'അമ്മ തിളപ്പിച്ചു നൽകി, മകൾ ഒഴിച്ചു'; വയോധികയുടെ ദേഹത്ത് തിളച്ച വെള്ളമൊഴിച്ച കേസിൽ 18-കാരി പൊലീസ് പിടിയിൽ

കൊല്ലം: (KasargodVartha) സ്വത്തുതർക്കത്തെ തുടർന്ന് സ്വന്തം അമ്മൂമ്മയുടെ മുഖത്തേക്ക് തിളച്ച വെള്ളം ഒഴിച്ച കേസിൽ 18-കാരിയായ ചെറുമകൾ പൊലീസിൻ്റെ പിടിയിലായി. അമൃത (18) ആണ് ചടയമംഗലം പൊലീസിൻ്റെ പിടിയിലായത്. കേസിൽ അമൃതയാണ് ഒന്നാം പ്രതി.

മാതാവ് അശ്വതി (37) നിർബന്ധിച്ചതിനാലാണ് താൻ തിളച്ച വെള്ളം ഒഴിച്ചതെന്ന് അമൃത പൊലീസിന് മൊഴി നൽകി. സംഭവത്തിന് ശേഷം ഒളിവിൽ പോയ അശ്വതിക്കായി പൊലീസ് അന്വേഷണം ഊർജിതമാക്കിയിരിക്കുകയാണ്.

പൊള്ളലേറ്റത് സിറ്റൗട്ടിലിരിക്കുമ്പോൾ

2026 സെപ്റ്റംബർ 26 ശനിയാഴ്ചയാണ് ആയൂർ ഇടമുളയ്ക്കൽ സ്വദേശിയായ രാധാമണിക്ക് (61) സ്വന്തം ചെറുമകളിൽ നിന്ന് ദുരനുഭവം ഉണ്ടായത്. വീട്ടിലെ സിറ്റൗട്ടിലിരിക്കുകയായിരുന്ന രാധാമണിയുടെ മുഖത്തേക്ക് അമൃത തിളച്ച വെള്ളം ഒഴിക്കുകയായിരുന്നു. മുഖത്തും കഴുത്തിലും ഗുരുതരമായി പൊള്ളലേറ്റ ഇവർ ഇപ്പോഴും കടയ്ക്കലിലെ ആശുപത്രിയിൽ തീവ്രപരിചരണത്തിൽ ചികിത്സയിലാണ്.

തിളപ്പിച്ചു നൽകിയത് അമ്മ

അമ്മ അശ്വതിയാണ് വെള്ളം തിളപ്പിച്ച് പാത്രത്തിലാക്കി വച്ചതെന്നും, അത് രാധാമണിയുടെ ദേഹത്തേക്ക് ഒഴിക്കാൻ തന്നോട് ആവശ്യപ്പെട്ടത് അമ്മയാണെന്നുമാണ് അമൃതയുടെ മൊഴി. ഹണി ട്രാപ് ഉൾപ്പെടെ നിരവധി കേസുകളിൽ നേരത്തെ തന്നെ പ്രതിയാണ് 'അശ്വതി അച്ചു' എന്നറിയപ്പെടുന്ന അശ്വതി.

മകളെ ഉപേക്ഷിച്ച് മുങ്ങി

സംഭവത്തിനു പിന്നാലെ, അന്ന് രാത്രി തന്നെ അശ്വതി ഭർത്താവിൻ്റെ വീട്ടിൽ മകൾ അമൃതയെ കൊണ്ടുചെന്നാക്കിയ ശേഷം കടന്നുകളയുകയായിരുന്നു. അവിടെ നിന്നാണ് അമൃത ഇപ്പോൾ പൊലീസിൻ്റെ പിടിയിലായത്. അശ്വതി എവിടെയാണെന്ന് കണ്ടെത്താനുള്ള തീവ്രശ്രമത്തിലാണ് പൊലീസ്. ഇവർ തിരുവനന്തപുരത്തേക്ക് കടന്നിരിക്കാമെന്ന സംശയത്തിൽ അവിടേക്കുൾപ്പെടെ അന്വേഷണം വ്യാപിപ്പിച്ചിട്ടുണ്ട്.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: Granddaughter arrested for pouring boiling water on grandmother in Kollam.

#KollamNews #CrimeNewsKerala #ChadayamangalamPolice #AswathyAchu #DomesticViolence #MalayalamNews #RenuNews