‘50,000 രൂപ വിലമതിക്കുന്ന ഇലക്ട്രിക് വയറുകൾ കവര്‍ന്നു’; കോൺഗ്രസ് നേതാവും എം എൽ എയുമായ മാത്യു കുഴൽനാടൻ്റെ നിർമ്മാണം നടക്കുന്ന വീട്ടിൽ മോഷണം; പൊലീസ് കേസെടുത്തു

കൊച്ചി: (KasargodVartha) മൂവാറ്റുപുഴ എംഎൽഎ മാത്യു കുഴൽനാടൻ്റെ വീട്ടിൽ മോഷണം നടന്നതായി പരാതി. പൈങ്ങോട്ടൂരിൽ നിർമാണത്തിലിരിക്കുന്ന വീട്ടിലാണ് മോഷണം നടന്നത്. വീടിൻ്റെ ഇലക്ട്രിക് ബോർഡിലേക്ക് കണക്ട് ചെയ്ത വയറുകളാണ് മോഷണം പോയത്.

2026 സെപ്റ്റംബർ 13 ഞായറാഴ്ച നടന്ന സംഭവത്തിൽ പോത്താനിക്കാട് പൊലീസ് കേസെടുത്തു. കണ്ടാലറിയുന്ന ഒരാളെ പ്രതിയാക്കിയാണ് എഫ്ഐആർ രജിസ്റ്റർ ചെയ്തിരിക്കുന്നത്.

50,000 രൂപയുടെ നഷ്ടം

സെപ്റ്റംബർ 13 ഞായറാഴ്ച വൈകുന്നേരം 6:30-നും 7:00-നും ഇടയിലാണ് മോഷണം നടന്നത്. 50,000 രൂപ വിലമതിക്കുന്ന ഇലക്ട്രിക് വയറുകളാണ് മോഷണം പോയതെന്നാണ് എഫ്ഐആറിൽ വ്യക്തമാക്കിയിരിക്കുന്നത്. സംഭവത്തിൽ ഫ്രെഡി എൽദോസ് (32) എന്നയാളാണ് പൊലീസിന് പരാതി നൽകിയത്.

പരാതി ലഭിച്ചയുടൻ തന്നെ പൊലീസ് സ്ഥലത്തെത്തി വിവരശേഖരണം നടത്തുകയും വിരലടയാളം ഉൾപ്പെടെയുള്ള തെളിവുകൾ ശേഖരിക്കുകയും ചെയ്തിരുന്നു.

അന്വേഷണം ഊർജിതമാക്കി

സംഭവത്തിൽ ഇതുവരെ ആരെയും കസ്റ്റഡിയിലെടുത്തിട്ടില്ലെന്നും അന്വേഷണം തുടരുന്നതായും പൊലീസ് അറിയിച്ചു. ബിഎൻഎസ്എസ് സെക്ഷൻ 329(3), 305(a) എന്നീ വകുപ്പുകൾ പ്രകാരമാണ് പോത്താനിക്കാട് പൊലീസ് കേസ് എടുത്തിരിക്കുന്നത്.

സബ് ഇൻസ്പെക്ടർ സി ആർ രഞ്ചുമോളാണ് കേസ് അന്വേഷിക്കുന്നത്. പ്രദേശത്തെ സിസിടിവി ദൃശ്യങ്ങൾ ഉൾപ്പെടെ കേന്ദ്രീകരിച്ച് അന്വേഷണം പുരോഗമിക്കുന്നു.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Electric wires worth Rs 50000 stolen from MLA Mathew Kuzhalnadan's house.

#MathewKuzhalnadan #MuvattupuzhaMLA #KochiNews #KeralaPolice #TheftCase #RenuNews