പൊലീസിനെ വെല്ലുവിളിച്ച അർജുൻ ആയങ്കി ഒടുവിൽ പിടിയിൽ; നാടകീയ അറസ്റ്റ് കണ്ണൂരിലെ ഫ്ലാറ്റിൽ വെച്ച്

കണ്ണൂർ: (KasargodVartha) നീണ്ട തിരച്ചിലിനൊടുവിൽ ഒളിവില്‍ കഴിയുകയായിരുന്ന ക്രിമിനല്‍ കേസ് പ്രതി അര്‍ജുന്‍ ആയങ്കിയെ പൊലീസ് പിടികൂടി. കണ്ണൂർ താളിക്കാവിലെ അഭിഭാഷക ദമ്പതികളുടെ അപ്പാർട്ട്മെൻ്റിൽ നിന്നാണ് ഡിഐജിയുടെ നേതൃത്വത്തിലുള്ള പൊലീസ് സംഘം ഞായറാഴ്ച (ഓഗസ്റ്റ് 9) പുലർച്ചെ 2.30-ഓടെ പ്രതിയെ കസ്റ്റഡിയിലെടുത്തത്. 

വാറണ്ടില്ലാതെ അറസ്റ്റ് ചെയ്യാനാവില്ലെന്ന നിലപാടായിരുന്നു അഭിഭാഷക ദമ്പതികൾ സ്വീകരിച്ചത്. ഇതിനിടയിൽ പുറത്തേക്കിറങ്ങി രക്ഷപ്പെടാൻ ശ്രമിച്ച അർജുൻ ആയങ്കിയെ പൊലീസ് ഓടിച്ചിട്ട് പിടികൂടുകയായിരുന്നു. അർജുൻ ആയങ്കിയെ അറസ്റ്റ് ചെയ്തത് പൊലീസിൻ്റെ കൂട്ടായ പരിശ്രമം കൊണ്ടാണെന്ന് കമീഷണർ ബി വി വിജയ് ഭരത് റെഡ്ഡി വ്യക്തമാക്കി.

ഓട്ടോറിക്ഷയിൽ കയറി പോയ പ്രതിയെ തന്ത്രപരമായാണ് പൊലീസ് കുടുക്കിയത്. ഓട്ടോ ഡ്രൈവറുടെ ഫോൺ വാങ്ങി തുടർന്ന് യാത്ര ചെയ്ത നെക്സോൺ കാറിൻ്റെ ഡ്രൈവറെ ആയങ്കി വിളിച്ചിരുന്നു. ചുടല എന്ന സ്ഥലത്ത് ഓട്ടോയിൽ ചെന്നിറങ്ങിയ പ്രതി അവിടെ നിന്ന് നെക്സോൺ കാറിൽ പോയി. 

പയ്യന്നൂരിൽ നിന്ന് നെക്സോൺ കാറിൻ്റെ ഡ്രൈവറെ പൊലീസ് കണ്ടെത്തുകയും ഇയാൾ ആയങ്കിയെ ഇറക്കിയ സ്ഥലം വളയുകയുമായിരുന്നു. അപ്പാർട്ട്മെൻ്റിലെ സിസിടിവി ദൃശ്യങ്ങളും നിർണായകമായി. കടലിൽ കാണാതായവരെ കിട്ടിയോ എന്നായിരുന്നു കസ്റ്റഡിയിൽ എടുത്ത പൊലീസുകാരോടുള്ള ആയങ്കിയുടെ പരിഹാസ രൂപേണയുള്ള ചോദ്യം.

വൈദ്യപരിശോധന പൂർത്തിയാക്കിയ പ്രതിയെ കോടതിയിൽ ഹാജരാക്കും. കണ്ണൂർ ഡിസിസി പ്രസിഡൻ്റ് മാർട്ടിൻ ജോർജ് നൽകിയ പരാതിയുടെ അടിസ്ഥാനത്തിൽ, ആഭ്യന്തരമന്ത്രിയെ വെല്ലുവിളിച്ചതിനും കാലാപാഹ്വാനം നടത്തിയതിനും കണ്ണൂർ സൈബർ പൊലീസ് കേസ് രജിസ്റ്റർ ചെയ്തിട്ടുണ്ട്.

ക്രൗഡ് ഫണ്ടിങ്; സഹോദരനും പിടിയിൽ

അർജുൻ ആയങ്കിക്ക് വേണ്ടി ക്രൗഡ് ഫണ്ടിങ് നടത്തിയതിന് സഹോദരൻ അജയ്‌യെ കോഴിക്കോട് നടക്കാവ് പൊലീസ് അറസ്റ്റ് ചെയ്തു. മുൻകരുതലിൻ്റെ ഭാഗമായിട്ടാണ് അറസ്റ്റ് രേഖപ്പെടുത്തിയിരിക്കുന്നത്. ഒളിവിൽ കഴിയുകയായിരുന്ന അർജുൻ ആയങ്കിയുടെ പേരിലുള്ള അക്കൗണ്ട് ഉപയോഗിച്ച് സമൂഹമാധ്യമങ്ങളിലൂടെ അജയ് ക്രൗഡ് ഫണ്ടിങ് നടത്തിയെന്നാണ് എഫ്ഐആറിൽ വ്യക്തമാക്കുന്നത്. ഞായറാഴ്ച പുലർച്ചെ 12.30-ന് ഈസ്റ്റ് നടക്കാവിലെ ഒരു സ്ഥാപനത്തിന് മുന്നിൽ വെച്ചാണ് നിയമാനുസരണം മുൻകരുതൽ അറസ്റ്റ് ചെയ്തത്.

ഇതിനുപുറമെ എടപ്പാളിൽ ആയങ്കിക്കൊപ്പം എത്തിയ അബൂബക്കര്‍ സിദ്ദീഖ്, ഫൈസല്‍, നൗഫല്‍, അഷ്‌കര്‍ എന്നിവരെയും ഒളിവിൽ പോകാൻ സഹായിച്ച സഹോദരൻ അഖിലിനെയും തൃശൂർ വടക്കുംനാഥ ക്ഷേത്ര മൈതാനത്ത് നിന്ന് പൊലീസ് നേരത്തെ കസ്റ്റഡിയിലെടുത്തിരുന്നു.

രാഷ്ട്രീയ പ്രതികരണങ്ങൾ

സിപിഎം സംസ്ഥാന സെക്രട്ടറി എം വി ഗോവിന്ദനും സംസ്ഥാന സെക്രട്ടറിയേറ്റ് അംഗം എം വി ജയരാജനും അർജുൻ ആയങ്കിയെ നേരത്തെ തന്നെ തള്ളിപ്പറഞ്ഞിരുന്നു. ആയങ്കിക്ക് പാർട്ടിയുമായി യാതൊരു ബന്ധവുമില്ലെന്നാണ് എം വി ഗോവിന്ദൻ വ്യക്തമാക്കിയത്. 

അര്‍ജുന്‍ ആയങ്കിയെ തൂഫാന്‍ പോലെ തൂക്കണമെന്നും, എവിടെയാണോ അവിടെ പോയി പിടിക്കാൻ ആഭ്യന്തരമന്ത്രി കരുത്ത് കാണിക്കണമെന്നും എം വി ജയരാജൻ പറഞ്ഞിരുന്നു. തനിക്ക് അയിത്തം കല്‍പ്പിക്കുന്നതിനും തള്ളിപ്പറയുന്നതിനും മുന്‍പ് താനീ പ്രസ്ഥാനത്തിലുണ്ടായിരുന്നുവെന്നും പാർട്ടിക്കുവേണ്ടി ജയിലിൽ കിടന്നിട്ടുണ്ടെന്നുമായിരുന്നു ഇതിന് ആയങ്കിയുടെ മറുപടി.

സംഭവങ്ങളുടെ നാൾവഴി

● കരുതൽ തടങ്കൽ (മെയ് 3) നിയമസഭാ തിരഞ്ഞെടുപ്പ് ഫലം പുറത്തുവരുന്നതിൻ്റെ തലേന്ന് അർജുൻ ആയങ്കി ഉൾപ്പെടെ 6 പേരെ കോതമംഗലത്ത് വെച്ച് പൊലീസ് കരുതൽ തടങ്കലിൽ എടുത്തു. 21 ദിവസത്തിന് ശേഷം ഇവർക്ക് സ്വാഭാവിക ജാമ്യം ലഭിച്ചു.

● പൊലീസിന് നേരെ ഭീഷണി (ജൂൺ 6) ജാമ്യത്തിൽ ഇറങ്ങിയതിന് പിന്നാലെ കോതമംഗലം സിഐക്ക് നേരെ ഭീഷണി മുഴക്കുന്ന കുറിപ്പ് ഫേസ്ബുക്കിലൂടെ പങ്കുവെച്ചു. തുടർന്ന് പൊലീസ് കേസ് രജിസ്റ്റർ ചെയ്തതോടെ അർജുൻ ആയങ്കി ഒളിവിൽ പോയി.

● മുൻകൂർ ജാമ്യാപേക്ഷ തള്ളി (ഓഗസ്റ്റ് 3) അർജുൻ ആയങ്കിയുടെ മുൻകൂർ ജാമ്യാപേക്ഷ ഹൈക്കോടതി തള്ളി.

● മുഖ്യമന്ത്രിയെ പരിഹസിച്ചു (ഓഗസ്റ്റ് 5) കുറ്റബോധവുമില്ല കീഴടങ്ങലുമില്ല എന്ന് വ്യക്തമാക്കി ഫേസ്ബുക്ക് പോസ്റ്റ്. മുഖ്യമന്ത്രി വി ഡി സതീശനെ പരിഹസിച്ചുകൊണ്ടും പോസ്റ്റിട്ടു.

● ആഭ്യന്തരമന്ത്രിക്ക് നേരെ വെല്ലുവിളി (ഓഗസ്റ്റ് 6) കോതമംഗലം സിഐക്ക് അയച്ച ഓഡിയോ സന്ദേശം പുറത്ത് വന്നു. ഇതിന് പിന്നാലെ ആഭ്യന്തരമന്ത്രി രമേശ് ചെന്നിത്തലയെ അവഹേളിച്ച് പോസ്റ്റിട്ടു. സിഐക്കെതിരെ നടപടിയെടുത്താൽ ആഭ്യന്തരമന്ത്രിക്ക് പൊന്നാടയണിയിച്ച് ഉമ്മതരും എന്ന് വെല്ലുവിളി.

● പ്രത്യേക അന്വേഷണ സംഘം (ഓഗസ്റ്റ് 7) പ്രതിയെ പിടികൂടാൻ മൂവാറ്റുപുഴ ഡിവൈഎസ്പിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിച്ചു.

● സുഹൃത്തുക്കൾ അറസ്റ്റിൽ (ഓഗസ്റ്റ് 8) പാലിയേക്കര ടോൾ പ്ലാസയിലൂടെ കടന്നുപോകുന്നതിൻ്റെയും എടപ്പാളിലെ സിസിടിവി ദൃശ്യങ്ങളും പുറത്തുവന്നു. ഒളിവിൽ പോകാൻ സഹായിച്ച സുഹൃത്തുക്കൾ അറസ്റ്റിലായി. ആയങ്കി ഉപയോഗിച്ച കാർ കണ്ണൂരിൽ കണ്ടെത്തി.

● അറസ്റ്റ് (ഓഗസ്റ്റ് 9) പുലർച്ചെ 2.30-ന് കണ്ണൂർ താളിക്കാവിലെ ഫ്ലാറ്റിൽ വെച്ച് അർജുൻ ആയങ്കി പിടിയിലായി.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. ഏറ്റവും പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Arjun Ayanki, who challenged the police, was arrested dramatically from Kannur.

#ArjunAyanki #KannurNews #KeralaPolice #CrimeNews #MalayalamNews #KeralaPolitics #AmmuNews