ ബോട്ടിലിനുള്ളിൽ 2.6 ഗ്രാം എം.ഡി.എം.എയും 3.04 ഗ്രാം ഹാഷിഷ് ഓയിലും ചെറിയ പ്ലാസ്റ്റിക് കവറുകളിലാക്കി ഒളിപ്പിച്ച നിലയിലായിരുന്നു. ഗൾഫിലുള്ള വഹീം എന്നയാൾക്ക് നൽകാനായിരുന്നു ഈ പാർസൽ. ഇത് ശ്രീലാൽ എന്നയാൾ തന്നതാണെന്ന് മിഥിലാജിനോട് പറയണമെന്നും ജിസിൻ നിർദേശിച്ചിരുന്നു. വഹീം ഇക്കാര്യം സൂചിപ്പിച്ച് മിഥിലാജിന് സന്ദേശവും അയച്ചിരുന്നു.

സംഭവസമയത്ത് മിഥിലാജ് തന്റെ ഭാര്യ വീട്ടിലുണ്ടായിരുന്നില്ല. സാധാരണപോലെ പാർസൽ ഏൽപ്പിച്ച് ജിസിൻ മടങ്ങി. എന്നാൽ അച്ചാർ പ്ലാസ്റ്റിക് ബോട്ടിലിൽ സ്റ്റിക്കർ കാണാഞ്ഞതിനെ തുടർന്നുണ്ടായ സംശയത്താൽ മിഥിലാജിന്റെ ഭാര്യ പിതാവ് അമീർ അത് തുറന്ന് പരിശോധിക്കുകയായിരുന്നു. അപ്പോഴാണ് അച്ചാർ കുപ്പിക്കുള്ളിൽ പ്ലാസ്റ്റിക് കവറുകൾ കണ്ടെത്തിയത്. ഉടൻ തന്നെ അദ്ദേഹം ചക്കരക്കൽ പോലീസിനെ വിവരമറിയിച്ചു.

ചക്കരക്കൽ എസ്.ഐ. എൻ.പി. ഷാജിയുടെ നേതൃത്വത്തിലുള്ള സംഘം നടത്തിയ പരിശോധനയിൽ കവറിനുള്ളിൽ കണ്ടെത്തിയത് മയക്കുമരുന്നാണെന്ന് സ്ഥിരീകരിച്ചു. തുടർന്ന് ജിസിൻ, ശ്രീലാൽ, അർഷാദ് എന്നിവരെ പോലീസ് അറസ്റ്റ് ചെയ്യുകയായിരുന്നു. സംഭവത്തിനുശേഷം ഒളിവിൽ പോയ ജിസിനെ പിന്നീട് പിടികൂടുകയായിരുന്നു. പ്രതികളെ കോടതിയിൽ ഹാജരാക്കി റിമാൻഡ് ചെയ്തു. വീട്ടുകാരുടെ ജാഗ്രതയാണ് മിഥിലാജിനെ മയക്കുമരുന്ന് കേസിൽ കുടുങ്ങുന്നതിൽ നിന്നും രക്ഷിച്ചത്.

ഗൾഫിൽ നിന്നും അവധിക്ക് നാട്ടിലെത്തുന്നവരും തിരിച്ചും പലഹാരങ്ങളും ഭക്ഷ്യവസ്തുക്കളും കൊടുത്തുവിടുന്നത് സാധാരണമാണ്. വിസിറ്റിംഗ് വിസയിലോ അല്ലാതെയോ മടങ്ങുന്നവരുടെ കൈവശവും അനുവദനീയമായ അളവിൽ പാർസലുകൾ കൊടുത്തുവിടാറുണ്ട്. സാമാന്യ മര്യാദയുടെ പേരിൽ പലരും ഇത് നിരസിക്കാറില്ല. എന്നാൽ ഈ സൗമനസ്യം പോലും മയക്കുമരുന്ന് കടത്താനുള്ള വഴിയായി ലഹരി മാഫിയ തിരഞ്ഞെടുക്കുകയാണ്.

മയക്കുമരുന്ന് കടത്താൻ പുതിയ മാർഗങ്ങൾ കണ്ടെത്തുന്നത് എങ്ങനെ തടയാം? നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Drug trafficking attempt in Kannur foiled, three arrested. MDMA and hashish oil found in pickle jar.

#DrugSmuggling #Kannur #KeralaPolice #MDMA #AntiDrugCampaign #PickleParcel