ഡേറ്റിങ് ആപ്പ് ദുരുപയോഗം ചെയ്ത് കുട്ടിയെ ലൈംഗികമായി ചൂഷണം ചെയ്ത സംഭവം: ആപ്പിനെതിരെയും അന്വേഷണമെന്ന് എസ് പി വിജയ് ഭാരത് റെഡി

കാസർകോട്: (KasargodVartha) ഡേറ്റിങ് ആപ്പ് ദുരുപയോഗം ചെയ്‌ത്‌ പ്രായപൂർത്തിയാകാത്ത കുട്ടിയെ ലൈംഗികമായി ചൂഷണം ചെയ്തത് കേരളത്തിൽ ആദ്യത്തെ സംഭവമാണെന്ന് ജില്ലാ പൊലീസ് മേധാവി വിജയ് ഭാരത് റെഡി പറഞ്ഞു.

ആപ്പിൽ പ്രവേശിക്കാൻ പൂർണമായ വ്യക്തിവിവരങ്ങളോ രേഖകളോ ആവശ്യമില്ലാത്തത് നിയമത്തിലെ ഒരു വലിയ പഴുതാണ്. പതിനെട്ട് വയസ്സ് തികഞ്ഞുവെന്ന് സ്വയം സാക്ഷ്യപ്പെടുത്തുന്നതിലൂടെ മാത്രം പ്രവേശനം സാധ്യമാകുന്നത് ചൂഷണം ചെയ്യാൻ ഇടയാക്കുന്നുണ്ടെന്നും എസ് പി മാധ്യമപ്രവർത്തകരുടെ ചോദ്യങ്ങൾക്ക് മറുപടി നൽകി.

ഇന്ത്യ ഉൾപ്പെടെ പല രാജ്യങ്ങളിലും ഇത്തരം സാക്ഷ്യപ്പെടുത്തലുകൾ മാത്രം മതിയാകുന്നുണ്ട്. ഈ അവസരം മുതലെടുത്താണ് പതിനാലുകാരനായ കുട്ടി ആപ്പ് ഉപയോഗിച്ചുതുടങ്ങിയതെന്നും അദ്ദേഹം ചൂണ്ടിക്കാട്ടി.

സംഭവത്തിന്റെ പശ്ചാത്തലത്തിൽ ആപ്പിനെതിരെ നിയമനടപടി സ്വീകരിക്കുമെന്നും ഭാവിയിൽ ഇത്തരത്തിലുള്ള ആപ്പുകളിൽ പ്രവേശിക്കാൻ രേഖകളും വ്യക്തിവിവരങ്ങളും നിർബന്ധമാക്കുന്നത് പരിശോധിക്കണമെന്നും എസ് പി വ്യക്തമാക്കി. 

സൈബർ നിയമങ്ങളും ഐടി കുറ്റകൃത്യങ്ങൾ തടയുന്നതിനുള്ള വ്യവസ്ഥകളും ഉൾപ്പെടുത്തിയാണ് കേസ് കൈകാര്യം ചെയ്യുന്നത്. പരാതി ലഭിച്ചതോടെ വേഗത്തിലും ഗൗരവത്തോടെയും അന്വേഷണം ആരംഭിച്ച് രണ്ട് ദിവസത്തിനുള്ളിൽ പ്രതികളെ അറസ്റ്റ് ചെയ്യാൻ കഴിഞ്ഞതായും എസ് പി അറിയിച്ചു.

ഇരയായ കുട്ടിയുടെ മൊഴിയാണ് പ്രധാന തെളിവ്. ശാസ്ത്രീയ തെളിവുകളും ശേഖരിച്ചിട്ടുണ്ടെന്ന് എസ് പി വ്യക്തമാക്കി. പ്രതികൾക്ക് സമാനമായ മറ്റ് കുറ്റകൃത്യങ്ങളുമായി മുമ്പ് ബന്ധമില്ലെന്നും ആരും ഇടനിലക്കാരായി പ്രവർത്തിച്ചിട്ടില്ലെന്നും കണ്ടെത്തിയിട്ടുണ്ട്. 

കാസർകോട് ജില്ലക്ക് പുറമേ കണ്ണൂർ, കോഴിക്കോട്, എറണാകുളം ജില്ലകളിലും സംഭവവുമായി ബന്ധപ്പെട്ട് കേസുകൾ രജിസ്റ്റർ ചെയ്തിട്ടുണ്ട്.

ഈ വിഷയത്തെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യൂ.

Article Summary: Police investigate dating app in child exploitation case.

#KeralaPolice #DatingAppSafety #ChildSafety #CyberCrime #KasargodNews #POCSO