വിലയിൽ റെക്കോർഡ് കുതിപ്പ്: തേങ്ങയും ചിരട്ടയും കർഷകർക്ക് നേട്ടമാകുന്നു

കാസർകോട്: (KasargodVartha) പച്ചത്തേങ്ങയുടെ വില കുതിച്ചുയരുമ്പോൾ, ചിരട്ടയ്ക്കും മികച്ച വില ലഭിക്കുന്നത് നാളികേര കർഷകർക്ക് വലിയ ആശ്വാസമാകുന്നു. എന്നാൽ ഈ വിപണിയിൽ ആധിപത്യം ഉറപ്പിക്കുന്നത് തമിഴ്‌നാട് ലോബിയാണ്.

ജില്ലയിൽ തേങ്ങ, ചിരട്ട, കൊപ്ര എന്നിവയ്ക്ക് ഉയർന്ന വില നൽകിയാണ് തമിഴ്‌നാട്ടിൽ നിന്നുള്ള മൊത്തക്കച്ചവടക്കാർ ഇവയെല്ലാം വാങ്ങിക്കൂട്ടുന്നത്. ഇത് ജില്ലയിലെ ചെറുകിട തേങ്ങാ വ്യാപാരികൾക്ക് തിരിച്ചടിയുണ്ടാക്കുന്നുണ്ട്. തമിഴ്‌നാട്ടിൽ നിന്നുള്ള മൊത്തക്കച്ചവടക്കാർ വാഹനങ്ങളുമായി വീടുകൾ കയറിയിറങ്ങിയാണ് തേങ്ങയും ചിരട്ടയും ശേഖരിക്കുന്നത്. 

കടകളിൽ ലഭിക്കുന്നതിനേക്കാൾ ഉയർന്ന വില നൽകാനും ഇവർ തയ്യാറാണ്. വെളിച്ചെണ്ണയുടെ വില കുത്തനെ ഉയർന്നതാണ് ഈ മേഖലയിൽ തമിഴ്നാട് ലോബി പിടിമുറുക്കാൻ പ്രധാന കാരണം. വെളിച്ചെണ്ണ ഉത്പാദനം കൂടുതലും നടക്കുന്നത് തമിഴ്‌നാട്ടിലാണ്.

നിലവിൽ പച്ചത്തേങ്ങയ്ക്ക് പൊതുവിപണിയിൽ 66 രൂപ വരെ വിലയുണ്ട്. കഴിഞ്ഞ മാസം ഇത് 80 രൂപ വരെ എത്തിയിരുന്നു. ചിരട്ടയ്ക്ക് കിലോയ്ക്ക് 20 മുതൽ 25 രൂപ വരെ ലഭിക്കുന്നുണ്ട്. ഒരു ചിരട്ടയ്ക്ക് ഒരു രൂപ എന്ന കണക്കിലും വീടുകളിൽ നിന്ന് വാങ്ങുന്നു. 

ഓണം അടുക്കുന്നതോടെ വില ഇനിയും ഉയരുമെന്നും 100 രൂപ കടക്കുമെന്നും കർഷകർ പ്രതീക്ഷിക്കുന്നു. അതേസമയം, വെളിച്ചെണ്ണയുടെ വില 400 രൂപ കടന്നതോടെ വീട്ടാവശ്യങ്ങൾക്ക് പാമോയിൽ ഉപയോഗിക്കാൻ തുടങ്ങിയത് തേങ്ങയുടെയും കൊപ്രയുടെയും വിലയിൽ നേരിയ ഇടിവിന് കാരണമായെന്ന് കർഷകർ പറയുന്നു.

കഴിഞ്ഞ 10 വർഷത്തിനിടയിലെ ഏറ്റവും ഉയർന്ന വിലയാണ് ഈ വർഷം പച്ചത്തേങ്ങയ്ക്ക് ലഭിച്ചത്. അതിനാൽ തന്നെ കർഷകർ തെങ്ങുകളെ മികച്ച രീതിയിൽ പരിപാലിക്കുകയും തെങ്ങിന് വളമിടാനും മുരട് എടുക്കാനും കൂടുതൽ ശ്രദ്ധിക്കുകയും ചെയ്യുന്നുണ്ട്.

തേങ്ങയ്ക്കും ചിരട്ടയ്ക്കും വില കൂടിയതിനെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Coconut and shells fetch record prices in Kasaragod.

#CoconutPrice #Kasaragod #KeralaAgriculture #CoconutShells #TamilNaduLobby #PriceHike