ഹംഗറി വിസ വാഗ്ദാനം ചെയ്ത് 35 ലക്ഷം തട്ടിയെന്ന പരാതി; യുവാവിനെതിരെ റിപ്പോർട്ട് ആവശ്യപ്പെട്ട് കോടതി; അന്വേഷണം തുടങ്ങി പൊലീസ്

ബേക്കൽ: (KasargodVartha) യൂറോപ്യൻ രാജ്യമായ ഹംഗറിയിലേക്ക് ഉയർന്ന ശമ്പളത്തിൽ ജോലി ലഭ്യമാക്കാമെന്ന് വിശ്വസിപ്പിച്ച് നിരവധി പേരിൽ നിന്ന് ലക്ഷക്കണക്കിന് രൂപ കൈപ്പറ്റി തട്ടിപ്പ് നടത്തിയെന്ന പരാതിയിൽ കാഞ്ഞങ്ങാട് ഹോസ്ദുര്‍ഗ് പൊലീസ് സ്റ്റേഷന്‍ പരിധിയിലെ അസ്കർ അബ്ദുല്ല എന്ന അസ്കർ പൊയ്യക്കരയ്‌ക്കെതിരെ കോടതി ബേക്കൽ പൊലീസിനോട് റിപ്പോർട്ട് ആവശ്യപ്പെട്ടു. പരാതിക്കാരില്‍ ഒരാള്‍ ബേക്കല്‍ പൊലീസ് സ്റ്റേഷന്‍ പരിധിലെ താമസക്കാരനായതിനാലാണ് കോടതി ബേക്കല്‍ പൊലീസിനോട് റിപ്പോർട്ട് ആവശ്യപ്പെട്ടത്.

റിപ്പോർട്ട് നൽകാൻ കോടതി നിർദേശം

ഹോസ്ദുർഗ് ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി(രണ്ട്)യുടെ നിർദേശപ്രകാരമാണ് പൊലീസ് അന്വേഷണം നടത്തുന്നത്. വഞ്ചനാക്കുറ്റം ഉൾപ്പെടെയുള്ള വകുപ്പുകൾ പ്രകാരം കേസെടുത്ത് അന്വേഷണം ആവശ്യപ്പെട്ട് ബേക്കൽ സ്വദേശി അബ്ദുൽ റിഷാനും കാഞ്ഞങ്ങാട് തെക്കേപ്പുറം സ്വദേശി അജ്നാസും നൽകിയ സ്വകാര്യ പരാതിയിലാണ് കോടതി പൊലീസിനോട് അന്വേഷണം നടത്തി 2026 ജൂലൈ 14ന് മുൻപായി റിപ്പോർട്ട് നൽകാൻ നിർദേശിച്ചത്.

പരാതിക്കാരുടെ മൊഴിപ്രകാരം, ഹംഗറിയിൽ ആകർഷകമായ ശമ്പളത്തിൽ തൊഴിൽ ലഭ്യമാക്കാമെന്നും വർക്ക് വിസ വേഗത്തിൽ ലഭ്യമാക്കാമെന്നും പറഞ്ഞാണ് ആരോപണവിധേയൻ ഇവരിൽ നിന്നും മറ്റ് ഉദ്യോഗാർഥികളിൽ നിന്നുമായി ലക്ഷക്കണക്കിന് രൂപ വാങ്ങിയത്.

ആർക്കും വിസ ലഭിച്ചില്ല

പരാതിക്കാരായ യുവാക്കൾ തങ്ങളുടെ അടുത്ത സുഹൃത്തുക്കളെയും ബന്ധുക്കളെയും വിശ്വാസത്തിൻ്റെ അടിസ്ഥാനത്തിൽ ഇയാൾക്ക് പരിചയപ്പെടുത്തി നൽകിയിരുന്നു. ഇവരിൽ ഭൂരിഭാഗവും പരാതിക്കാരെ വിശ്വസിച്ചാണ് പണം കൈമാറിയതെന്ന് പരാതിയിൽ പറയുന്നു. എന്നാൽ വാഗ്ദാനം ചെയ്ത സമയത്തിനുള്ളിൽ ആർക്കും വിസ ലഭിച്ചില്ല. തുടർന്ന് ഇയാളോട് വിശദീകരണം തേടിയപ്പോൾ ആറു മുതൽ ഒമ്പത് മാസത്തിനുള്ളിൽ മുഴുവൻ തുകയും തിരികെ നൽകാമെന്ന് ഉറപ്പുനൽകിയതായും പരാതിക്കാർ പറയുന്നു.

എന്നാൽ നിശ്ചയിച്ച സമയപരിധി കഴിഞ്ഞിട്ടും പണം തിരികെ നൽകിയില്ലെന്നും, വിദേശത്തും നാട്ടിലുമായി മാറിമാറി താമസിച്ച് ഇയാൾ പിടികൊടുക്കാതെ നടക്കുകയാണെന്നും പരാതിയിൽ ആരോപിക്കുന്നു.

വ്യാജ വിസ രേഖകൾ

ആരോപണവിധേയൻ്റെ ഉറപ്പുകൾ വിശ്വസിച്ച് കാത്തിരുന്നവർക്കെല്ലാം ഒടുവിൽ സാമ്പത്തിക നഷ്ടം മാത്രമാണ് ഉണ്ടായതെന്നും പരാതിക്കാർ പറയുന്നു. പരാതിക്കാർ പറയുന്നത് അനുസരിച്ച്, വ്യാജവും തെറ്റിദ്ധരിപ്പിക്കുന്നതുമായ വിസ രേഖകളും അനുബന്ധ രേഖകളും കാണിച്ചാണ് വിശ്വാസം നേടിയെടുത്തത്. ഇതിൻ്റെ അടിസ്ഥാനത്തിൽ നിരവധി പേർ പണം കൈമാറിയെന്നും പിന്നീട് രേഖകൾ വ്യാജമാണെന്ന് മനസ്സിലായെന്നും പരാതിയിൽ പറയുന്നു.

തട്ടിപ്പിൻ്റെ ആഘാതം സാമ്പത്തിക നഷ്ടത്തിൽ മാത്രം ഒതുങ്ങിയില്ലെന്നും പരാതിക്കാർ പറയുന്നു. തങ്ങളെ വിശ്വസിച്ച് പണം നൽകിയ ബന്ധുക്കളുടെയും സുഹൃത്തുക്കളുടെയും മുന്നിൽ മറുപടി പറയാൻ കഴിയാത്ത അവസ്ഥയാണ് ഇപ്പോഴുള്ളത്. പണം നഷ്ടപ്പെട്ടവർ നിരന്തരം വീട്ടിലെത്തി പണം ആവശ്യപ്പെടുന്നതിനെ തുടർന്ന് കുടുംബാംഗങ്ങൾ കടുത്ത മാനസിക സമ്മർദ്ദത്തിലാണെന്നും, പ്രായമായ മാതാപിതാക്കൾ ഉൾപ്പെടെ വലിയ സാമൂഹികവും മാനസികവുമായ പ്രതിസന്ധി നേരിടുകയാണെന്നും പരാതിയിൽ വ്യക്തമാക്കുന്നു.

അന്വേഷണം ഊർജിതമാക്കി

സംഭവത്തെ തുടർന്ന് സ്വന്തം ജോലിയും ബിസിനസും മറ്റ് വരുമാന മാർഗങ്ങളും തകരാറിലായെന്നും, സാമ്പത്തികമായും മാനസികമായും വലിയ പ്രതിസന്ധിയിലൂടെയാണ് കടന്നുപോകുന്നതെന്നും പരാതിക്കാരായ യുവാക്കൾ പറയുന്നു.

കോടതിയുടെ നിർദേശപ്രകാരം പൊലീസ് അന്വേഷണം ഊർജിതമാക്കിയിട്ടുണ്ട്. കൂടുതൽ പേർ സമാന രീതിയിൽ തട്ടിപ്പിന് ഇരയായിട്ടുണ്ടോയെന്നും, ഇയാൾക്കെതിരെ മറ്റ് പരാതികളോ കേസുകളോ നിലവിലുണ്ടോയെന്നും പരിശോധിച്ചുവരികയാണ്.

വിസ തട്ടിപ്പുമായി ബന്ധപ്പെട്ട ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: The Hosdurg Judicial First Class Magistrate Court has ordered the Bekal police to investigate and submit a report on a complaint alleging that a Kanhangad native cheated multiple people of around Rs 35 lakh by offering fake work visas to Hungary.

#VisaFraud #KanhangadNews #BekalPolice #KeralaCrime #JobScam #KasaragodNews #RenuNews