12 കാരിയെ ബീച്ചില്‍ കൊണ്ടുപോയി പീഡിപ്പിച്ച കേസില്‍ പ്രതിക്ക് 7 വര്‍ഷം കഠിനതടവും 50,000 രൂപയും പിഴയും

കാസര്‍കോട് : (www.kasargodvartha.com 30.11.2018) 12 കാരിയെ ബീച്ചില്‍ കൊണ്ടുപോയി പീഡിപ്പിച്ച കേസില്‍ പ്രതിക്ക് ഏഴു വര്‍ഷം കഠിനതടവും 50,000 രൂപയും പിഴയും ശിക്ഷ വിധിച്ചു. അടുക്കത്ത്ബയലിലെ കെ ഗോവിന്ദനെ (48)യാണ് കാസര്‍കോട് ജില്ലാ അഡീ. സെഷന്‍സ് ജഡ്ജ് പി ശശികുമാര്‍ ശിക്ഷിച്ചത്. പിഴയടച്ചാല്‍ സംഖ്യ കുട്ടിക്ക് നല്‍കാനും കോടതി ഉത്തരവിട്ടു.

2012- 13 വര്‍ഷം പല ദിവസങ്ങളിലായി പെണ്‍കുട്ടിയെ ബീച്ചില്‍ കൊണ്ടുപോയി പ്രതി പീഡിപ്പിച്ചുവെന്നാണ് കേസ്. അന്നത്തെ കാസര്‍കോട് സി ഐ ആയിരുന്ന ടി പി ജേക്കബ് ആണ് കേസ് അന്വേഷിച്ചത്. പിന്നീട് സി ഐയായിരുന്ന പി കെ സുധാകരനാണ് കോടതിയില്‍ കുറ്റപത്രം സമര്‍പ്പിച്ചത്. പ്രോസിക്യൂഷനു വേണ്ടി അഡീ. പബ്ലിക് പ്രോസിക്യൂട്ടര്‍ പ്രകാശ് അമ്മണ്ണായ ഹാജരായി.

പിഴയടച്ചില്ലെങ്കില്‍ പ്രതി ആറു മാസം കൂടി അധികം തടവ് അനുഭവിക്കണമെന്നും കോടതി വിധിന്യായത്തില്‍ വ്യക്തമാക്കി.