നോമ്പ് തുടങ്ങിയ ദിവസം കാഞ്ഞങ്ങാട്ടെ ജനങ്ങൾ ഉണർന്നത് ഞെട്ടിക്കുന്ന വാർത്ത കേട്ട്; ഭാര്യയെ ആക്രമിച്ച ശേഷം ഭർത്താവ് മരിച്ച സംഭവത്തിൽ അന്വേഷണം ശക്തമാക്കി പോലീസ്

കാഞ്ഞങ്ങാട്: (KasargodVaartha) പുണ്യമായ റമദാൻ മാസത്തിലെ ആദ്യ നോമ്പ് ആരംഭിച്ച ദിവസം പുലർച്ചെ കാഞ്ഞങ്ങാട് തീരദേശ മേഖലയെ ഞെട്ടലിലാഴ്ത്തിയത് ദാരുണമായ കുടുംബദുരന്തം. സുബ്ഹി നമസ്കാരത്തിനിടെ ഭാര്യയെ ഇരുമ്പ് പൈപ്പുകൊണ്ട് തലയ്ക്കടിച്ച് പരിക്കേൽപ്പിച്ച ശേഷം ഭർത്താവ് വീടിന് സമീപത്തെ മരത്തിൽ തൂങ്ങിമരിച്ച സംഭവത്തിൽ ഹൊസ്ദുർഗ് പോലീസ് അന്വേഷണം ഊർജ്ജിതമാക്കി.

നിസ്കാര പായയിൽ രക്തക്കറ 

ബാവ നഗർ ഇല്യാസ് നഗറിലെ മറിയമിനാണ് (55) ഗുരുതരമായി പരിക്കേറ്റത്. ഭർത്താവ് കുടക് സ്വദേശിയായ ഇബ്രാഹിം (68) ആണ് മരിച്ചത്. മരംവെട്ടും കൂലിപ്പണിയുമായി കഴിഞ്ഞിരുന്ന ഇബ്രാഹിം പ്രായാധിക്യം കാരണം അടുത്തിടെ ജോലിക്ക് പോയിരുന്നില്ല. 

പുലർച്ചെ സുബ്ഹി നമസ്കാരത്തിനിടെ മറിയം നിസ്കാര പായയിൽ ഇരിക്കുമ്പോഴാണ് ആക്രമണം നടന്നത്. വീടിന് സമീപത്ത് നിന്ന് കണ്ടെത്തിയ ഇരുമ്പ് പൈപ്പാണ് ആക്രമണത്തിന് ഉപയോഗിച്ചതെന്ന് പോലീസ് കണ്ടെത്തി. രണ്ട് ആൺമക്കൾ പള്ളിയിൽ നമസ്കാരത്തിനായി പോയ സമയത്തായിരുന്നു ആക്രമണം. 

മക്കൾ തിരിച്ചെത്തിയപ്പോഴാണ് രക്തത്തിൽ കുളിച്ച നിലയിൽ മാതാവിനെ കണ്ടത്. ഉടൻ മംഗളൂരിലെ സ്വകാര്യ ആശുപത്രിയിലേക്ക് മാറ്റി അടിയന്തര ശസ്ത്രക്രിയ നടത്തിയെങ്കിലും നില അതീവ ഗുരുതരമായി തുടരുകയാണ്.

‘ആക്രമണത്തിന് ശേഷം സ്വയം ജീവനെടുത്തു’ 

കൃത്യം നടത്തിയ ശേഷം സ്ഥലത്ത് നിന്ന് പോയ ഇബ്രാഹിമിനെ വീടിനടുത്ത മരക്കൊമ്പിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. പോലീസ് സ്ഥലത്തെത്തി മൃതദേഹം താഴെയിറക്കി ജില്ലാ ആശുപത്രിയിലേക്ക് മാറ്റി. 

ഇബ്രാഹിം - മറിയം ദമ്പതികൾക്ക് ആറ് മക്കളുണ്ട്. ഇരുവരുടെയും രണ്ടാമത്തെ വിവാഹമായിരുന്നു ഇത്. ദാമ്പത്യത്തിൽ ഏറെക്കാലമായി അസ്വാരസ്യവും തർക്കവും നിലനിന്നിരുന്നുവെന്നാണ് നാട്ടുകാർ പറയുന്നത്.

ആസൂത്രിതമെന്ന് സംശയം 

നോമ്പ് തുടങ്ങുന്നതിന് തലേദിവസം രാത്രി ഇബ്രാഹിം ഭാര്യയെ ഫോണിൽ വിളിച്ച് സംസാരിച്ചപ്പോൾ തർക്കം ഉണ്ടായിരുന്നതായി വിവരമുണ്ട്. അന്ന് പുലർച്ചെ മകളുടെ വീട്ടിൽ നിന്ന് അത്താഴം കഴിച്ച് ഇരുമ്പ് വടിയുമായി ഭാര്യ താമസിക്കുന്ന വീട്ടിൽ എത്തിയതായും പോലീസ് അന്വേഷണത്തിൽ വ്യക്തമായിട്ടുണ്ട്. 'ഭാര്യയെ കൊന്ന് താനും മരിക്കും' എന്ന് രണ്ട് ദിവസം മുൻപ് കൊച്ചുമകനോട് ഇബ്രാഹിം ഭീഷണി മുഴക്കിയിരുന്നതായും ബന്ധുക്കൾ പോലീസിനോട് പറഞ്ഞു.

രണ്ട് കേസുകൾ രജിസ്റ്റർ ചെയ്തു 

മറിയമിൻ്റെ മകന്റെ ഭാര്യ ആഇശത്ത് ഷമീമയുടെ പരാതിയിൽ മരിച്ച ഇബ്രാഹിമിനെതിരെ വധശ്രമത്തിന് കേസ് രജിസ്റ്റർ ചെയ്തു. ഇബ്രാഹിം ആത്മഹത്യ ചെയ്ത സംഭവത്തിൽ മറിയമിന്റെ സഹോദരൻ എ.വി. ബഷീറിന്റെ പരാതിയിൽ മറ്റൊരു കേസും രജിസ്റ്റർ ചെയ്തിട്ടുണ്ട്. മരണത്തിന്റെ യഥാർത്ഥ കാരണങ്ങൾ കണ്ടെത്താൻ പോലീസ് അന്വേഷണം തുടരുകയാണ്.

വാട്സ്ആപ്പ് ഗ്രൂപ്പുകളിലും സോഷ്യൽ മീഡിയയിലും ഈ വാർത്ത പങ്കുവെക്കുമല്ലോ. ഇത്തരം വാർത്തകൾ അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: Kanhangad police are investigating a tragic incident where a man attacked his wife on the first day of Ramadan before ending his life. The wife remains critical.

#Kanhangad #CrimeNews #KasaragodNews #PoliceInvestigation #RamadanTragedy #KeralaPolice #KVARTHA