ചെറുവത്തൂരിലെ നീലഗിരി ഹോട്ടലിൽ അപകടം: ഷോക്കേറ്റ് തൊഴിലാളി മരിച്ചു

ചെറുവത്തൂർ: (KasargodVartha) നീലഗിരി ഹോട്ടലിൽ ഗ്രൈൻഡർ ഉപയോഗിക്കുന്നതിനിടെ അതിഥി തൊഴിലാളിയെ മരിച്ച നിലയിൽ കണ്ടെത്തി. പൊറോട്ട മേക്കർ ആയ അസ്സാം സ്വദേശി ദിൽവർ ഹുസൈൻ (25) ആണ് മരിച്ചത്. ചൊവ്വാഴ്ച ഉച്ചയ്ക്ക് 1.05 മണിയോടെയാണ് അപകടം നടന്നത്. ഇയാൾ ഹോട്ടലിൽ പൊറോട്ട മേക്കറായി ജോലി ചെയ്തുവരികയായിരുന്നു.

ഗ്രൈൻഡർ ഉപയോഗിച്ചുകൊണ്ടിരിക്കെ യുവാവിന് ഷോക്കേറ്റതാണെന്ന് പ്രാഥമികമായി സംശയിക്കുന്നു. അപകടമുണ്ടായ ഉടൻ തന്നെ അദ്ദേഹത്തെ ചെറുവത്തൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

അതേസമയം, ഹൃദയാഘാതമാണ് മരണകാരണമെന്ന് ഹോട്ടൽ അധികൃതർ വിശദീകരിക്കുന്നു. മൃതദേഹം ഇൻക്വസ്റ്റ് നടപടികൾക്ക് ശേഷം പോസ്റ്റ്മോർട്ടത്തിനായി പരിയാരം മെഡിക്കൽ കോളജ് ആശുപത്രിയിലേക്ക് മാറ്റി. സംഭവത്തിൽ ചന്തേര പൊലീസ് അന്വേഷണം ആരംഭിച്ചു. പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷമേ യഥാർത്ഥ മരണകാരണം വ്യക്തമാകൂ എന്ന് പൊലീസ് അറിയിച്ചു.

ഈ വാർത്ത മറ്റുള്ളവരിലേക്കും ഷെയർ ചെയ്യുക. 

Article Summary: Guest worker Dilwar Hussain from Assam found dead at Nilgiri Hotel, Cheruvathur while using a grinder.

#Cheruvathur #Kasaragod #Accident #KeralaPolice #GuestWorker #HotelDeath