റോഡരികിലൂടെ നടന്നുപോവുകയായിരുന്ന വീട്ടമ്മയുടെ സ്വര്‍ണമാല ബൈക്കിലെത്തിയ സംഘം പൊട്ടിച്ചെടുത്ത് കടന്നുകളഞ്ഞു

By Web Desk - MainNov 19, 2019, 13:36 IST

നീലേശ്വരം: (www.kasargodvartha.com 19.11.2019) റോഡരികിലൂടെ നടന്നുപോവുകയായിരുന്ന വീട്ടമ്മയുടെ സ്വര്‍ണമാല ബൈക്കിലെത്തിയ സംഘം പൊട്ടിച്ചെടുത്ത് കടന്നുകളഞ്ഞു. നീലേശ്വരം ഒറ്റപുരയ്ക്കല്‍ മോഹനന്റെ ഭാര്യ സുശീലയുടെ നാലരപവന്‍ സ്വര്‍ണമാലയാണ് നഷ്ടപ്പെട്ടത്. തിങ്കളാഴ്ച്ച വൈകിട്ട് 6.30 മണിയോടെയാണ് സംഭവം. സേവനകേന്ദ്രം ജീവനക്കാരിയാണ് സുശീല.

ജോലി കഴിഞ്ഞ് വീട്ടിലേക്ക് നടന്നുപോവുന്നതിനിടെ നീലേശ്വരം പട്ടേന വളവില്‍ വെച്ചാണ് ബൈക്കിലെത്തിയ രണ്ടംഗ സംഘം സുശീലയുടെ മാല തട്ടിപ്പറിച്ചെടുത്തത്. സംഭവത്തില്‍ സുശീലയുടെ പരാതിയില്‍ നീലേശ്വരം പോലീസ് കേസെടുത്തിട്ടുണ്ട്. പ്രതികളെ കണ്ടെത്താനായി സമീപത്തെ സി സി ടി വി കേന്ദ്രീകരിച്ച് അന്വേഷണം നടത്തിവരികയാണ്.