കാസർകോട് നെല്ലിക്കുന്നിൽ മധ്യവയസ്കനെ തടഞ്ഞുനിർത്തി കവർച്ച: പ്രായപൂർത്തിയാകാത്തവർ ഉൾപ്പെടെ നാലുപേർ കസ്റ്റഡിയിൽ

കാസർകോട്: (KasargodVartha) നെല്ലിക്കുന്നിൽ മധ്യവയസ്കനെ തടഞ്ഞുനിർത്തി ഭീഷണിപ്പെടുത്തി പണം പിടിച്ചുപറിച്ച സംഭവത്തിൽ കാസർകോട് പൊലീസ് പ്രായപൂർത്തിയാകാത്ത രണ്ട് കുട്ടികൾ അടക്കം നാലുപേരെ കസ്റ്റഡിയിലെടുത്തു. ബുധനാഴ്ച രാത്രി ഒൻപതരയോടെയാണ് സംഭവം നടന്നത്.

ആലംപാടി മിഹ്റാജ് മൻസിലിൽ ഖമറുദ്ദീൻ പി.എം. (57) എന്നയാളെയാണ് നാലംഗ സംഘം തടഞ്ഞുനിർത്തി കവർച്ച നടത്തിയതെന്ന് പരാതിയിൽ പറയുന്നു. നെല്ലിക്കുന്നിൽ വെച്ച് ഖമറുദ്ദീനെ വഴിയിൽ തടഞ്ഞ പ്രതികൾ കൊല്ലുമെന്ന് ഭീഷണിപ്പെടുത്തി പേഴ്സും എടിഎം കാർഡും പിടിച്ചുപറിക്കുകയായിരുന്നു. 

പേഴ്സിലുണ്ടായിരുന്ന 2,000 രൂപയും എടിഎം കാർഡിന്റെ പിൻ നമ്പർ ചോദിച്ചുവാങ്ങി അക്കൗണ്ടിൽ നിന്ന് പിൻവലിച്ച 99,000 രൂപയും ഉൾപ്പെടെ ആകെ 1,01,000 രൂപ കവർന്നതായാണ് പരാതി. സംഭവവുമായി ബന്ധപ്പെട്ട് കാസർകോട് പൊലീസ് വ്യാഴാഴ്ച രാവിലെ ഭാരതീയ ന്യായസംഹിത (ബിഎൻഎസ്) 2023ലെ 309(4), 3(5) വകുപ്പുകൾ പ്രകാരം കേസ് രജിസ്റ്റർ ചെയ്തു. പിന്നാലെ പ്രതികളെ കസ്റ്റഡിയിലെടുത്തു. 

റെയ്‌സ് (18), കബീർ (18), ആദിൽ (18),  എന്നിവരെയാണ് പൊലീസ് അറസ്റ്റ് ചെയ്തത്. ഇവരോടൊപ്പം ഒരു പ്രായപൂർത്തിയാകാത്ത കൗമാരക്കാരനെയും കസ്റ്റഡിയിലെടുത്തിട്ടുണ്ട്. പ്രതികളെ കോടതിയിൽ ഹാജരാക്കി തുടർനടപടികൾ സ്വീകരിച്ചു. എസ്‌ഐ നെജിൽ രാജ് എം.യുടെ നേതൃത്വത്തിലാണ് കവർച്ചാ കേസിൽ അന്വേഷണം പുരോഗമിക്കുന്നത്.

ഈ വാർത്ത ഷെയർ ചെയ്യൂ. 

Article Summary: Kasaragod police detained four people, including two minors, for robbing a middle-aged man in Nellikunnu.

#KasaragodNews #NellikunnuRobbery #CrimeNews #PoliceAction #KeralaPolice #BNSCase