നിരവധി കേസുകളിൽ പ്രതിയായിരുന്ന ഡിക്കി അമ്മി എന്ന അമീർ കുഴഞ്ഞുവീണു മരിച്ചു

ബന്തിയോട്: (KasargodVartha) കേരളത്തിലും കർണ്ണാടകയിലുമായി നിരവധി ക്രിമിനൽ കേസുകളിൽ പ്രതിയായിരുന്ന ഡിക്കി അമ്മി എന്ന അമീർ  (35) കുഴഞ്ഞുവീണ് മരിച്ചു. വെള്ളിയാഴ്ച ഉച്ചയോടുകൂടി വീട്ടിൽ വെച്ച് കുഴഞ്ഞുവീണ  ഉടൻ തന്നെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

അന്ത്യം ആശുപത്രിയിൽ വെച്ച്

കുഴഞ്ഞുവീണ ഡിക്കി അമ്മിയെ ഉടൻ തന്നെ കുമ്പളയിലെ ആശുപത്രിയിലും തുടർന്ന് വിദഗ്ധ ചികിത്സയ്ക്കായി മംഗളൂരിലെ ഹൈലാൻഡ് ആശുപത്രിയിലും എത്തിച്ചു. എന്നാൽ, വെള്ളിയാഴ്ച സന്ധ്യയോടുകൂടി മരണം സ്ഥിരീകരിക്കുകയായിരുന്നു.

വിപുലമായ കേസ് ചരിത്രം

കുപ്രസിദ്ധ ക്രിമിനൽ എന്ന നിലയിൽ അറിയപ്പെട്ടിരുന്ന അമീറിനെതിരെ കേരളത്തിലും കർണ്ണാടകയിലും നിരവധി കേസുകൾ നിലവിലുണ്ടായിരുന്നു. മോഷണം, വീടാക്രമണം, തട്ടിക്കൊണ്ടുപോകൽ, തോക്കു കാട്ടി ഭീഷണിപ്പെടുത്തി പണം തട്ടൽ, മയക്കുമരുന്ന് കടത്ത്, മദ്യക്കടത്ത്, വധശ്രമം തുടങ്ങിയ ഗുരുതരമായ കുറ്റകൃത്യങ്ങളിൽ ഇയാൾ പ്രതിയായിരുന്നു.

കുമ്പള സ്റ്റേഷൻ പരിധിയിൽ മാത്രം 10 കേസുകളിലും, മഞ്ചേശ്വരത്ത് നാല് കേസുകളിലും, കാസർകോട് രണ്ട് കേസുകളിലും അമീർ പ്രതിയായിരുന്നതായി പൊലീസ് പറഞ്ഞു. കൂടാതെ കർണ്ണാടക സംസ്ഥാനത്തും ഇയാളുടെ പേരിൽ കേസുകൾ ഉണ്ടായിരുന്നു.

ഷെയ്ക്ക് അലി- ബീഫാത്തിമ ദമ്പതികളുടെ മകനാണ്. ബുഷറയാണ് ഭാര്യ. നാലു മക്കളുണ്ട്.

Updated..

മരണവാർത്ത ഷെയർ ചെയ്യുക.

Article Summary: Infamous criminal Dicky Ammi (Ameer), accused in multiple cases across Kerala and Karnataka, died after collapsing at home.

#DickyAmmi #Kasaragod #CriminalNews #KeralaPolice #Badiyadka #AmeerDeath