നാട്ടില് ലഹരിക്കെതിരെ സജീവ ബോധവല്ക്കരണം; രാത്രി എംഡിഎംഎഉപയോഗം; തൂഫാന് പരിശോധനയില് ലഹരിവിരുദ്ധ സംഘടനയുടെ സംസ്ഥാന പ്രസിഡന്റ് പിടിയിലായത് ഇങ്ങനെ
● പത്തനംതിട്ട സ്വദേശി ഷർഫിൻ സെബാസ്റ്റ്യനാണ് അറസ്റ്റിലായത്
● പുസ്തകങ്ങൾക്കിടയിൽ ഒളിപ്പിച്ച നിലയിൽ ഒന്നര ഗ്രാം എംഡിഎംഎ കണ്ടെടുത്തു
● ലഹരി ഉപയോഗിക്കുന്നതിനുള്ള പ്രത്യേക ഉപകരണങ്ങളും പിടിച്ചെടുത്തു
● വ്യാജ സംഘടനയുടെ മറവിൽ വലിയ ലഹരി മാഫിയാ ബന്ധമുണ്ടോയെന്ന് പോലീസ് പരിശോധിക്കുന്നു
പെരുമ്പെട്ടി: (KasargodVartha) 'ഓപ്പറേഷൻ തൂഫാൻ' പരിശോധനയിലാണ് വ്യാജ ലഹരിവിരുദ്ധ സംഘടനയുടെ സംസ്ഥാന പ്രസിഡന്റും പത്തനംതിട്ട സ്വദേശിയുമായ ഷർഫിൻ സെബാസ്റ്റ്യനെ (25) പെരുമ്പെട്ടി പൊലീസ് അറസ്റ്റ് ചെയ്തത്. 'ആന്റി ഡ്രഗ്സ് മൂവ്മെന്റ് ഇൻ നേഷൻ' എന്ന സംഘടനയുടെ യൂത്ത് മൂവ്മെന്റ് സംസ്ഥാന പ്രസിഡന്റ് എന്ന് രേഖപ്പെടുത്തിയ തിരിച്ചറിയൽ കാർഡാണ് ഇയാളിൽ നിന്ന് കണ്ടെത്തിയത്. നാട്ടിൽ സജീവ ലഹരി വിരുദ്ധ പ്രവർത്തകനായി നടന്നിരുന്ന പ്രതിയുടെ ലഹരിക്കടത്തില് ഞെട്ടിയിരിക്കുകയാണ് നാടും
പൊലീസിനെ തെറ്റിദ്ധരിപ്പിക്കാൻ ശ്രമം
ഡാൻസാഫ് സംഘം ദിവസങ്ങളോളം ഇയാളെ നിരീക്ഷിച്ചു വരികയായിരുന്നു. ഞായറാഴ്ച ഉച്ചയോടെ പൊലീസ് സംഘം ഇയാളുടെ വീട്ടിൽ റെയ്ഡിനെത്തി. ജില്ലാ പൊലീസ് മേധാവി ആർ ആനന്ദിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പെരുമ്പെട്ടി പൊലീസും ഡാൻസാഫും സംയുക്തമായാണ് പരിശോധന നടത്തിയത്.
വീട്ടിലെത്തിയ പൊലീസിനെ തെറ്റിദ്ധരിപ്പിക്കാൻ ഷർഫിൻ പരമാവധി ശ്രമിക്കുകയും തന്റെ യഥാർത്ഥ മുറി കാട്ടിക്കൊടുക്കാതെ മറ്റൊരു മുറിയാണ് കാണിച്ചുകൊടുക്കുകയും ചെയ്തത്. എന്നാൽ സംശയം തോന്നിയ പൊലീസ് സംഘം നടത്തിയ തെരച്ചിലിൽ, മുറിയിലെ പുസ്തകങ്ങൾക്കിടയിൽ അതീവ രഹസ്യമായി ഒളിപ്പിച്ച നിലയിൽ ഒരു ഗ്രാമിലധികം എംഡിഎംഎ കണ്ടെത്തുകയായിരുന്നു.
ഉപകരണങ്ങളും പിടിച്ചെടുത്തു
ലഹരിമരുന്ന് കൂടാതെ, ലഹരി ഉപയോഗിക്കുന്ന പ്രത്യേക ഉപകരണങ്ങളും ഇയാളുടെ പക്കൽ നിന്നും പിടിച്ചെടുത്തിട്ടുണ്ട്. എംഡിഎംഎ വലിക്കാൻ ഉപയോഗിക്കുന്ന ഗ്ലാസ് ഉപകരണം, ചൂടാക്കി വലിക്കാനുള്ള ഫ്യൂവിങ് പൈപ്പുകൾ, പ്ലാസ്റ്റിക് പൈപ്പുകൾ എന്നിവയും ഇയാളുടെ മുറിയിൽ നിന്ന് പൊലീസ് പിടിച്ചെടുത്തു. ലഹരി വിരുദ്ധ പ്രവർത്തനങ്ങളുടെ മറവിൽ ഇയാൾ വലിയ തോതിൽ ലഹരിക്കടത്ത് നടത്തിയിരുന്നോ എന്ന് പൊലീസ് പരിശോധിക്കുന്നുണ്ട്. ഇത്തരത്തിൽ വ്യാജ സംഘടനകൾ രൂപീകരിച്ച് ലഹരി മാഫിയകൾ പ്രവർത്തിക്കുന്നുണ്ടോ എന്ന് കണ്ടെത്താൻ കൂടുതൽ അന്വേഷണം നടത്തുമെന്ന് പെരുമ്പെട്ടി പൊലീസ് വ്യക്തമാക്കി.
കൂടുതല് വാർത്തകള് അറിയാന് ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.
Article Summary: Sharfin Sebastian, the state president of a fake anti-drug organization named 'Anti-Drug Movement', was arrested by Perumpetty police with 1.5 grams of MDMA during an 'Operation Toofan' raid. He was caught while concealing the drugs inside books, despite posing as an active anti-drug activist.
#PerumpettyPolice #OperationToofan #MDMAArrest #PathanamthittaNews #AntiDrugMovement #KeralaPolice #RenuNews
