മട്ടന്നൂരിലെ ഡോക്ടറെ കബളിപ്പിച്ച് 4.43 കോടി തട്ടിയെടുത്ത കേസിൽ ഒരാൾ പിടിയിൽ
● വാട്സ്ആപ്പ് വഴിയുള്ള ഓൺലൈൻ ഷെയർ ട്രേഡിംഗിലൂടെയാണ് തട്ടിപ്പ് നടത്തിയത്.
● എറണാകുളം സ്വദേശിയായ സൈനുൽ ആബിദിൻ എന്നയാളെയാണ് അറസ്റ്റ് ചെയ്തത്.
● 'വെൽത്ത് പ്രോഫിറ്റ്' എന്ന വ്യാജ പ്ലാനിലൂടെയാണ് തട്ടിപ്പ് നടത്തിയത്.
● മറ്റ് പ്രതികളെ നേരത്തെ ചെന്നൈയിൽ വെച്ച് അറസ്റ്റ് ചെയ്തിരുന്നു.
കണ്ണൂർ: (KasargodVartha) വ്യാജ ഓൺലൈൻ ട്രേഡിംഗ് വഴി മട്ടന്നൂർ സ്വദേശിയായ ഡോക്ടറുടെ 4 കോടി 43 ലക്ഷം രൂപ തട്ടിയെടുത്ത കേസിൽ മുഖ്യപ്രതി അറസ്റ്റിൽ. വാട്സ്ആപ്പ് വഴി പരിചയപ്പെട്ട് ഓൺലൈൻ ഷെയർ ട്രേഡിംഗിലൂടെ മികച്ച വരുമാനം ഉണ്ടാക്കാമെന്ന് പറഞ്ഞ് കണ്ണൂർ മട്ടന്നൂർ സ്വദേശിയായ ഡോക്ടറിൽ നിന്ന് 4,43,20,000 രൂപ തട്ടിയെടുത്ത കേസിലാണ് എറണാകുളം സ്വദേശിയായ സൈനുൽ ആബിദിൻ (41) എന്നയാളെ കണ്ണൂർ സിറ്റി സൈബർ ക്രൈം പോലീസ് അറസ്റ്റ് ചെയ്തത്. എറണാകുളത്ത് വെച്ചാണ് ഇയാളെ പോലീസ് പിടികൂടിയത്.
ഷെയർ ട്രേഡിംഗ് നടത്തുന്നതിനായി പ്രതികൾ ഉൾപ്പെട്ട ഒരു വാട്സ്ആപ്പ് ഗ്രൂപ്പിലൂടെ പരാതിക്കാരനെ അപ്സ്റ്റോക്സ് (upstox) എന്ന കമ്പനിയുടെ 'വെൽത്ത് പ്രോഫിറ്റ്' പ്ലാൻ സ്കീമിലൂടെ വലിയ ലാഭം ലഭിക്കുമെന്ന് വിശ്വസിപ്പിച്ചു. തുടർന്ന്, വാട്സ്ആപ്പ് വഴിയുള്ള നിർദേശങ്ങൾക്കനുസരിച്ച് വിവിധ ബാങ്ക് അക്കൗണ്ടുകളിലേക്ക് പണം നിക്ഷേപിക്കുകയായിരുന്നു. ഓരോ തവണ നിക്ഷേപം നടത്തുമ്പോഴും വ്യാജ ട്രേഡിംഗ് ആപ്ലിക്കേഷനിൽ വലിയ ലാഭം കാണിച്ചിരുന്നു. എന്നാൽ, പരാതിക്കാരൻ പണം പിൻവലിക്കാൻ ശ്രമിച്ചപ്പോൾ പല സാങ്കേതിക കാരണങ്ങളും പറഞ്ഞ് വീണ്ടും പണം ആവശ്യപ്പെടുകയായിരുന്നു. ഇതോടെയാണ് ഇത് ഒരു തട്ടിപ്പാണെന്ന് മനസ്സിലായത്.
ചെന്നൈ സ്വദേശിയായ സെന്തിൽ കുമാർ എന്നയാളുടെ അക്കൗണ്ടിൽ വന്ന 44 ലക്ഷം രൂപ എടിഎം വഴിയും ഓൺലൈൻ ട്രാൻസാക്ഷൻ വഴിയും കൈകാര്യം ചെയ്തത് ആബിദാണ്. അക്കൗണ്ട് ട്രാൻസാക്ഷനുമായി ബന്ധപ്പെട്ട ഒടിപി ഷെയർ ചെയ്തിരുന്നതും ഇയാൾ തന്നെ.
കേസിൽ ഉൾപ്പെട്ട മറ്റ് പ്രതികളായ മഹബൂബാഷ ഫാറൂഖ്, റിജാസ് എന്നിവരെ പോലീസ് നേരത്തെ ചെന്നൈയിൽ വെച്ച് അറസ്റ്റ് ചെയ്തിരുന്നു.
ആബിദിന്റെ പേരിൽ വിശാഖപട്ടണത്ത് ഒരു കേസും നിലവിലുണ്ട്. മറ്റൊരു കേസിൽ ഇയാളെ കണ്ണൂർ റൂറൽ സൈബർ ക്രൈം പോലീസ് സ്റ്റേഷൻ അറസ്റ്റ് ചെയ്ത് റിമാൻഡ് ചെയ്യുകയും പിന്നീട് ജാമ്യം ലഭിക്കുകയും ചെയ്തിരുന്നു.
കണ്ണൂർ റേഞ്ച് ഡിഐജി യതീഷ് ചന്ദ്ര ജി. ഐപിഎസ്സിന്റെ നിർദ്ദേശപ്രകാരം കണ്ണൂർ സിറ്റി പോലീസ് കമ്മീഷണർ നിധിൻരാജ് പി. ഐപിഎസ്സിന്റെ മേൽനോട്ടത്തിൽ അസിസ്റ്റന്റ് കമ്മീഷണർ ഓഫ് പോലീസ് ജേക്കബ് എം.ടി, ഇൻസ്പെക്ടർ ഓഫ് പോലീസ് മഹേഷ് കണ്ടബേത്ത്, എസ്.ഐ. പ്രജീഷ് ടി.പി, എസ്.ഐ. (ജി) ഉദയകുമാർ, എ.എസ്.ഐ. പ്രകാശൻ വി.വി, എസ്.സി.പി.ഒ ജിതിൻ സി, സി.പി.ഒ സുഡാൻ എന്നിവരടങ്ങിയ സംഘമാണ് കേസ് അന്വേഷിച്ചത്.
എസ്.ഐ. പ്രജീഷ് ടി.പി, എ.എസ്.ഐ. പ്രകാശൻ വി.വി, എസ്.സി.പി.ഒ ജിതിൻ സി, സി.പി.ഒ സുനിൽ എന്നിവരടങ്ങിയ സംഘമാണ് പ്രതിയെ എറണാകുളത്ത് വെച്ച് അറസ്റ്റ് ചെയ്തത്.
ഓൺലൈൻ തട്ടിപ്പുകളെക്കുറിച്ച് അവബോധം നൽകാൻ ഈ വാർത്ത ഷെയർ ചെയ്യൂ.
Article Summary: Key accused in a Rs 4.43 crore online trading scam arrested by Kannur Police.
#OnlineScam #CyberCrime #KannurPolice #TradingFraud #DoctorScam #KeralaNews
