പ്രാങ്കല്ല, ക്രൂരത; മകളെ മർദ്ദിച്ച പിതാവിനെ ഒടുവിൽ പൊലീസ് പിടികൂടി

കണ്ണൂർ: (KasargodVartha) ചെറുപുഴ പ്രാപ്പൊയിലിൽ സ്വന്തം മകളെ അതിക്രൂരമായി മർദ്ദിച്ച പിതാവിനെ പൊലീസ് കസ്റ്റഡിയിലെടുത്തു. കാസർകോട് ചിറ്റാരിക്കൽ സ്വദേശി ജോസിനെയാണ് ചെറുപുഴ പൊലീസ് കസ്റ്റഡിയിലെടുത്തത്. ജില്ലാ പൊലീസ് മേധാവി അനൂജ് പലിവാൾ ഐ.പി.എസ്സിന്റെ നിർദേശത്തെ തുടർന്നാണ് പൊലീസ് നടപടി. നേരത്തെ, ജോസ് മകളെ മർദ്ദിക്കുന്നതിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ പ്രചരിച്ചിരുന്നു.

ഈ ദൃശ്യങ്ങൾ ശ്രദ്ധയിൽപ്പെട്ടിട്ടും പൊലീസ് കേസെടുക്കാൻ വൈകിയത് വിമർശനങ്ങൾക്ക് ഇടയാക്കിയിരുന്നു. ബാലാവകാശ കമ്മീഷൻ സംഭവത്തിൽ അടിയന്തരമായി ഇടപെടുകയും ചൈൽഡ് ലൈൻ പ്രവർത്തകരോട് കുട്ടിയുടെ വീട്ടിലെത്താൻ നിർദേശിക്കുകയും ചെയ്തു. കമ്മീഷൻ ചെയർപേഴ്സൺ കെ.വി. മനോജ് സംഭവത്തെക്കുറിച്ച് പൊലീസിൽ നിന്ന് റിപ്പോർട്ട് തേടിയിട്ടുണ്ട്. ജോസ് ചെറുപുഴയിൽ വാടകയ്ക്ക് താമസിക്കുകയായിരുന്നു.

അതേസമയം, ഭാര്യയെ തിരികെ കൊണ്ടുവരാനുള്ള ഒരു ‘പ്രാങ്ക്’ വീഡിയോ ആയിരുന്നു ഇതെന്ന ജോസിന്റെ വിശദീകരണം പൊലീസ് ആദ്യം വിശ്വസിച്ചിരുന്നു. എന്നാൽ പിന്നീട് നടത്തിയ അന്വേഷണത്തിൽ ഇത് യാഥാർത്ഥ്യമാണെന്ന് തെളിഞ്ഞു.

കുട്ടി കരയുന്നതും തന്നെ ഉപദ്രവിക്കരുതെന്ന് പറയുന്നതും വീഡിയോയിൽ വ്യക്തമായി കേൾക്കാമായിരുന്നു. സംഭവം വിവാദമായതിനെ തുടർന്നാണ് പൊലീസ് അറസ്റ്റ് നടപടിയുമായി രംഗത്തുവന്നത്. ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തുമെന്ന് പൊലീസ് അറിയിച്ചു.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. കൂടുതൽ
 

Summary: A father in Cherupuzha, Kannur, was arrested for brutally beating his daughter after a video of the assault went viral. Initial claims of it being a 'prank' were disproven.

#KeralaCrime #ChildAbuse #Kannur #PoliceAction #ViralVideo #Cherupuzha