വാടക വീട് കേന്ദ്രീകരിച്ച് പെണ്‍വാണിഭ കേന്ദ്രം; ഒളിവില്‍പോയ കാസര്‍കോട് സ്വദേശിനി എറണാകുളത്ത് അറസ്റ്റില്‍, അറസ്റ്റിലായത് വരാപ്പുഴ പെണ്‍വാണിഭക്കേസിലും പ്രതിയായ മധ്യവയസ്‌ക, കോടതി റിമാന്‍ഡ് ചെയ്തു

കാഞ്ഞങ്ങാട്: (www.kasargodvartha.com 01.11.2018) വാടക വീട് കേന്ദ്രീകരിച്ച് പെണ്‍വാണിഭ കേന്ദ്രം നടത്തിയ കേസില്‍ ഒളിവില്‍പോയ കാസര്‍കോട് സ്വദേശിനി എറണാകുളത്ത് അറസ്റ്റിലായി. കാസര്‍കോട് എസ് പി നഗര്‍ നൂറാ ക്വാര്‍ട്ടേഴ്സില്‍ താമസിക്കുന്ന ഉമ്മാലിയുമ്മ എന്ന ഉമൈബയെ (46) യാണ് പോലീസ് പിടികൂടിയത്. 2017 ജൂണ്‍ 17നാണ് കോട്ടച്ചേരി റെയില്‍വേ ഗേറ്റിന് സമീപത്തെ മരമില്ലിനടുത്ത വാടക വീട്ടില്‍ പോലീസ് റെയ്ഡ് നടത്തിയത്. തുടര്‍ന്ന് ആലപ്പുഴ സ്വദേശി പ്രിസല്‍ കുമാര്‍ എന്ന ഷരീഫ്, മറ്റ് മൂന്ന് സ്ത്രീകള്‍ എന്നിവരെ അറസ്റ്റു ചെയ്തിരുന്നു.

എന്നാല്‍ ഉമൈബ പോലീസിനെ വെട്ടിച്ച് കടന്നുകളയുകയായിരുന്നു. സംസ്ഥാനത്ത് ഏറെ വിവാദമുണ്ടാക്കിയ വരാപ്പുഴ പെണ്‍വാണിഭക്കേസിലും പ്രതിയാണ് ഇവര്‍. വരാപ്പുഴ പെണ്‍വാണിഭക്കേസില്‍ വിചാരണയ്ക്കായി എറണാകുളത്ത് കോടതിയില്‍ ഹാജരായി പുറത്തിറങ്ങിയ ഉമൈബയെ ഹൊസ്ദുര്‍ഗ് പോലീസ് അറസ്റ്റ് ചെയ്യുകയായിരുന്നു. ഹൊസ്ദുര്‍ഗ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.