12 നിലകളുള്ള ഉപ്പള സി പാലസ് ഫ്ലാറ്റിലെ 90-ഓളം കുടുംബങ്ങൾ ആശങ്കയിൽ; ബിൽഡർമാർ വരുത്തിയത് 17 കോടി രൂപ കുടിശിക; ജപ്തി നോട്ടീസ്

• കുഞ്ഞിക്കണ്ണൻ മുട്ടത്ത്

ഉപ്പള: (KasargodVartha) 12 നിലകളുള്ള ഉപ്പളയിലെ സി പാലസ് ഫ്ലാറ്റ് സമുച്ചയവുമായി ബന്ധപ്പെട്ട സാമ്പത്തിക പ്രതിസന്ധി ഇവിടെ താമസിക്കുന്ന കുടുംബങ്ങളെ അനിശ്ചിതത്വത്തിലാക്കി. ഫ്ലാറ്റ് നിർമാണവുമായി ബന്ധപ്പെട്ട വായ്പയിൽ 17 കോടി രൂപ കുടിശികയായതിനെ തുടർന്ന് കേരള ഫിനാൻഷ്യൽ കോർപ്പറേഷൻ അഥവാ കെഎഫ്‌സി ജപ്തി നടപടികളിലേക്ക് കടന്നതോടെയാണ് താമസക്കാരായ 90-ഓളം കുടുംബങ്ങൾ ഒഴിപ്പിക്കൽ ഭീഷണിയിലായത്.

ജപ്തി നോട്ടീസും കുടിശികയും

സിറ്റി ഗേറ്റ് ബിൽഡേഴ്സ് ആൻഡ് ഡെവലപ്പേഴ്സ് നിർമിച്ച സി പാലസ് ഫ്ലാറ്റിനെതിരെ 2026 ജനുവരി 28-ന് കെഎഫ്‌സി സർഫാസി നിയമപ്രകാരം കൈവശപ്പെടുത്തൽ നോട്ടീസ് പുറപ്പെടുവിച്ചിരുന്നു.

2025 സെപ്റ്റംബർ 24-ന് നൽകിയ ഡിമാൻഡ് നോട്ടീസിൽ 60 ദിവസത്തിനകം കുടിശിക അടയ്ക്കണമെന്ന് ആവശ്യപ്പെട്ടിരുന്നെങ്കിലും വായ്പ തിരിച്ചടവിൽ വീഴ്ചവന്നതിനെ തുടർന്ന് നടപടികൾ സ്വീകരിച്ചതാണെന്ന് ബാങ്ക് അധികൃതർ അറിയിച്ചു.

2026 ജനുവരി ഒന്നിനുള്ള കണക്ക് പ്രകാരം വായ്പ കുടിശിക 17,04,11,483 രൂപയായി ഉയർന്നിട്ടുണ്ട്.

ഭാവിയിലെ പലിശയും മറ്റു ചെലവുകളും ഇതിൽ ഉൾപ്പെടില്ലെന്നും നോട്ടീസിൽ വ്യക്തമാക്കുന്നു. പദ്ധതിയുടെ മാനേജിങ് പങ്കാളിയായ പി.എസ്. ഇബ്രാഹിം ഹാജിയുൾപ്പെടെ നിരവധി സഹബാധ്യതക്കാർക്കെതിരെ ധനകാര്യ സ്ഥാപനം നടപടി സ്വീകരിച്ചിട്ടുണ്ട്. മൂന്ന് വർഷത്തിലേറെയായി ബാങ്ക് അധികൃതർ നിരന്തരം നോട്ടീസുകൾ നൽകിയിട്ടും തൃപ്തികരമായ മറുപടി ലഭിച്ചിട്ടില്ലെന്നാണ് അധികൃതരുടെ ആരോപണം.

തെരുവിലിറങ്ങേണ്ട ഭീതിയിൽ കുടുംബങ്ങൾ

അതേസമയം, ഫ്ലാറ്റ് വാങ്ങിയവരിൽ 80 ശതമാനം പേരും മുഴുവൻ തുകയും അടച്ചുകഴിഞ്ഞതായാണ് താമസക്കാർ പറയുന്നത്.

സ്വന്തം ജീവിതസമ്പാദ്യം ചെലവഴിച്ച് ഫ്ലാറ്റുകൾ സ്വന്തമാക്കിയവരാണ് ഇപ്പോൾ തെരുവിലിറങ്ങേണ്ട ഭീതിയിൽ കഴിയുന്നത്.

'ഞങ്ങൾ പണം മുഴുവൻ നൽകി. ഇനി എങ്ങോട്ട് പോകണമെന്ന് അറിയില്ല. ഞങ്ങളെ സംരക്ഷിക്കാൻ സർക്കാർ ഇടപെടണം,' ഫ്ലാറ്റുടമകൾ പ്രതികരിച്ചു.

ഫ്ലാറ്റ് സമുച്ചയത്തിലെ നിരവധി കുടുംബങ്ങൾ ഇതിനോടകം പ്രതിഷേധത്തിനൊരുങ്ങിയിട്ടുണ്ട്. വരുന്ന ദിവസങ്ങളിൽ സമരപരിപാടികളുമായി മുന്നോട്ടുപോകുമെന്ന് ഫ്ലാറ്റുടമകളുടെ കൂട്ടായ്മ മുന്നറിയിപ്പ് നൽകി.

കുടിൽ കെട്ടി സമരം; പ്രശ്നപരിഹാരത്തിന് നീക്കം

ബാങ്ക് അധികൃതരുമായി ചർച്ച നടത്തി പ്രശ്നത്തിന് അടിയന്തര പരിഹാരം കാണണമെന്ന ആവശ്യവും ഉയരുന്നുണ്ട്. കെഎഫ്‌സി പുറപ്പെടുവിച്ച നോട്ടീസിൽ ഉപ്പള ഗ്രാമത്തിലെ വിവിധ സർവേ നമ്പറുകളിലായി ഉൾപ്പെടുന്ന ഭൂമിയും കെട്ടിടങ്ങളും ബാങ്ക് കൈവശപ്പെടുത്തിയതായി വ്യക്തമാക്കുന്നുണ്ട്.

ചില ഫ്ലാറ്റുകൾക്ക് മുമ്പ് എൻഒസി നൽകിയതിനാൽ അവ ഒഴിവാക്കിയിട്ടുണ്ടെന്നും രേഖകളിൽ പറയുന്നു.

ഫ്ലാറ്റ് ഉടമകൾ ബിൽഡർമാരുടെ വീടിന് മുന്നിൽ കുടിൽ കെട്ടി സമരം സംഘടിപ്പിക്കുമെന്ന് ഫ്ലാറ്റ് ഉടമയായ ബദറുദ്ദീൻ കാസർകോട് വാർത്തയോട് പറഞ്ഞു. ഇക്കാര്യം അറിയിച്ചതിനെ തുടർന്ന് ബിൽഡർമാർ മധ്യസ്ഥന്മാർ മുഖാന്തരം ഞായറാഴ്ച വിഷയം ചർച്ച ചെയ്യാൻ ഫ്ലാറ്റ് സമുച്ചയത്തിൽ എത്തിച്ചേരുമെന്ന് അറിയിച്ചിട്ടുണ്ടെന്നും ഫ്ലാറ്റ് ഉടമകളുടെ കൂട്ടായ്മയുടെ പ്രസിഡൻ്റ് കൂടിയായ ബദറുദ്ദീൻ പറഞ്ഞു. പകുതി തുക അടച്ച് ജപ്തിനടപടി നീട്ടിവെക്കാനും ബാക്കി സമയം ചോദിക്കാനുമാണ് ബിൽഡർമാർ നീക്കം നടത്തുന്നത്. 40 ലക്ഷത്തിനും 45 ലക്ഷത്തിനും അതിന് മുകളിലും വില നൽകി ഫ്ലാറ്റ് സ്വന്തമാക്കിയവരാണ് ആശങ്കയിൽ കഴിയുന്നത്.

ജപ്തി നടന്നാൽ തങ്ങൾ എങ്ങോട്ട് പോകുമെന്നും ഉള്ളതെല്ലാം വിറ്റുപെറുക്കിയാണ് ഫ്ലാറ്റ് വാങ്ങിയതെന്നും മറ്റൊരു താമസക്കാരനും പ്രവാസിയുമായ മെഹബൂബും കാസർകോട് വാർത്തയോട് പറഞ്ഞു. ഫ്ലാറ്റ് സ്വന്തമാക്കിയവരിൽ ഭൂരിഭാഗവും സ്ത്രീകളാണെന്നും താമസക്കാർ പറഞ്ഞു.

ഉപ്പളയിലെ ഈ കുടുംബങ്ങൾ നേരിടുന്ന പ്രതിസന്ധിയെക്കുറിച്ചുള്ള വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലേക്കും ഷെയർ ചെയ്യുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക.

അഭിപ്രായം ഞങ്ങളുടെ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്താനും മറക്കരുത്.

Article Summary: Over 90 families in Uppala C Palace flats are facing an eviction threat after the builders defaulted on a ₹17 crore loan, prompting KFC to issue an attachment notice.

#UppalaNews #KasaragodNews #FlatEviction #KFCNotice #KeralaNews #RealEstateFraud