കാസർകോട് കളക്ടറേറ്റിൽ ഓണം ഖാദി മേളയ്ക്ക് തുടക്കമായി; ഉദ്ഘാടനം നിർവഹിച്ച് ജില്ലാ കളക്ടർ അർജുൻ പാണ്ഡ്യൻ

കാസർകോട്: (KasargodVartha) കേരള ഖാദി ഗ്രാമ വ്യവസായ ബോർഡ് ജില്ലാ ഖാദി ഗ്രാമ വ്യവസായ ഓഫീസിൻ്റെ നേതൃത്വത്തിൽ കാസർകോട് കളക്ടറേറ്റിൽ സംഘടിപ്പിക്കുന്ന ഓണം ഖാദി മേളയ്ക്ക് തുടക്കമായി. മേളയുടെ ഔദ്യോഗിക ഉദ്ഘാടനം ജില്ലാ കളക്ടർ അർജുൻ പാണ്ഡ്യൻ നിർവഹിച്ചു. മേളയിലെ ആദ്യവിൽപ്പന ജില്ലാ ഇൻഫർമേഷൻ ഓഫീസർ എം മധുസൂദനൻ ഏറ്റുവാങ്ങി.

പയ്യന്നൂർ ഖാദി കേന്ദ്രം ഡയറക്ടർ കെ വി രാജേഷ് ചടങ്ങിൽ അധ്യക്ഷത വഹിച്ചു. കാസർകോട് പ്രൊജക്ട് ഓഫീസർ ഷോളി ദേവസ്യ സ്വാഗതവും ടി വി വിനോദ് കുമാർ നന്ദിയും പറഞ്ഞു. സുരേഷ് പെരിയങ്ങാനം, പി വി ബീന തുടങ്ങിയവർ ചടങ്ങിൽ പങ്കെടുത്തു. ഓഗസ്റ്റ് 4 ചൊവ്വാഴ്ച മുതൽ വെള്ളിയാഴ്ച (ഓഗസ്റ്റ് 7) വരെയാണ് കളക്ടറേറ്റ് കോമ്പൗണ്ടിൽ മേള സംഘടിപ്പിച്ചിരിക്കുന്നത്.

ആകർഷകമായ ഓഫറുകൾ

സംസ്ഥാന സർക്കാർ ഓണം പ്രമാണിച്ച് ഓഗസ്റ്റ് 25 വരെ ഖാദി ഉൽപ്പന്നങ്ങൾക്ക് 30 ശതമാനം റിബേറ്റ് അനുവദിച്ചിട്ടുണ്ട്. തൊഴിലാളികൾ തങ്ങളുടെ കരവിരുതിൽ നെയ്തെടുത്ത നവീന ഫാഷനിലും ട്രെൻഡിലുമുള്ള ആകർഷകമായ കളക്ഷനുകൾ ഒരുക്കിക്കൊണ്ടാണ് ഇത്തവണ ഓണം ഖാദി മേള സജ്ജമാക്കിയിട്ടുള്ളത്.

ഖാദി വസ്ത്രങ്ങൾക്ക് പുറമേ ഗ്രാമ വ്യവസായ ഉൽപ്പന്നങ്ങളുടെ വിപുലമായ ശേഖരവും മേളയോട് അനുബന്ധിച്ച് ഒരുക്കിയിട്ടുണ്ട്. പരമ്പരാഗത നെയ്ത്ത് തൊഴിലാളികളെ പ്രോത്സാഹിപ്പിക്കാനും അവർക്ക് വിപണി കണ്ടെത്താനും ഇത്തരം ഖാദി മേളകൾ വലിയ പങ്ക് വഹിക്കുന്നുണ്ട്.

സമ്മാനങ്ങളും ക്രെഡിറ്റ് സൗകര്യവും

സർക്കാർ, അർധസർക്കാർ, ബാങ്ക് ജീവനക്കാർക്ക് മേളയിൽ നിന്നും സാധനങ്ങൾ വാങ്ങാൻ 1 ലക്ഷം രൂപ വരെ ക്രെഡിറ്റ് സൗകര്യമുണ്ട്. ജില്ലകളിൽ ആഴ്ചതോറും നടത്തുന്ന നറുക്കെടുപ്പിലൂടെ 3000 രൂപയുടെ ഗിഫ്റ്റ് വൗച്ചറുകൾ ഉപഭോക്താക്കൾക്ക് നൽകുന്നുണ്ട്. ഇതിനുപുറമെ ആകർഷകമായ മറ്റ് സമ്മാനങ്ങളും ഏർപ്പെടുത്തിയിട്ടുണ്ട്. ഓരോ 1000 രൂപയുടെ പർച്ചേസിനും ഒരു സമ്മാനക്കൂപ്പൺ വീതം ഉപഭോക്താക്കൾക്ക് ലഭിക്കുന്നതാണ്.

ഓണം വിപണിയുമായി ബന്ധപ്പെട്ട ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Onam Khadi Mela inaugurated at Kasaragod Collectorate by district collector Arjun Pandyan.

#KasaragodNews #KhadiMela #OnamOffer #ArjunPandyan #KeralaKhadiBoard #LocalNews #AparnaNews