വയോധികയെ കൊലപ്പെടുത്തി സ്വർണം കവർന്ന കേസ്; 24 മണിക്കൂറിനകം പ്രതി വലയിൽ; പിടിയിലായത് കാടുവെട്ട് തൊഴിലാളി; ലക്ഷ്യമിട്ടത് 4 പവൻ മാല
● കഴുത്ത് ഞെരിച്ചും വായയും മൂക്കും പൊത്തിപ്പിടിച്ചും ശ്വാസം മുട്ടിച്ചാണ് കൊലപ്പെടുത്തിയതെന്ന് പോസ്റ്റ്മോർട്ടം റിപ്പോർട്ട്.
● വെള്ളിയാഴ്ച രാത്രി ഏഴ് മണിയോടെയാണ് ബദിയടുക്ക പോലീസ് പ്രതിയുടെ അറസ്റ്റ് രേഖപ്പെടുത്തിയത്.
● ബുധനാഴ്ച രാത്രി 9.40-ഓടെയാണ് വീട്ടമ്മയെ മരിച്ച നിലയിൽ കണ്ടെത്തിയത്.
● നാട്ടുകാർ നൽകിയ വിവരത്തിന്റെ അടിസ്ഥാനത്തിലാണ് പോലീസ് പ്രതിയിലേക്ക് എത്തിയത്.
ബദിയടുക്ക: (KasargodVartha) കുംബഡാജെ മൗവ്വാർ അജിലയിൽ വീട്ടിൽ ഒറ്റയ്ക്ക് താമസിച്ചിരുന്ന വയോധികയെ കൊലപ്പെടുത്തിയ കേസിൽ പ്രതിയെ 24 മണിക്കൂറിനകം പിടികൂടി ബദിയടുക്ക പോലീസ്. കാടുവെട്ട് യന്ത്രം ഉപയോഗിച്ച് ജോലി ചെയ്യുന്ന തൊഴിലാളിയും ബദിയടുക്ക പൊലീസ് സ്റ്റേഷൻ പരിധിയിലെ താമസക്കാരനുമായ പരമേശ്വര എന്ന രമേശ് നായിക് (46) ആണ് അറസ്റ്റിലായത്. വെള്ളിയാഴ്ച രാത്രി ഏഴ് മണിയോടെയാണ് ഇയാളുടെ അറസ്റ്റ് രേഖപ്പെടുത്തിയത്.
സംഭവം ഇങ്ങനെ
ബുധനാഴ്ച രാത്രി 9.40-ഓടെയാണ് പുഷ്പലത വി. ഷെട്ടിയെ (70) വീട്ടിൽ മരിച്ച നിലയിൽ കണ്ടെത്തിയത്. ഒറ്റയ്ക്ക് താമസിക്കുന്ന വയോധികയായതിനാൽ പോലീസിന് ആദ്യഘട്ടത്തിൽ തന്നെ സംശയമുണ്ടായിരുന്നു. വെള്ളിയാഴ്ച ഉച്ചയോടെ പരിയാരം കണ്ണൂർ ഗവ. മെഡിക്കൽ കോളേജിൽ നടന്ന പോസ്റ്റ്മോർട്ടം പരിശോധനയിലാണ് മരണം കൊലപാതകമാണെന്ന് സ്ഥിരീകരിച്ചത്. കഴുത്ത് ഞെരിച്ചും വായയും മൂക്കും പൊത്തിപ്പിടിച്ചുമാണ് കൊലപ്പെടുത്തിയതെന്ന് റിപ്പോർട്ടിൽ വ്യക്തമായി.
മാലയ്ക്ക് വേണ്ടി ക്രൂരത
പുഷ്പലതയുടെ കഴുത്തിലുണ്ടായിരുന്ന നാലു പവൻ തൂക്കമുള്ള കരിമണി മാല കൈക്കലാക്കുന്നതിന് വേണ്ടിയാണ് കൊലപാതകം നടത്തിയതെന്ന് പ്രതി പോലീസിനോട് സമ്മതിച്ചു. കൃത്യത്തിന് ശേഷം പ്രതി സ്വർണ്ണവുമായി കടന്നുകളയുകയായിരുന്നു. കവർച്ച ചെയ്ത സ്വർണ്ണം ഒളിപ്പിച്ചുവെച്ച സ്ഥലം പ്രതി പോലീസിന് കാണിച്ചുകൊടുത്തിട്ടുണ്ട്.
അന്വേഷണം വഴിത്തിരിവായത് ഇങ്ങനെ
കൊലപാതകമാണെന്ന് ഉറപ്പായതോടെ ബദിയടുക്ക ഇൻസ്പെക്ടർ എ. സന്തോഷ് കുമാറിന്റെ നേതൃത്വത്തിൽ പോലീസ് ഊർജ്ജിത അന്വേഷണം ആരംഭിച്ചു. പ്രദേശത്ത് കാടുവെട്ട് യന്ത്രം ഉപയോഗിച്ച് ജോലി ചെയ്തിരുന്ന രമേശിനെക്കുറിച്ച് നാട്ടുകാർ നൽകിയ ചില നിർണ്ണായക വിവരങ്ങളാണ് പോലീസിനെ പ്രതിയിലേക്ക് എത്തിച്ചത്. ഉച്ചയോടെ ഇയാളെ കസ്റ്റഡിയിലെടുത്ത് വിശദമായി ചോദ്യം ചെയ്തതോടെ പ്രതി കുറ്റം സമ്മതിക്കുകയായിരുന്നു.
പോലീസ് സർജൻ ഉൾപ്പെടെയുള്ള വിദഗ്ധർ സംഭവസ്ഥലം സന്ദർശിച്ച് തെളിവുകൾ ശേഖരിച്ചിരുന്നു. നടപടിക്രമങ്ങൾ പൂർത്തിയാക്കി പ്രതിയെ കോടതിയിൽ ഹാജരാക്കും. വയോധികയുടെ കൊലപാതകം പ്രദേശത്ത് വലിയ ഭീതിയും ഞെട്ടലും ഉളവാക്കിയിരുന്നു. പ്രതിയെ അതിവേഗം പിടികൂടാനായത് പോലീസിന് നേട്ടമായി.
ഡിവൈഎസ്പി സികെ സുനിൽകുമാർ, ഇൻസ്പെകർ എ സന്തോഷ് കുമാർ, എസ് ഐ സവ്യസാചി, എസ് ഐ പ്രസാദ്, എ എസ് ഐ പ്രസാദ്, സീനിയർ സിവിൽ പൊലീസ് ഓഫീസർ ഗോകുല, ശ്രീജിത്ത്, ശശികുമാർ, ദിനേശ, ചന്ദകാന്ത, സിവിൽ പൊലീസ് ഓഫീസർമാരായ ശ്രുതി, ശ്രീനേഷ് എന്നിവരടങ്ങുന്ന പൊലിസ് സംഘമാണ് പ്രതിയെ അറസ്റ്റ് ചെയ്തത്
ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.
Article Summary: Badiyadukka Police arrested Ramesh Naik (46) within 24 hours for the murder of 70-year-old Pushpalatha V. Shetty. The motive was to steal her gold chain.
#Kasaragod #Badiyadukka #MurderCase #PoliceArrest #CrimeNews #KeralaPolice
