പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച സഹോദരനെ 20 വര്‍ഷം കഠിന തടവിന് കോടതി ശിക്ഷിച്ചു

കാസര്‍കോട്: (www.kasargodvartha.com 05.01.2019) പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച സഹോദരനെ 20 വര്‍ഷം കഠിന തടവിന് കോടതി ശിക്ഷിച്ചു. കൂടാതെ 50,000 രൂപ പിഴയടക്കാനും കോടതി വിധിച്ചു. 16 കാരിയായ പെണ്‍കുട്ടിയെയാണ് 26കാരനായ സഹോദരന്‍ പീഡിപ്പിച്ചത്. കാസര്‍കോട് ജില്ലാ അഡീഷണല്‍ സെഷന്‍സ് കോടതി (ഒന്ന്) പി എസ് ശശികുമാര്‍ ആണ് പ്രതിയെ തടവിന് ശിക്ഷിച്ചത്.

പിഴയടച്ചാല്‍ തുക പെണ്‍കുട്ടിക്ക് നല്‍കാനും കോടതി നിര്‍ദേശിച്ചു. പെണ്‍കുട്ടിയെ നാലാം ക്ലാസുമുതല്‍ 2016 വരെയായി യുവാവ് ലൈംഗികമായി പീഡിപ്പിച്ചുവെന്നാണ് കേസ്. വെള്ളരിക്കുണ്ട് പോലീസാണ് കേസ് അന്വേഷിച്ച് കുറ്റപത്രം സമര്‍പ്പിച്ചത്. കേസില്‍ പ്രോസിക്യൂഷനു വേണ്ടി പോക്സോ സ്പെഷ്യല്‍ പബ്ലിക് പ്രോസിക്യൂട്ടര്‍ പ്രകാശ് അമ്മണ്ണായ ഹാജരായി.