കോന്നിയിൽ ‘രണ്ടാനച്ഛൻ വീടിന് തീയിട്ടു’; ഓട് പൊളിച്ച് അനിയത്തിയെ രക്ഷിച്ച് 15-കാരൻ, സിനിമയെ വെല്ലുന്ന രക്ഷാപ്രവർത്തനം

കോന്നി: (KasargodVartha) രണ്ടാനച്ഛൻ വീടിന് തീയിട്ട് കുടുംബത്തെ കൊലപ്പെടുത്താൻ ശ്രമിച്ചപ്പോൾ രക്ഷകനായത് 15-കാരന്റെ മനസാന്നിധ്യം. തീ ആളിപ്പടരുന്ന വീടിന്റെ ഓട് പൊളിച്ച് അനുജത്തിയെ സാഹസികമായി രക്ഷിച്ച് 15-കാരൻ നാടിന്റെ താരമായി. വടശ്ശേരിക്കര അരിക്കക്കാവ് സ്വദേശി ടി.കെ. സിജു പ്രസാദാണ് ഭാര്യയും മക്കളും ഉറങ്ങിക്കിടക്കുമ്പോൾ വീടിന് തീയിട്ടത്.

സംഭവം ഇങ്ങനെ 

വെള്ളിയാഴ്ച രാത്രി ഒരു മണിയോടെയായിരുന്നു നാടിനെ നടുക്കിയ സംഭവം. പെയിന്റിംഗ് തൊഴിലാളിയായ സിജു രാത്രി വീട്ടിൽ നിന്ന് പുറത്തിറങ്ങി കയ്യിൽ കരുതിയ ടിന്നർ ഉപയോഗിച്ച് വീടിന് തീയിടുകയായിരുന്നു. തീയും പുകയും ഉയരുന്നത് കണ്ട് ഞെട്ടിയുണർന്ന 15-കാരൻ സമയോചിതമായി പ്രവർത്തിച്ചു.

സാഹസിക രക്ഷാപ്രവർത്തനം 

വാതിലുകൾ തുറക്കാൻ കഴിയാതിരുന്നതോടെ, കുട്ടി വീടിന്റെ ഓട് പൊളിച്ചുമാറ്റി. തുടർന്ന് കഴുക്കോലിൽ തൂങ്ങിനിന്ന് അനിയത്തിയെ എടുത്തുയർത്തി പുറത്തെത്തിച്ചു. സമാനരീതിയിൽ അമ്മയെയും രക്ഷിക്കാൻ ശ്രമിച്ചെങ്കിലും സാധിച്ചില്ല. ഇതിനിടെ കരച്ചിൽ കേട്ട് ഓടിക്കൂടിയ നാട്ടുകാർ വാതിൽ തകർത്താണ് അമ്മയെ പുറത്തെത്തിച്ചത്.

പ്രതി പിടിയിൽ 

തീയിടുന്നതിനിടെ ടിന്നർ ദേഹത്ത് വീണ് പ്രതി സിജുവിനും പൊള്ളലേറ്റു. ഇയാളെ കോന്നി പൊലീസ് അറസ്റ്റ് ചെയ്തു. പൊള്ളലേറ്റ 15-കാരനും അമ്മയും കോന്നി താലൂക്ക് ആശുപത്രിയിൽ ചികിത്സയിലാണ്. അത്ഭുതകരമായി രക്ഷപ്പെട്ട പെൺകുട്ടിക്ക് പരിക്കുകളില്ല.

ഈ വാർത്ത വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A 15-year-old boy showed remarkable bravery by removing roof tiles to save his younger sister after his stepfather set their house on fire in Konni. The accused has been arrested.

#Konni #FireAccident #HeroBoy #KeralaPolice #CrimeNews #Pathanamthitta #Bravery