നടിയെ ആക്രമിച്ച കേസ്; വിധിക്ക് രണ്ടുനാൾ ശേഷിക്കെ വിവരങ്ങൾ പുറത്ത്; 'തെറ്റുചെയ്യാത്ത താൻ കടുത്ത മാനസിക സമ്മർദ്ദത്തിലെന്ന് ദിലീപ് മുഖ്യമന്ത്രിക്ക് മെസേജ് അയച്ചു'
● നടി ആക്രമിക്കപ്പെട്ട് അഞ്ചാം ദിവസമാണ് ദിലീപ് മെസേജ് അയച്ചതെന്ന് പ്രോസിക്യൂഷൻ പറയുന്നു.
● അന്വേഷണം തന്നിലേക്ക് എത്തുമെന്ന് ഭയന്നാണ് ദിലീപ് മെസേജ് അയച്ചതെന്നാണ് വാദം.
● കാവ്യാ മാധവനുമായുള്ള ബന്ധം നടി മഞ്ജു വാര്യരോട് പറഞ്ഞതിലുള്ള വൈരാഗ്യമാണ് കൃത്യത്തിന് കാരണമെന്നാണ് കേസ്.
● 'രാമൻ, ആർയുകെ അണ്ണൻ, മീൻ, വ്യാസൻ തുടങ്ങിയ പേരുകളിലാണ് കാവ്യയുടെ ഫോൺ നമ്പറുകൾ ദിലീപ് സേവ് ചെയ്തിരുന്നത്.'
● ആകെ 10 പ്രതികളുള്ള കേസിൽ നടൻ ദിലീപ് എട്ടാം പ്രതിയാണ്.
കൊച്ചി: (KasargodVartha) നടിയെ ആക്രമിച്ച കേസിൽ വിധി പ്രസ്താവത്തിന് ഇനി രണ്ട് നാൾ മാത്രം ബാക്കിനിൽക്കെ വിചാരണയുമായി ബന്ധപ്പെട്ട നിർണ്ണായക വിവരങ്ങൾ പുറത്തുവന്നു. നടൻ ദിലീപ് മുഖ്യമന്ത്രി പിണറായി വിജയന് മെസേജ് അയച്ചു എന്ന വിവരമാണ് ഇതിൽ പ്രധാനപ്പെട്ടത്. നടി ആക്രമിക്കപ്പെട്ട് അഞ്ചാം ദിവസമാണ് ദിലീപ് മുഖ്യമന്ത്രിക്ക് മെസേജ് അയച്ചതെന്ന് പ്രോസിക്യൂഷൻ കോടതിയിൽ സമർപ്പിച്ച രേഖകളിൽ പറയുന്നു.
'തെറ്റുചെയ്യാത്ത താൻ കടുത്ത മാനസിക സമ്മർദ്ദത്തിൽ' എന്നായിരുന്നു മെസേജിൻ്റെ ഉള്ളടക്കം. 2017 ഫെബ്രുവരി 22ന് രാവിലെ 09.22 നാണ് ഈ മെസേജ് അയച്ചതെന്നും വീണ്ടെടുത്ത ഈ സന്ദേശം പ്രോസിക്യൂഷൻ കോടതിയിൽ ഹാജരാക്കിയെന്നും അന്വേഷണ സംഘം വ്യക്തമാക്കി. പൾസർ സുനിയാണ് പ്രതിയെന്ന് ആദ്യ ദിവസം തന്നെ പുറത്തുവന്നതോടെ ദിലീപ് സമ്മർദത്തിലായെന്നും ഇതോടെയാണ് മുഖ്യമന്ത്രിയടക്കമുളളവർക്ക് മെസേജ് അയച്ചതെന്നുമാണ് പ്രോസിക്യൂഷൻ വാദം. ഉന്നത പൊലീസുദ്യോഗസ്ഥർക്കും ദിലീപ് മെസേജ് അയച്ചിരുന്നതായി അന്വേഷണ സംഘം പറയുന്നു.
പ്രോസിക്യൂഷൻ്റെ പ്രധാന വാദങ്ങൾ
അന്വേഷണം തന്നിലേക്ക് എത്തുമെന്ന് ഭയന്നാണ് ദിലീപ് ഇത്തരം സന്ദേശങ്ങൾ അയച്ചതെന്നാണ് പ്രോസിക്യൂഷൻ പ്രധാനമായും കോടതിയിൽ വാദിച്ചത്. കേസിൻ്റെ അടിസ്ഥാനം കാവ്യാ മാധവനുമായുളള ദിലീപിൻ്റെ ബന്ധം അന്നത്തെ ഭാര്യയായിരുന്ന മഞ്ജു വാര്യരോട് ആക്രമിക്കപ്പെട്ട നടി പറഞ്ഞതിലുളള വൈരാഗ്യമാണ് എന്നും പ്രോസിക്യൂഷൻ കേസിൽ പറയുന്നു. കാവ്യാ മാധവനുമായുളള ദീലീപിൻ്റെ ചാറ്റുകൾ മഞ്ജു വാര്യർ കണ്ടതാണ് സംഭവങ്ങളുടെ തുടക്കമെന്നും പ്രോസിക്യൂഷൻ വാദിച്ചു.
അതിനിടെ, കാവ്യാ മാധവൻ്റെ ഫോൺ നമ്പരുകൾ ദിലീപ് തൻ്റെ ഫോണിൽ സേവ് ചെയ്തിരുന്നത് രാമൻ, ആര്യുകെ അണ്ണൻ, മീൻ, വ്യാസൻ തുടങ്ങിയ പേരുകളിലാണ് എന്നും ഈ വിവരങ്ങളും കോടതിയിൽ തെളിവായി ഹാജരാക്കിയെന്നും അന്വേഷണ സംഘം വ്യക്തമാക്കി. ആകെ 10 പ്രതികളുളള കേസിൽ നടൻ ദിലീപ് എട്ടാം പ്രതിയാണ്.
അതേസമയം, ബലാത്സംഗത്തിന് ക്വട്ടേഷൻ നൽകി എന്നത് പൊലീസിൻ്റെ കെട്ടുകഥയെന്നാണ് ദിലീപ് കോടതിയിൽ സ്വീകരിച്ചിട്ടുള്ള നിലപാട്.
നടിയെ ആക്രമിച്ച കേസിൽ പുറത്തുവന്ന പുതിയ വിവരങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക.
Article Summary: Key trial details emerge in Actress Assault Case; Dileep messaged CM Pinarayi Vijayan expressing mental stress.
#DileepCase #ActressAssaultCase #PinarayiVijayan #CrimeNews #KeralaNews #TrialDetails
