എഎസ്ഐയെ മർദ്ദിച്ച് കർണപടത്തിന് ഗുരുതരമായി പരിക്കേൽപ്പിച്ച പ്രതിക്ക് 2 വർഷം കഠിന തടവും കാൽ ലക്ഷം രൂപ പിഴയും ശിക്ഷ വിധിച്ചു

കാസർകോട്: (KasargodVartha) ഒരു പരാതി അന്വേഷിക്കാൻ ചെന്ന അസിസ്റ്റന്റ് സബ് ഇൻസ്പെക്ടറെ (എ.എസ്.ഐ) ആക്രമിച്ച് കർണപടത്തിന് ഗുരുതരമായി പരിക്കേൽപ്പിച്ച പ്രതിക്ക് രണ്ട് വർഷം കഠിന തടവും 25,000 രൂപ പിഴയും വിധിച്ച് കോടതി. സജി ജോസഫിനെയാണ് കാസർകോട് അഡീഷണൽ ജില്ലാ സെഷൻസ് കോടതി (രണ്ട്) ജഡ്ജ് പ്രിയ കെ. ശിക്ഷിച്ചത്. പിഴ അടച്ചില്ലെങ്കിൽ രണ്ട് മാസം അധിക തടവ് അനുഭവിക്കണം.

2020 ഒക്ടോബർ 29-ന് രാവിലെ 9:40-ന് ചീമേനി പോലീസ് സ്റ്റേഷനിലേക്ക് പ്രതിയുടെ മകന്റെ ഭാര്യ വിളിച്ചറിയിച്ച പരാതി അന്വേഷിക്കാൻ ചെന്ന സമയത്താണ് എ.എസ്.ഐ പ്രകാശനെ സജി ജോസഫ് ആക്രമിച്ചത്. 

ഈ ആക്രമണത്തിൽ എ.എസ്.ഐയുടെ കർണപടത്തിന് ഗുരുതരമായി പരിക്കേൽക്കുകയും കൂടെയുണ്ടായിരുന്ന പോലീസുകാരുടെ ഔദ്യോഗിക കൃത്യനിർവഹണം തടസ്സപ്പെടുകയും ചെയ്തിരുന്നു.

ചീമേനി പോലീസ് രജിസ്റ്റർ ചെയ്ത ഈ കേസിൽ പ്രതിയെ അറസ്റ്റ് ചെയ്ത് അന്വേഷണം നടത്തി കോടതിയിൽ കുറ്റപത്രം സമർപ്പിച്ചത് അന്നത്തെ ചീമേനി സബ് ഇൻസ്പെക്ടർ ആയിരുന്ന ബാവ അക്കരക്കാരനായിരുന്നു. പ്രോസിക്യൂഷനുവേണ്ടി അഡീഷണൽ ഗവൺമെന്റ് പ്ലീഡർ ചന്ദ്രമോഹൻ ജി., അഡ്വ. ചിത്രകല എന്നിവർ ഹാജരായി.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് നിങ്ങളുടെ അഭിപ്രായം അറിയിക്കുക.

Article Summary: Man gets 2 years rigorous imprisonment and fine for attacking ASI.

#Kasargod #KeralaPolice #ASI #CourtVerdict #CrimeNews #IndiaNews