മധു ആൾക്കൂട്ട കൊലപാതകം: ഒന്നാം പ്രതിയെ വെറുതെവിട്ട് ഹൈകോടതി ഉത്തരവ്

കൊച്ചി: (KasargodVartha) അട്ടപ്പാടിയിലെ ആദിവാസി യുവാവ് മധു ആൾക്കൂട്ട മർദനത്തിന് ഇരയായി മരിച്ചെന്ന കേസിൽ ഒന്നാം പ്രതിയെ ഹൈകോടതി വെറുതെവിട്ടു. ഒന്നാം പ്രതിയായ ഹുസൈൻ നൽകിയ അപ്പീൽ അനുവദിച്ചാണ് കോടതി നടപടി. അതേസമയം കേസിൽ ശിക്ഷിക്കപ്പെട്ട മരയ്ക്കാർ അടക്കമുള്ള മറ്റ് പ്രതികളുടെ അപ്പീലുകൾ കോടതി തള്ളി. 

മധുവിനെ കാട്ടിൽ നിന്ന് പിടികൂടി മുക്കാലിയിൽ എത്തിച്ചപ്പോൾ ഒന്നാം പ്രതി ഹുസൈൻ നെഞ്ചിലേക്ക് ചവിട്ടിയെന്നും, തുടർന്ന് സമീപത്തുള്ള ഭണ്ഡാരത്തിൽ തലയിടിച്ച് വീണതാണ് മരണകാരണമെന്നുമായിരുന്നു പ്രോസിക്യൂഷൻ വാദം. ഹുസൈനെതിരെ ഐപിസി 304 പാർട്ട് 2, ഐപിസി 143 എന്നീ കുറ്റങ്ങളായിരുന്നു ചുമത്തിയിരുന്നത്. എന്നാൽ ഈ വകുപ്പുകൾ നിലനിൽക്കില്ലെന്ന് ഹൈകോടതി വ്യക്തമാക്കി. താൻ മധുവിനെ ഉപദ്രവിച്ചിട്ടില്ലെന്നും സ്ഥലത്തുണ്ടായിരിക്കുക മാത്രമാണ് ചെയ്തതെന്നുമായിരുന്നു ഹുസൈന്റെ വാദം. മധുവിനെ കാട്ടിൽ നിന്ന് പിടിച്ചുകൊണ്ടു വന്നവരുടെ കൂട്ടത്തിൽ ഇയാൾ ഇല്ലാതിരുന്നതിനാൽ ഹൈകോടതി നേരത്തെ ജാമ്യം അനുവദിച്ചിരുന്നു.

വ്യാഴാഴ്ച, 2018 ഫെബ്രുവരി 22 നായിരുന്നു കേസിനാസ്പദമായ സംഭവം. മാനസികാസ്വാസ്ഥ്യമുള്ള മധുവിനെ മോഷണക്കുറ്റം ആരോപിച്ച് മർദിച്ചു കൊലപ്പെടുത്തിയെന്നാണ് ആരോപണം. ഈ കേസിൽ 13 പ്രതികൾക്ക് മണ്ണാർക്കാട് പട്ടികജാതി പട്ടികവർഗ പ്രത്യേക കോടതി ഏഴ് വർഷം കഠിനതടവും പിഴയും വിധിച്ചിരുന്നു. ദൃശ്യങ്ങൾ പകർത്തിയ നാലാം പ്രതി അനീഷ്, ദൃശ്യങ്ങൾ പ്രചരിപ്പിച്ച പതിനൊന്നാം പ്രതി അബ്ദുൽ കരിം എന്നിവരെ വെറുതെവിട്ട വിചാരണക്കോടതി വിധി ഹൈകോടതി അംഗീകരിച്ചു. എന്നാൽ മൂന്ന് മാസം മാത്രം ശിക്ഷിക്കപ്പെട്ട പതിനാറാം പ്രതി വിരുത്തിയിൽ മുനീറിന്റെ ശിക്ഷ കോടതി വർധിപ്പിച്ചു. പ്രകോപനമില്ലാതെ മർദിച്ചു എന്നതായിരുന്നു ഇയാൾക്കെതിരെയുള്ള കുറ്റം.

കീഴ്കോടതി വിധി റദ്ദാക്കണമെന്ന് ആവശ്യപ്പെട്ട് പ്രതികളും, ശിക്ഷ വർധിപ്പിക്കണമെന്ന് ആവശ്യപ്പെട്ട് സർക്കാരും മധുവിന്റെ അമ്മ മല്ലിയും നൽകിയ അപ്പീലുകളാണ് കോടതി പരിഗണിച്ചത്. പ്രതികൾ പുറത്തിറങ്ങുന്നത് തങ്ങളുടെ ജീവന് ഭീഷണിയാണെന്ന് മധുവിന്റെ കുടുംബം കോടതിയെ അറിയിച്ചിരുന്നു. വിചാരണ വേളയിൽ 24 സാക്ഷികൾ കൂറുമാറിയ കേസ് കൂടിയാണിത്.

നിയമപരമായ ഇത്തരം വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. ഈ വാർത്തയെക്കുറിച്ചുള്ള നിങ്ങളുടെ അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താനും മറക്കരുത്. 

Article Summary: The Kerala High Court acquitted the first accused, Hussain, in the Attappadi Madhu mob lynching case while dismissing the appeals of other convicts.

#MadhuCase #KeralaHighCourt #Attappadi #KeralaNews #JusticeForMadhu