'പ്രിയദർശിനി' തിരിച്ചടിയായി; ഒരു മാസത്തിനിടെ സ്വകാര്യ ബസ് മേഖലയ്ക്ക് 65 കോടി രൂപയുടെ നഷ്ടമെന്ന് ഉടമകൾ; പ്രശ്നപരിഹാരത്തിനായി സർക്കാർ വിദഗ്ധ സമിതിയെ നിയോഗിച്ചു

പാലക്കാട്: (KasargodVartha) സംസ്ഥാന സർക്കാരിന്റെ സ്വപ്ന പദ്ധതിയായ പ്രിയദർശിനി കാരണം സ്വകാര്യ ബസ് മേഖല വൻ പ്രതിസന്ധിയിലേക്ക്. പദ്ധതി നടപ്പാക്കിയതോടെ സ്വകാര്യ ബസ് മേഖലയ്ക്ക് ഒരു മാസത്തിനിടെ 65 കോടി രൂപയുടെ വരുമാന നഷ്ടമുണ്ടായെന്ന് ബസുടമകൾ അറിയിച്ചു. നിലവിൽ 500-ലധികം ബസുകൾ ഇതിനകം ഓട്ടം നിർത്തിക്കഴിഞ്ഞു. ഓടുന്ന ബസുകളിൽ പലതും മുഴുവൻ ട്രിപ്പുകളും നടത്തുന്നില്ലെന്നും ദിനംപ്രതിയുണ്ടാകുന്ന കണക്കുകൾ നെഗറ്റീവ് ബാലൻസിലാണെന്നും ഉടമകൾ പറയുന്നു.

പ്രതിസന്ധി രൂക്ഷം

നേരത്തെ ദിനംപ്രതി 16000 രൂപ വരുമാനം ലഭിച്ചിരുന്ന ബസുകൾക്ക് ഇപ്പോൾ 10,000 രൂപയിൽ താഴെ മാത്രമാണ് ലഭിക്കുന്നത്. കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിച്ചതോടെ, സ്വകാര്യ ബസുകൾ മുന്നിലൂടെ കടന്നുപോയാലും ഭൂരിഭാഗം സ്ത്രീകളും കെഎസ്ആർടിസിക്കായി സ്റ്റോപ്പിൽ കാത്തുനിൽക്കുന്ന സ്ഥിതിയാണെന്ന് ഉടമകൾ ചൂണ്ടിക്കാട്ടുന്നു. കൊല്ലം, വയനാട്, കോട്ടയം ജില്ലകളിലാണ് ഏറ്റവും വലിയ പ്രതിസന്ധി. തൊഴിലാളികൾക്കുള്ള കൂലി കണ്ടെത്താനാകാതെ പല ബസുടമകളും കണ്ടക്ടറുടെയും ഡ്രൈവറുടെയുമൊക്കെ കുപ്പായം അണിഞ്ഞ് നേരിട്ട് പണി ചെയ്യേണ്ട അവസ്ഥയിലാണെന്ന് അവർ പറയുന്നു.

ബസുടമകളുടെ പ്രധാന ആവശ്യങ്ങൾ

ഗതാഗത മന്ത്രി സി പി ജോൺ ബസുടമകളുമായി ചർച്ച നടത്തിയിരുന്നു. സ്വകാര്യ ബസുകളിലും സ്ത്രീകൾക്ക് സൗജന്യ യാത്ര അനുവദിക്കണമെന്നും അതിനുള്ള ടിക്കറ്റ് തുക സർക്കാർ നൽകണമെന്നുമാണ് ഉടമകളുടെ പ്രധാന ആവശ്യം. ഡീസൽ സബ്സിഡി അനുവദിക്കുക, വിദ്യാർഥികളുടെ കൺസെഷൻ നിരക്ക് വർധിപ്പിക്കുക തുടങ്ങിയ ആവശ്യങ്ങളും ചർച്ചയിൽ ഉന്നയിച്ചിട്ടുണ്ട്. തീരുമാനമായില്ലെങ്കിൽ സൂചനാ പണിമുടക്കിലേക്ക് നീങ്ങാനാണ് ബസുടമകളുടെ തീരുമാനം.

വിദഗ്ധ സമിതിയെ നിയോഗിച്ചു

പ്രതിസന്ധിയെക്കുറിച്ച് പഠിക്കാൻ സർക്കാർ അഞ്ചംഗ വിദഗ്ധ സമിതിയെ നിയോഗിച്ചു. മുൻ ഗതാഗത കമ്മിഷണർ കെ പദ്മകുമാർ അധ്യക്ഷനായ സമിതിയിൽ ബി ജി ശ്രീദേവി (നാറ്റ്പാക്ക്), കെ എസ് വിജയശ്രീ (ട്രാൻസ്‌പോർട്ട് അഡീഷണൽ സെക്രട്ടറി), കെ മനോജ് കുമാർ (ജോയിന്റ് ട്രാൻസ്‌പോർട്ട് കമ്മിഷണർ), ഡോ. സജ്ജയ് (നാറ്റ്പാക്ക് ശാസ്ത്രജ്ഞൻ) എന്നിവരാണ് അംഗങ്ങൾ. ആറാഴ്ചയ്ക്കുള്ളിൽ സമിതി സർക്കാരിന് റിപ്പോർട്ട് സമർപ്പിക്കും.

കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: The implementation of the 'Priyadarshini' project in Kerala has led to a ₹65 crore loss for the private bus sector in a single month, resulting in over 500 buses halting services. Private bus owners, facing severe financial crises, have demanded free travel for women in private buses with government reimbursement, diesel subsidies, and increased student concession rates. The government has formed a five-member committee headed by K. Padmakumar to study the crisis and report within six weeks.

#PrivateBusCrisis #KeralaTransport #PriyadarshiniProject #BusOwners #KeralaNews #PublicTransport #KSRTC #RenuNews