കാഞ്ഞങ്ങാട്ട് വീണ്ടും അതേ സംഭവം; എട്ടാം ക്ലാസ് വിദ്യാർത്ഥിനിയായ മകളെ പിതാവ് പീഡിപ്പിച്ച് ഗർഭിണിയാക്കി; പ്രതി പൊലീസ് കസ്റ്റഡിയിൽ

കാഞ്ഞങ്ങാട്: (KasargodVartha) എട്ടാം ക്ലാസ് വിദ്യാർത്ഥിനിയായ മകളെ പീഡിപ്പിച്ച് ഗർഭിണിയാക്കിയ പിതാവിനെ പോലീസ് കസ്റ്റഡിയിലെടുത്തു. കാഞ്ഞങ്ങാട്ട് വീണ്ടും സമാനമായ സംഭവം റിപ്പോർട്ട് ചെയ്തത് നാടിനെ നടുക്കിയിരിക്കുകയാണ്.

ഹൊസ്ദുർഗ് പോലീസ് സ്റ്റേഷൻ പരിധിയിലെ 13 വയസ്സുകാരിയാണ് പിതാവിൻ്റെ പീഡനത്തിനിരയായത്. വെള്ളിയാഴ്ച, 2025 ഒക്ടോബർ 3, രാവിലെ നടുവേദനയെ തുടർന്ന് പെൺകുട്ടിയെ കാഞ്ഞങ്ങാട്ടെ ആശുപത്രിയിൽ പ്രവേശിപ്പിക്കുകയായിരുന്നു. തുടർന്ന് നടത്തിയ പരിശോധനയിലാണ് പെൺകുട്ടി നാലുമാസം ഗർഭിണിയാണെന്ന് വ്യക്തമായത്.

സംശയം തോന്നിയ ഡോക്ടർമാർ ഉടൻതന്നെ പോലീസിൽ വിവരമറിയിച്ചു. പോലീസ് എത്തി പെൺകുട്ടിയുടെ മൊഴി രേഖപ്പെടുത്തി. ഇതിൻ്റെ അടിസ്ഥാനത്തിൽ 45 വയസ്സുകാരനായ പിതാവിനെതിരെ പോക്സോ നിയമപ്രകാരം കേസ് രജിസ്റ്റർ ചെയ്യുകയും പ്രതിയെ കസ്റ്റഡിയിലെടുക്കുകയും ചെയ്തു. 

വിശദമായ മൊഴിയെടുത്ത ശേഷം പ്രതിയുടെ അറസ്റ്റ് രേഖപ്പെടുത്തി കോടതിയിൽ ഹാജരാക്കുമെന്ന് പോലീസ് അറിയിച്ചു. മാസങ്ങൾക്ക് മുമ്പ് തന്നെ പിതാവ് വീട്ടിൽ വെച്ച് പീഡിപ്പിച്ചുവെന്നാണ് പെൺകുട്ടി പോലീസിന് നൽകിയ മൊഴി. 

ഭയം കാരണം സംഭവം മാതാവിനോട് പോലും പറഞ്ഞിരുന്നില്ല. അന്യസംസ്ഥാനക്കാരനായ പ്രതിയെ മണിക്കൂറുകൾക്കകം തന്നെ ഹൊസ്ദുർഗ് പോലീസ് പിടികൂടി.

ഇക്കഴിഞ്ഞ ജൂലൈ മാസത്തിലും സമാനമായ സംഭവം കാഞ്ഞങ്ങാട്ട് റിപ്പോർട്ട് ചെയ്തിരുന്നു. അന്ന് 15 വയസ്സുകാരിയായ മകളെ പീഡിപ്പിച്ചതിനെ തുടർന്ന് പെൺകുട്ടി പ്രസവിച്ചിരുന്നു. ഗൾഫിലായിരുന്ന അന്യസംസ്ഥാനക്കാരനായ പ്രതിയെ ഹൊസ്ദുർഗ് പോലീസ് നാട്ടിലേക്ക് വരുത്തി അറസ്റ്റ് ചെയ്ത് ജയിലിൽ അടച്ചിരുന്നു. 

ഇതിന് പിന്നാലെയാണ് മറ്റൊരു പെൺകുട്ടിയും ഗർഭിണിയായ നാടിനെ ഞെട്ടിക്കുന്ന വിവരം പുറത്തുവന്നിരിക്കുന്നത്.

ഈ വാർത്തയെ കുറിച്ചുള്ള നിങ്ങളുടെ അഭിപ്രായം പങ്കുവെക്കുക  

Article Summary: Father arrested in Kanhangad for assaulting and impregnating his minor daughter.

#Kanhangad #POCSO #ChildSafety #HosdurgPolice #Abuse #CrimeNews