‘സ്കൂൾ കെട്ടിടത്തിൽ നിന്ന് വീണ് വിദ്യാർഥി മരിച്ചു’; ചോരപ്പാടുകൾ കഴുകി വൃത്തിയാക്കിയ നിലയിൽ

ജയ്‌പൂർ: (KasargodVartha) ജയ്‌പൂരിലെ ഒരു സ്വകാര്യ സ്കൂളിൽ നാലാം ക്ലാസ് വിദ്യാർഥിയെ കെട്ടിടത്തിൽനിന്ന് ചാടി മരിച്ച നിലയിൽ കണ്ടെത്തിയ സംഭവത്തിൽ ദുരൂഹത തുടരുന്നു. നീർജ മോദി സ്കൂളിലെ നാലാം ക്ലാസ് വിദ്യാർഥി അമൈറ (9) ആണ് ശനിയാഴ്ച മരിച്ചത്.

സിസിടിവി ദൃശ്യങ്ങൾ പരിശോധിച്ചതിൽ, കുട്ടി കൈവരിയിലേക്ക് കയറുന്നതും, ഏകദേശം 47 അടി ഉയരമുള്ള കെട്ടിടത്തിന് മുകളിൽനിന്ന് താഴേക്ക് ചാടുന്നതും കാണാമെന്ന് പൊലീസ് അറിയിച്ചു. അടുത്തുള്ള ആശുപത്രിയിൽ ഉടൻ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

വിവരം ലഭിച്ച് മാൻസരോവർ പൊലീസ് സ്ഥലത്തെത്തുമ്പോൾ കുട്ടി വീണുകിടന്ന ഭാഗം ഒരു തുള്ളി ചോര പോലും ഇല്ലാതെ കഴുകി വൃത്തിയാക്കിയ നിലയിലായിരുന്നുവെന്ന് പൊലീസ് പറയുന്നു. മറ്റ് നിർണായകമായ തെളിവുകളൊന്നും സംഭവ സ്ഥലത്ത് നിന്ന് കണ്ടെത്താനായില്ല എന്നും അന്വേഷണ സംഘം വ്യക്തമാക്കി.

മകളുടെ മരണത്തിൽ ദുരൂഹതയുണ്ടെന്നും വിശദമായ അന്വേഷണം ആവശ്യമാണെന്നും കാണിച്ച് മാതാപിതാക്കൾ പൊലീസിൽ പരാതി നൽകി. സ്കൂളിൽ എങ്ങനെയാണ് ഇത്തരമൊരു സംഭവം ഉണ്ടായതെന്നതിൽ വ്യക്തത വരുത്തണം. അധ്യാപകരെയും മറ്റ് ജീവനക്കാരെയും വിശദമായി ചോദ്യം ചെയ്യണമെന്നും മാതാപിതാക്കൾ ആവശ്യപ്പെട്ടു.

സംഭവവുമായി ബന്ധപ്പെട്ട് സ്കൂൾ അധികൃതർ ഇതുവരെ പ്രതികരിച്ചിട്ടില്ല. വ്യക്തമായ മറുപടി നൽകാനോ, ഫോൺ കോളുകൾ എടുക്കാൻ പോലുമോ സ്കൂൾ അധികൃതർ തയ്യാറാകുന്നില്ലെന്ന് ജില്ലാ വിദ്യാഭ്യാസ ഓഫീസർ മാധ്യമങ്ങളോട് അറിയിച്ചു. മാതാപിതാക്കളുടെ പരാതിയുടെ അടിസ്ഥാനത്തിൽ മാൻസരോവർ പൊലീസ് കേസ് എടുത്ത് അന്വേഷണം ഊർജിതമാക്കി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായമെന്താണ്? നിങ്ങളുടെ കൂട്ടുകാരുമായി പങ്കുവെക്കൂ 

Article Summary: Student death at Jaipur school; site cleaned, raising doubts.

#Jaipur #StudentDeath #SchoolMystery #RajasthanNews #PoliceInvestigation #Amaiara