കാഞ്ഞങ്ങാട്ട് ഭാര്യക്ക് വെട്ടേറ്റു; ഭർത്താവിനെ വീടിന് സമീപം മരിച്ച നിലയിൽ കണ്ടെത്തി

കാഞ്ഞങ്ങാട്: (KasargodVartha) കാഞ്ഞങ്ങാട്ട് ഭാര്യക്ക് വെട്ടേറ്റ് അതീവ ഗുരുതരമായി പരിക്കേറ്റതിന് പിന്നാലെ ഭർത്താവിനെ മരിച്ച നിലയിൽ കണ്ടെത്തി. കാഞ്ഞങ്ങാട് കടപ്പുറം ബാവ നഗർ ഇല്യാസ് നഗറിലാണ് നാടിനെ നടുക്കിയ ദാരുണ സംഭവം അരങ്ങേറിയത്. ഭാര്യയെ വെട്ടിക്കൊലപ്പെടുത്താൻ ശ്രമിച്ചതായി സംശയിക്കുന്ന ഭർത്താവിനെയാണ് പിന്നീട് വീട്ടിന് സമീപത്തെ മരത്തിൽ തൂങ്ങി മരിച്ച നിലയിൽ കണ്ടെത്തിയത്.

പുലർച്ചെ കേട്ട ശബ്ദം 

ഇല്യാസ് നഗറിലെ ഇബ്രാഹിം (62) ആണ് മരിച്ചത്. ഭാര്യ മറിയം (55) ഗുരുതര പരിക്കുകളോടെ ആശുപത്രിയിൽ ചികിത്സയിലാണ്. ഫെബ്രുവരി 19 വ്യാഴാഴ്ച പുലർച്ചെ അഞ്ചുമണിയോടെയാണ് സംഭവം പുറംലോകം അറിയുന്നത്. 

അയൽവാസികൾ വീടിനുള്ളിൽ നിന്നുണ്ടായ ശബ്ദം കേട്ട് ശ്രദ്ധിച്ചതോടെയാണ് വിവരം പുറത്തുവന്നത്. വീട്ടിനുള്ളിൽ രക്തക്കറകളോടെ മറിയമിനെ ഗുരുതരമായി പരിക്കേറ്റ നിലയിൽ കണ്ടെത്തുകയായിരുന്നു.

മംഗ്ളൂരിൽ ചികിത്സയിൽ 

മറിയമിന് തലക്കും കഴുത്തിനും ആഴത്തിലുള്ള വെട്ടേറ്റിരുന്നു എന്നാണ് പ്രാഥമിക വിവരം. ഉടൻ തന്നെ നാട്ടുകാർ ഇവരെ ആദ്യം കാഞ്ഞങ്ങാട്ടെ ആശുപത്രിയിലേക്കും പിന്നീട് നില ഗുരുതരമായതിനാൽ വിദഗ്ധ ചികിത്സക്കായി മംഗ്ളൂരിൽ ഉള്ള സ്വകാര്യ ആശുപത്രിയിലേക്കും മാറ്റി. ഇതിനിടെ ഇബ്രാഹിമിനെ കാണാതായതിനെ തുടർന്ന് നാട്ടുകാർ നടത്തിയ തിരച്ചിലിലാണ് വീടിന് സമീപത്തെ മരത്തിൽ ഇദ്ദേഹത്തെ തൂങ്ങിയ നിലയിൽ കണ്ടെത്തിയത്.

കുടുംബപ്രശ്നങ്ങളെന്ന് സംശയം 

വിവരമറിയിച്ചതിനെ തുടർന്ന് ഹൊസ്ദുർഗ് പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്‌മോർട്ടത്തിനായി മാറ്റി. കുടുംബ പ്രശ്നങ്ങളാണ് സംഭവത്തിന് പിന്നിലെന്നാണ് പൊലീസിന്റെ പ്രാഥമിക നിഗമനം. 

സാമ്പത്തിക ബുദ്ധിമുട്ടുകളും വീട്ടിലെ തർക്കങ്ങളും ഉണ്ടായിരുന്നു എന്ന വിവരവും പുറത്ത് വരുന്നുണ്ട്. എന്നാൽ ഇതുസംബന്ധിച്ച ഔദ്യോഗിക സ്ഥിരീകരണം പോലീസിൽ നിന്ന് ലഭ്യമായിട്ടില്ല. പുലർച്ചെയുണ്ടായ ദാരുണ സംഭവത്തിന്റെ പശ്ചാത്തലത്തിൽ പോലീസ് കേസെടുത്ത് വിശദമായ അന്വേഷണം ആരംഭിച്ചു.

സ്വയം ജീവനെടുക്കുന്നത് ഒരു പരിഹാരമല്ല. മാനസിക സമ്മർദ്ദമോ നിരാശയോ അനുഭവപ്പെടുന്നവർ സഹായം തേടണം. 📞 ദിശ ഹെൽപ്പ്‌ലൈൻ: 1056 / 0471-2552056 📞 ടെലിമാനസ്: 14416

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A 62-year-old man in Kanhangad allegedly attacked his wife before ending his life. The wife is in critical condition at a hospital in Mangaluru.

#Kanhangad #KasaragodNews #CrimeNews #KeralaPolice #Tragedy #FamilyDispute #Mangaluru