വിദേശ ഫണ്ട് ക്രമക്കേട്: കാസർകോട്ടെ കുണിയ ട്രസ്റ്റിനെതിരെ ഇ ഡി ഫെമ കേസ് രജിസ്റ്റർ ചെയ്തു; 220 കോടി രൂപയുടെ ദുരൂഹ ഇടപാടുകൾ നടന്നതായി ആരോപണം

കാസർകോട്: (KasargodVartha) കുണിയ ആസ്ഥാനമായുള്ള കുഞ്ഞഹമ്മദ് മുസ്ലിയാർ മെമ്മോറിയൽ ട്രസ്റ്റിനും അതിന്റെ ചെയർമാൻ ഇബ്രാഹിം അഹമ്മദ് അലിക്കുമെതിരെ ഫോറിൻ എക്സ്ചേഞ്ച് മാനേജ്‌മെൻ്റ് ആക്ട് (ഫെമ) ലംഘനത്തിന് എൻഫോഴ്സ്മെൻ്റ് ഡയറക്ടറേറ്റ് (ഇ.ഡി.) കേസെടുത്തു. 

വിദേശ സംഭാവന നിയന്ത്രണ നിയമം (എഫ്.സി.ആർ.എ.) ലംഘിച്ച് വൻതോതിൽ വിദേശ ഫണ്ട് സ്വീകരിച്ചതായി ആരോപിച്ചാണ് ഈ നിർണ്ണായകമായ കേസ് രജിസ്റ്റർ ചെയ്തിരിക്കുന്നത്.

വ്യാഴാഴ്ച ഇ.ഡി.  കുണിയയിലെ ട്രസ്റ്റിന്റെ രണ്ട് പ്രധാന കേന്ദ്രങ്ങളിൽ മിന്നൽ റെയ്ഡ് നടത്തിയിരുന്നു. കൊച്ചിയിലെയും മുംബൈയിലെയും ഇ.ഡി. ഉദ്യോഗസ്ഥരാണ് സി.ആർ.പി.എഫിൻ്റെ കാവലിൽ ട്രസ്റ്റിന് കീഴിലുള്ള കുണിയ കോളജിലും ചെയർമാൻ്റെ വീട്ടിലും റെയ്ഡ് നടത്തിയത്. രാവിലെ തുടങ്ങിയ റെയ്ഡ് രാത്രി പത്ത് മണിക്ക് ശേഷമാണ് അവസാനിച്ചത്. കാഞ്ഞങ്ങാട്ടെ ശോഭിക വസ്ത്രാലയത്തിലും ഇ.ഡി. റെയ്ഡ് നടത്തിയിരുന്നു.

പ്രധാന കണ്ടെത്തലുകൾ: 220 കോടിയുടെ 'ഈടില്ലാത്ത വായ്പ'

2021 മുതൽ കുഞ്ഞഹമ്മദ് മുസ്ലിയാർ മെമ്മോറിയൽ ട്രസ്റ്റിന് 220 കോടിയിലധികം രൂപ ഇബ്രാഹിം അഹമ്മദ് അലിയിൽ നിന്ന് 'ഈടില്ലാത്ത വായ്പ'യായി ലഭിച്ചുവെന്ന് ഇ.ഡി. നടത്തിയ പ്രാഥമിക അന്വേഷണത്തിൽ കണ്ടെത്തിയതായി പറയുന്നു. 

ഈ ഭീമമായ തുകയ്ക്ക് യാതൊരുവിധ വായ്പാ കരാറുകളോ, വ്യക്തമായ പലിശ നിരക്കോ, തിരിച്ചടവ് വ്യവസ്ഥകളോ നിലവിലില്ലെന്ന് ഇ.ഡി. ചൂണ്ടിക്കാട്ടുന്നു. ഇതുവരെ ഈ തുക തിരിച്ചടച്ചിട്ടില്ല എന്നതും ദുരൂഹത വർദ്ധിപ്പിക്കുന്നുവെന്നാണ് ഇ.ഡി.യുടെ കണ്ടെത്തൽ.

എഫ്.സി.ആർ.എ. ലംഘനവും ഭൂമി ഇടപാടുകളും

ട്രസ്റ്റ് എഫ്.സി.ആർ.എ. പ്രകാരം രജിസ്റ്റർ ചെയ്തിട്ടില്ലെന്നും, വിദേശ സംഭാവനകൾ സ്വീകരിക്കുന്നതിന് ആവശ്യമായ നിയമപരമായ അനുമതിയോ, അതിനായി നിശ്ചയിച്ചിട്ടുള്ള എഫ്.സി.ആർ.എ. ബാങ്ക് അക്കൗണ്ടോ ഇല്ലെന്നും ഇ.ഡി. വ്യക്തമാക്കി. നിലവിലുള്ള ചട്ടങ്ങൾ പൂർണ്ണമായും ലംഘിച്ചുകൊണ്ട്, ഈ വിദേശ സംഭാവനകളുടെ ഒരു വലിയ ഭാഗം ഇന്ത്യയിൽ കാർഷിക ഭൂമി വാങ്ങാൻ ഉപയോഗിച്ചതായും ഇ.ഡി. കണ്ടെത്തി. 

ഇത് എഫ്.സി.ആർ.എ. നിയമങ്ങളുടെ ഗുരുതരമായ ലംഘനമായാണ് കണക്കാക്കപ്പെടുന്നത്. കൂടാതെ, ഫെമ വ്യവസ്ഥകൾക്ക് വിരുദ്ധമായി 2.49 കോടി രൂപ ട്രസ്റ്റിന് അലിയിൽ നിന്ന് പണമായി ലഭിച്ചതായും റെയ്ഡ് നടപടികളിൽ ഇ.ഡി. കണ്ടെത്തിയിട്ടുണ്ട്.

നിർണ്ണായക രേഖകൾ പിടിച്ചെടുത്തു

റെയ്ഡിനിടെ, കേസുമായി ബന്ധപ്പെട്ട നിരവധി കുറ്റകരമായ രേഖകൾ, 220 കോടി രൂപയുടെ ഈടില്ലാത്ത വായ്പകൾ വ്യക്തമാക്കുന്ന ലെഡ്ജർ അക്കൗണ്ടുകൾ, ട്രസ്റ്റിന്റെ ക്യാഷ് ബുക്ക്, അതുപോലെ സാമ്പത്തിക വിവരങ്ങൾ അടങ്ങിയ ഒരു ഹാർഡ് ഡിസ്ക് എന്നിവയും ഇ.ഡി. പിടിച്ചെടുത്തതായി പറയുന്നു. 

ട്രസ്റ്റിന്റെ സാമ്പത്തിക ഇടപാടുകളെക്കുറിച്ച് കൂടുതൽ വിശദമായ അന്വേഷണം നടത്താനാണ് ഇ.ഡി.യുടെ നീക്കം. ഈ കേസ് കേരളത്തിലെ ചാരിറ്റബിൾ മേഖലയിലെ വിദേശ ഫണ്ട് ഇടപാടുകളിൽ വലിയ ചർച്ചകൾക്ക് വഴിയൊരുക്കിയേക്കുമെന്നാണ് കരുതുന്നത്.

ഇ.ഡി. റെയ്ഡിൽ ചെറിയ പോരായ്മകൾ മാത്രമാണ് കണ്ടെത്തിയതെന്നാണ് പെരിയ കുണിയ കോളജ് അധികൃതർ കാസർകോട് വാർത്തയോട് പ്രതികരിച്ചത്. എന്നാൽ 210 കോടിയുടെ നിയമപരമല്ലാത്ത ഇടപാടുകളാണ് നടന്നിരിക്കുന്നതെന്നാണ് ഇ.ഡി. കേന്ദ്രങ്ങൾ പ്രതികരിച്ചത്. വിദേശ നാണയ വിനിമയ ചട്ടം ലംഘിച്ചു കൊണ്ടാണ് സാമ്പത്തിക ഇടപാടുകൾ നടന്നതെന്ന് ഇ.ഡി. വൃത്തങ്ങൾ പറയുന്നു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായങ്ങൾ അറിയിക്കൂ!

Article Summary: ED registers FEMA case against Kasaragod trust over 220 crore foreign fund irregularities.

#EDCase #FEMA #Kasaragod #ForeignFunds #FCRA #FinancialCrime