പൊതുപ്രവർത്തകനെതിരായ നല്ലനടപ്പ് ഉത്തരവ് ഹൈക്കോടതി റദ്ദാക്കി; പൊലീസിനെതിരെ ആരോപണവുമായി കെഎസ് സാലിഹ്

മേൽപ്പറമ്പ്: (KasargodVartha) കീഴൂരിലെ പൊതുപ്രവർത്തകൻ കെ.എസ്. സാലിഹിനെ പൊതുശല്യക്കാരനായി പ്രഖ്യാപിച്ച കാസർകോട് സബ് ഡിവിഷണൽ മജിസ്‌ട്രേറ്റിന്റെ ഉത്തരവ് ഹൈക്കോടതി റദ്ദാക്കി. മേൽപ്പറമ്പ് പൊലീസ് സ്റ്റേഷൻ ഇൻസ്പെക്ടർ എൻ.പി. രാഘവൻ നൽകിയ റിപ്പോർട്ടിന്റെ അടിസ്ഥാനത്തിൽ മജിസ്‌ട്രേറ്റ് ബിനു ജോസഫ് പുറപ്പെടുവിച്ച ഉത്തരവാണ് ജസ്റ്റിസ് സി.എസ്. ഡയസ് റദ്ദാക്കിയത്. ബിഎൻഎസ്എസ് സെക്ഷൻ 126, 129, 130 പ്രകാരം സാലിഹ് ഒരു വർഷത്തേക്ക് നല്ലനടപ്പ് പാലിക്കണമെന്നും ബോണ്ട് നൽകണമെന്നുമായിരുന്നു മജിസ്‌ട്രേറ്റിന്റെ പ്രാഥമിക ഉത്തരവ്.

പഞ്ചായത്ത് തിരഞ്ഞെടുപ്പുമായി ബന്ധപ്പെട്ടുണ്ടായ തർക്കങ്ങളാണ് കേസിനാധാരമെന്നാണ് വിവരം. തിരഞ്ഞെടുപ്പിൽ സ്വതന്ത്ര സ്ഥാനാർത്ഥിയായി മത്സരിച്ച സാലിഹ് പരാജയപ്പെട്ടതിന് പിന്നാലെ, വിജയിച്ച സ്ഥാനാർത്ഥിയുടെ അനുഭാവിയായ അഷറഫ് എന്നയാൾ സാലിയുടെ വീട്ടുപടിക്കൽ എത്തി ഭീഷണിപ്പെടുത്തിയതായി ആരോപണമുണ്ട്. ഇതിനെത്തുടർന്നുണ്ടായ വാക്കുതർക്കത്തിന്റെ പേരിൽ രജിസ്റ്റർ ചെയ്ത രണ്ട് കേസുകൾ ചൂണ്ടിക്കാട്ടിയാണ് പൊലീസ് സാലിക്കെതിരെ റിപ്പോർട്ട് നൽകിയത്. എന്നാൽ, നിയമം അനുശാസിക്കുന്ന നടപടിക്രമങ്ങൾ പാലിക്കാതെയാണ് മജിസ്‌ട്രേറ്റ് ഉത്തരവ് പുറപ്പെടുവിച്ചതെന്ന് ഹൈക്കോടതി നിരീക്ഷിച്ചു.

സാലിക്കെതിരായ പരാതികളുടെ സാരം പ്രാഥമിക ഉത്തരവിൽ വ്യക്തമാക്കിയിട്ടില്ലെന്നും വെറും കേസുകളുടെ രജിസ്ട്രേഷൻ മാത്രം കണക്കിലെടുത്താണ് നടപടിയെന്നും കോടതി ചൂണ്ടിക്കാട്ടി. ഒരാളെ നല്ലനടപ്പിന് വിധിക്കാൻ അടിയന്തരമായ പൊതുസമാധാന ഭീഷണി നിലവിലുണ്ടെന്ന് തെളിയിക്കുന്ന രേഖകൾ വേണമെന്ന് കോടതി വ്യക്തമാക്കി. വെറും ക്രിമിനൽ കേസ് രജിസ്റ്റർ ചെയ്തതുകൊണ്ട് മാത്രം ഒരാളെ നല്ലനടപ്പിന് വിധിക്കാനാകില്ലെന്നും കോടതി നിരീക്ഷിച്ചു.

അതേസമയം, മേൽപ്പറമ്പ് പൊലീസിനെതിരെ ഗുരുതര ആരോപണങ്ങളാണ് സാലിഹ് ഉന്നയിക്കുന്നത്. തിരഞ്ഞെടുപ്പിന് ശേഷമുണ്ടായ പ്രശ്നത്തിൽ താൻ നൽകിയ പരാതിയിൽ കേസെടുക്കാൻ പൊലീസ് തയ്യാറായില്ലെന്നും പിന്നീട് ഉന്നത ഉദ്യോഗസ്ഥരുടെ ഇടപെടലിനെത്തുടർന്നാണ് പരാതി സ്വീകരിച്ചതെന്നും സാലിഹ് ആരോപിക്കുന്നു. എന്നാൽ തനിക്കെതിരെ എതിർകക്ഷി നൽകിയ പരാതിയിൽ ബാഹ്യസമ്മർദ്ദത്തെത്തുടർന്ന് പൊലീസ് അതിവേഗം കൗണ്ടർ കേസ് രജിസ്റ്റർ ചെയ്തതായും ആക്ഷേപമുണ്ട്. വെറും 10 ദിവസത്തിനുള്ളിൽ കുറ്റപത്രം സമർപ്പിച്ചാണ് എസ്എച്ച്ഒ മജിസ്‌ട്രേറ്റിന് റിപ്പോർട്ട് നൽകിയത്.

പൊലീസിന്റെ നടപടി ബാഹ്യസമ്മർദ്ദത്തെത്തുടർന്നാണെന്നും രാഷ്ട്രീയ പ്രേരിതമാണെന്നുമാണ് സാലിയുടെ പക്ഷം. ഹൈക്കോടതി വിധിയിലൂടെ പൊലീസിന്റെ നടപടികൾക്ക് തിരിച്ചടി നേരിട്ടിരിക്കുകയാണ്. മേൽപ്പറമ്പ് എസ്എച്ച്ഒ രാഘവനെതിരെ ജില്ലാ പൊലീസ് ചീഫിനും മനുഷ്യാവകാശ കമ്മീഷനും സാലി പരാതി നൽകിയിട്ടുണ്ട്. കേവലം തിരഞ്ഞെടുപ്പ് വൈരാഗ്യത്തിന്റെ പേരിൽ ഉണ്ടായ തർക്കങ്ങളെ പൊതുസമാധാന ഭീഷണിയായി ചിത്രീകരിച്ച പൊലീസിന്റെ നടപടിക്കെതിരെ വലിയ പ്രതിഷേധമാണ് ഉയർന്നതെന്ന് സാലിഹ് പറയുന്നു.

പുതിയ വാർത്തകൾ / അപ്‌ഡേറ്റുകൾ ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക.

ഈ വാർത്ത സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.
 

Article Summary: High Court quashed the Sub-Divisional Magistrate's order against activist K.S. Sali, citing procedural lapses and lack of evidence for a public peace threat.
 

#HighCourt #KeralaPolice #Kasaragod #LegalNews #Melparamba #HumanRights #PoliceBias #BNSS