ഷിറിയ പുഴയിൽ അനധികൃത മണൽഖനനം; ടിപ്പറും അകമ്പടി ബൈക്കും പൊലീസ് പിടികൂടി, ഡ്രൈവറും ഉടമയും റിമാൻഡിൽ

കുമ്പള: (KasargodVartha) ഷിറിയ പുഴയിൽ നിന്ന് അനധികൃതമായി പുഴമണൽ ഖനനം ചെയ്ത് രേഖകളില്ലാതെ കടത്താൻ ശ്രമിച്ച കേസിൽ ലോറി ഡ്രൈവറും ഉടമയും അറസ്റ്റിൽ. വോർക്കാടി ഗ്രാമപഞ്ചായത് പരിധിയിലെ മുഹമ്മദ് അഷ്റഫ്, മംഗൽപാടി ഗ്രാമപഞ്ചായത് പരിധിയിലെ മോഹിൻ ഷിറാസ് എന്നിവരെയാണ് പൊലീസ് അറസ്റ്റ് ചെയ്തത്.

പുലർച്ചെ വാഹനപരിശോധന; ഡ്രൈവർ പിടിയിൽ

2026 സെപ്റ്റംബർ 24 വ്യാഴാഴ്ച പുലർച്ചെ 4.05-ഓടെയാണ് സംഭവം. നൈറ്റ് പട്രോളിങ് ഡ്യൂട്ടിയിലുണ്ടായിരുന്ന കാസർകോട് എഎസ്പി അച്യുത് അശോകിന് മംഗൽപാടി ഷിറിയ പുഴയിൽ നിന്ന് അനധികൃതമായി പുഴമണൽ കടത്തുന്നതായി രഹസ്യവിവരം ലഭിച്ചിരുന്നു.

തുടർന്ന് എഎസ്പിയുടെ നേതൃത്വത്തിലുള്ള പൊലീസ് സംഘം പ്രദേശത്ത് വാഹനപരിശോധന നടത്തുന്നതിനിടെയാണ് കൈകമ്പ ഭാഗത്തുനിന്ന് പൈവളികെ ഭാഗത്തേക്ക് വരികയായിരുന്ന കെഎൽ 56 എ 7246 നമ്പർ ടിപ്പർ ലോറി ശ്രദ്ധയിൽപ്പെട്ടത്. ലോറി നിർത്താൻ പൊലീസ് നിർദേശം നൽകിയതോടെ വാഹനം നിർത്തി. ഇതിനിടെ ലോറിയിൽ നിന്ന് ഇറങ്ങിയോടാൻ ശ്രമിച്ച ഡ്രൈവർ മുഹമ്മദ് അഷ്റഫിനെ എഎസ്പിയും സംഘവും ഓടി പിന്തുടർന്ന് പിടികൂടുകയായിരുന്നു.

യു-ടേൺ എടുക്കാൻ ശ്രമിച്ച ബൈക്കും കുടുങ്ങി

ഇതിനിടെ കൈകമ്പ ഭാഗത്തുനിന്ന് പൈവളികെ ഭാഗത്തേക്ക് ഒരു മോട്ടോർസൈക്കിൾ വരുന്നത് പൊലീസിൻ്റെ ശ്രദ്ധയിൽപ്പെട്ടു. പൊലീസ് സംഘത്തെ കണ്ടതോടെ കെഎ 19 എച്ച് എക്സ് 4501 നമ്പർ മോട്ടോർസൈക്കിൾ തിരിച്ച് യു-ടേൺ എടുക്കാൻ ശ്രമിച്ചു. സംശയം തോന്നിയതിനെ തുടർന്ന് പൊലീസ് സംഘം ഓടിയെത്തി വാഹനം തടഞ്ഞുനിർത്തി യാത്രികനെ ചോദ്യം ചെയ്തു.

വിശദമായ ചോദ്യം ചെയ്യലിലാണ് ഇയാൾ ടിപ്പർ ലോറിയുടെ ഉടമയായ മോഹിൻ ഷിറാസാണെന്നും, ലോറിയെ അകമ്പടി പോയതാണെന്നും വ്യക്തമായത്. തുടർന്ന് മോഹിൻ ഷിറാസിനെയും പൊലീസ് കസ്റ്റഡിയിലെടുക്കുകയായിരുന്നു.

അന്വേഷണം ഊർജിതം

പരിശോധനയിൽ ഷിറിയ പുഴയിൽ നിന്ന് അനധികൃതമായി പുഴമണൽ ഖനനം ചെയ്ത് കടത്തുന്നതിനാണ് ടിപ്പർ ലോറി ഉപയോഗിച്ചതെന്ന് പൊലീസ് കണ്ടെത്തി. മണൽ കടത്തലുമായി ബന്ധപ്പെട്ട രേഖകളൊന്നും ഇവരുടെ പക്കലുണ്ടായിരുന്നില്ല. പുഴമണൽ കടത്താൻ ഉപയോഗിച്ച ടിപ്പർ ലോറിയും അകമ്പടി പോയ മോട്ടോർസൈക്കിളും പൊലീസ് കസ്റ്റഡിയിലെടുത്തു.

സംഭവത്തിന് പിന്നിൽ പ്രവർത്തിച്ച സംഘത്തെക്കുറിച്ച് വിശദമായി അന്വേഷിച്ചുവരികയാണെന്ന് കാസർകോട് എഎസ്പി അച്യുത് അശോക് അറിയിച്ചു. പൊലീസ് നടപടികൾ പൂർത്തിയാക്കിയ ശേഷം ഇരുവരെയും കോടതിയിൽ ഹാജരാക്കി. കോടതി പ്രതികളെ റിമാൻഡ് ചെയ്ത് കാസർകോട് ജില്ലാ ജയിലിൽ പാർപ്പിച്ചു.

കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Kasaragod ASP arrests lorry driver and owner for illegal sand mining at Shiriya.

#KasargodVartha #IllegalSandMining #KasaragodPolice #KumblaNews #CrimeNewsKerala #MalayalamNews #RenuNews