കഞ്ചാവ് കേസ്: ഒളിവിൽ പോയ രണ്ടാമത്തെ പ്രതിയും പിടിയിൽ

ചട്ടഞ്ചാൽ: (KasargodVartha) കഞ്ചാവ് കടത്ത് കേസിൽ ഒളിവിൽ പോയ രണ്ടാമത്തെ പ്രതിയും അറസ്റ്റിൽ. മംഗളുരു ഉൾപ്പെടെയുള്ള സ്ഥലങ്ങളിൽ കുടുംബ ഹോട്ടൽ ബിസിനസ് ശൃംഖല നടത്തുന്നയാളുടെ വീട്ടിൽ നിന്നും 11 കിലോ കഞ്ചാവ് പിടികൂടിയ കേസിലാണ് ഈ അറസ്റ്റ്. മേൽപ്പറമ്പ് പോലീസ് സ്റ്റേഷൻ പരിധിയിലെ മുനീർ (38) ആണ് കോഴിക്കോടുള്ള ഒരു ലോഡ്ജിൽ നിന്ന് പിടിയിലായതെന്ന് പൊലീസ് പറഞ്ഞു.

നേരത്തെ, ഇയാളുടെ സഹോദരനും ഹോട്ടലിലെ പങ്കാളിയുമായ സമീറിനെ (35) മേൽപ്പറമ്പ് പോലീസ് അറസ്റ്റ് ചെയ്തിരുന്നു. ഒരു മാസത്തോളം ഒളിവിൽ കഴിഞ്ഞിരുന്ന മുനീറിനെ ടവർ ലൊക്കേഷൻ പിന്തുടർന്നാണ് പോലീസ് കണ്ടെത്തിയത്. കോഴിക്കോട്ടെ ലോഡ്ജിൽ ഇയാൾ ഒളിച്ച് താമസിക്കുകയായിരുന്നെന്ന് പൊലീസ് അറിയിച്ചു.

മേൽപ്പറമ്പ് പോലീസ് ഇൻസ്‌പെക്ടർ എ. സന്തോഷ് കുമാറിന്റെയും എസ്.ഐ. വി.കെ. അനീഷിന്റെയും നേതൃത്വത്തിലുള്ള സംഘമാണ് രഹസ്യ വിവരത്തെ തുടർന്ന് റെയ്ഡ് നടത്തിയത്. 

രാത്രി 10 മണിയോടെ ഹോട്ടൽ ഉടമയുടെ വീട്ടിൽ നടത്തിയ പരിശോധനയിൽ കിടപ്പുമുറിയുടെ തട്ടിൻമുകളിൽ ചാക്കുകളിലും കാർഡ്‌ബോർഡ് പെട്ടികളിലുമായി ഒളിപ്പിച്ച നിലയിൽ 11.190 കിലോഗ്രാം കഞ്ചാവ് കണ്ടെത്തുകയായിരുന്നു. അറസ്റ്റിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയുംചെയ്യുക

Article Summary: Second accused in 11 kg ganja case arrested from Kozhikode.

#GanjaCase #DrugBust #KeralaPolice #KozhikodeArrest #MelparambaPolice #CrimeNews