ഓണവിപണി കീഴടക്കി അന്യസംസ്ഥാന ലോബി; നാടൻ പൂക്കൾക്ക് ക്ഷാമം, വിലക്കയറ്റത്തിൽ വലഞ്ഞ് മലയാളികൾ

കാസർകോട്: (KasargodVartha) ഓണ നാളിലെ പൂവിളി ഉണർന്നതോടെ വിപണി കീഴടക്കാൻ അന്യസംസ്ഥാന ലോബി സജീവമായി. പൂവിപണിയായാലും കൈത്തറി തുണികളായാലും മറുനാടൻ കച്ചവടക്കാരുടെ ആധിപത്യമാണ് എങ്ങും കാണാൻ സാധിക്കുന്നത്. കേരളീയ ജനകീയ ഉൽപന്നങ്ങളുടെ പേരിൽ പോലും വ്യാജന്മാരായി അന്യസംസ്ഥാന ലോബി വിപണിയിൽ പിടിമുറുക്കിക്കഴിഞ്ഞിട്ടുണ്ട്. ശക്തമായ മഴ കാരണം ജില്ലയിൽ ചെമ്പരത്തി ഉൾപ്പെടെയുള്ള നാടൻ പൂക്കളുടെ ലഭ്യത വളരെ കുറഞ്ഞതും മറുനാടൻ കച്ചവടക്കാർക്ക് ഗുണകരമായി.

പൂക്കളമൊരുക്കാൻ ചെലവേറും

നാടൻ പൂക്കൾ ലഭ്യമല്ലാത്തതിനാൽ ഓണപ്പൂക്കളം ഒരുക്കാൻ ഇത്തവണ മലയാളികൾക്ക് ചെലവ് കൂടും. മലയാളികളുടെ തിരുവോണവും അയൽ സംസ്ഥാനമായ കർണാടകയിൽ വരമഹാലക്ഷ്മി പൂജയും ഒന്നിച്ചെത്തിയത് പൂവിപണിയിൽ വൻ വിലവർധനവിന് കാരണമായിട്ടുണ്ട്. ഓണപ്പൂക്കളങ്ങൾക്കും ആരാധനകൾക്കും പൂജകൾക്കും മുൻപിൽ നിൽക്കുന്നത് പൂക്കൾ കൊണ്ടുള്ള ചമയമാണ്. ഈ കാരണം കൊണ്ടാണ് പൂവിന് വിപണിയിൽ ഇത്രയധികം ഡിമാൻഡ് വർധിക്കുന്നത്.

താരമായി ചെണ്ടുമല്ലിയും ജമന്തിയും

ഓണപ്പൂവിപണിയിൽ ചെണ്ടുമല്ലിയും ജമന്തിയുമാണ് പ്രധാന താരങ്ങൾ. 500 മുതൽ 800 രൂപ വരെയാണ് ഇവയുടെ നിലവിലെ വില. കിലോയായും മീറ്റർ അളവിലുമാണ് ഇവ പ്രധാനമായും വിൽക്കുന്നത്. മറുനാടൻ വിൽപനക്കാർ എത്തിയതോടെ ജില്ലയിൽ പൂവിപണി സജീവമായിട്ടുണ്ട്. അതേസമയം തെക്കൻ ജില്ലകളിൽ കുടുംബശ്രീ ഓണത്തിനായി കേരളീയ പൂവുകൾ ഇറക്കി കച്ചവടം സജീവമാക്കിയിട്ടുണ്ട്. ഏക്കറോളം വരുന്ന സ്ഥലത്താണ് കുടുംബശ്രീ ഈ വർഷം പൂക്കൃഷി നടത്തിയത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: The Onam flower market in Kasaragod is heavily dominated by out-of-state vendors, driving flower prices up to Rs 500-800 as festive demand surges alongside Karnataka's Varamahalakshmi Pooja, amid a shortage of local flowers.

#KasargodVartha #Onam2026 #FlowerMarket #KasaragodNews #Kudumbashree #MalayalamNews #KeralaNews #OnamFlowers #FestivalMarket #AparnaNews