വൈദികനെതിരെ പോക്സോ കേസെടുത്തത് വിശ്വാസികളെ ഞെട്ടിച്ചു; പ്രതിയെ രക്ഷിക്കാൻ പോലീസിന് കത്തയക്കാൻ പറയുന്ന ഓഡിയോ സന്ദേശം പുറത്ത്

ചിറ്റാരിക്കാൽ: (KasargodVartha) പ്ലസ് വൺ വിദ്യാർത്ഥിയായ 16 വയസ്സുകാരനായ ആൺകുട്ടിയെ പ്രകൃതിവിരുദ്ധ പീഡനത്തിന് ഇരയാക്കിയെന്ന പരാതിയിൽ വൈദികനെതിരെ പോക്സോ നിയമപ്രകാരം പോലീസ് കേസെടുത്തത് വിശ്വാസികളെ ഞെട്ടിച്ചിരിക്കുകയാണ്. അതിരുമാവ് ഇടവകയിലെ ഫാദർ പോൾ തട്ടുപറമ്പിലിനെതിരെയാണ് മൂന്ന് ദിവസം മുമ്പ് ചിറ്റാരിക്കാൽ പോലീസ് കേസെടുത്തത്.

2024 മെയ് 15 മുതൽ ഓഗസ്റ്റ് 13 വരെയുള്ള ദിവസങ്ങളിൽ 16 വയസ്സുകാരനായ കുട്ടിയെ പോൾ തട്ടുപറമ്പിൽ താൻ താമസിക്കുന്ന സ്ഥലത്തും മറ്റ് പലയിടങ്ങളിലായി കൊണ്ടുപോയി പീഡിപ്പിച്ചു എന്നാണ് പരാതിയിൽ പറയുന്നത്. ധ്യാനത്തിന്റെ ഭാഗമായി നടന്ന കൗൺസിലിംഗിനിടെയാണ് കൗമാരക്കാരൻ ഈ പീഡനവിവരം വെളിപ്പെടുത്തിയത്. തുടർന്ന് കൗൺസിലർമാർ ചൈൽഡ് ലൈനിൽ വിവരം അറിയിക്കുകയും, ചൈൽഡ് ലൈൻ പോലീസിന് റിപ്പോർട്ട് നൽകിയതിനെ തുടർന്നാണ് കേസെടുത്തത്.

വൈദികൻ ഒരു സ്വകാര്യ ആശുപത്രിയിൽ ചികിത്സയിലായിരുന്നുവെന്ന് ആദ്യം പറഞ്ഞിരുന്നെങ്കിലും, കേസ് എടുത്തതോടെ വൈദികൻ ഒളിവിൽ പോയിരിക്കുകയാണെന്നാണ് പോലീസ് പറയുന്നത്. ഇതിനിടെ, വൈദികൻ മുൻകൂർ ജാമ്യഹർജി നൽകാൻ ശ്രമം തുടങ്ങിയതായും വിവരമുണ്ട്.

വൈദികനെ രക്ഷിക്കാൻ ഇടവകയിലെ എല്ലാ വിശ്വാസികളും അദ്ദേഹം നിരപരാധിയാണെന്ന് കാണിച്ച് പോലീസിന് കത്തയക്കണമെന്ന് പറയുന്ന ഇടവക ഭാരവാഹികളിൽ ഒരാളുടെ ശബ്ദ സന്ദേശവും പുറത്ത് വന്നിട്ടുണ്ട്. പോലീസിൽ സമ്മർദ്ദം ചെലുത്തി കേസ് അന്വേഷണത്തിന് തടസ്സമുണ്ടാക്കാനുള്ള ശ്രമമാണിതെന്നാണ് പോലീസ് കരുതുന്നത്.

എറണാകുളം സ്വദേശിയായ ഫാദർ പോൾ തട്ടുപറമ്പിൽ ഒന്നര വർഷം മുമ്പാണ് ചിറ്റാരിക്കാലിൽ വൈദികവൃത്തിക്ക് എത്തിയത്. ഇതിനുമുമ്പ് ചിറ്റാരിക്കാലിന് തൊട്ടടുത്തുള്ള കണ്ണൂർ ജില്ലയിലെ മറ്റൊരു ഇടവകയിലായിരുന്നു അദ്ദേഹം പ്രവർത്തിച്ചിരുന്നത്

ഇത്തരം സംഭവങ്ങളെക്കുറിച്ച് നിങ്ങളുടെ അഭിപ്രായം പങ്കുവെക്കുക. വാർത്ത ഷെയര്‍ ചെയ്യൂ.

Article Summary: Priest accused in POCSO case in Chittarikkal, Kerala; audio surfaces.

#POCSO #KeralaCrime #Chittarikkal #PriestArrest #ChildAbuse #PoliceInvestigation