വ്യാപാരികൾക്ക് നിയമസഭാ സീറ്റ് നൽകുന്ന മുന്നണിക്ക് സംസ്ഥാന വ്യാപക പിന്തുണ; രാഷ്ട്രീയ നിലപാട് വ്യക്തമാക്കി ഏകോപന സമിതി

കാസർകോട്: (KasargodVartha) കേരള വ്യാപാരി വ്യവസായി ഏകോപന സമിതിയുടെ (KVVES) 'റീറ്റെയ്ൽ കോൺക്ലേവ് 2.0' ജനുവരി 20, 21 തീയതികളിൽ ഗേറ്റ്‌വേ ബേക്കലിൽ നടക്കുമെന്ന് സംസ്ഥാന പ്രസിഡണ്ട് രാജു അപ്സര വാർത്താ സമ്മേളനത്തിൽ അറിയിച്ചു. വരാനിരിക്കുന്ന നിയമസഭാ തിരഞ്ഞെടുപ്പിൽ വ്യാപാരികളുടെ പ്രതിനിധിയെ പിന്തുണക്കുന്ന മുന്നണിക്ക് സംസ്ഥാന വ്യാപകമായി സംഘടനയുടെ പിന്തുണ നൽകുമെന്നും അദ്ദേഹം വ്യക്തമാക്കി.

കേരളത്തിലെ എല്ലാ ജില്ലകളിൽ നിന്നുമുള്ള 600-ഓളം പ്രതിനിധികൾ പങ്കെടുക്കുന്ന രണ്ടുദിവസത്തെ പഠന ക്യാമ്പാണിത്. പരമ്പരാഗത വ്യാപാരമേഖല നേരിടുന്ന ആനുകാലിക വെല്ലുവിളികളെ ഫലപ്രദമായി നേരിടുന്നതിനുള്ള നയങ്ങൾ രൂപപ്പെടുത്തുക എന്നതാണ് ക്യാമ്പിന്റെ ആത്യന്തിക ലക്ഷ്യം.

നിർണ്ണായക രാഷ്ട്രീയ നീക്കം

വ്യാപാര സൗഹൃദ നയങ്ങൾ ഉറപ്പാക്കാൻ കേന്ദ്ര–സംസ്ഥാന സർക്കാരുകളിൽ സമ്മർദ്ദം ചെലുത്തുന്ന ശക്തിയായി സംഘടന മാറണമെന്ന ആവശ്യം ശക്തമാണ്. അതിനാൽ, നിയമസഭയിൽ വ്യാപാരികളുടെ സംഘടിത ശബ്ദം ഉയരേണ്ടതുണ്ട്. 

ഈ സാഹചര്യത്തിൽ ഒരു നിയമസഭാ സീറ്റിൽ നിന്ന് സംസ്ഥാന ഭാരവാഹികളിൽ ഒരാൾ പൊതു സ്വതന്ത്രനായി, സ്വതന്ത്ര ചിഹ്നത്തിൽ മത്സരിക്കണമെന്നാണ് സംഘടനയുടെ ആഗ്രഹം. ഈ സ്ഥാനാർത്ഥിയെ പിന്തുണക്കുന്ന രാഷ്ട്രീയ പാർട്ടിയെ/മുന്നണിയെ സംസ്ഥാനമൊട്ടാകെ കേരള വ്യാപാരി വ്യവസായി ഏകോപന സമിതി തിരിച്ചും പിന്തുണക്കും. 

നാളിതുവരെ കെ.വി.വി.ഇ.എസ് ഒരു രാഷ്ട്രീയ പാർട്ടിയുടെയും ഭാഗമായിട്ടില്ലെന്നും, ഇനിയങ്ങോട്ട് അങ്ങനെ ആയിരിക്കുകയുമില്ലെന്നും നേതൃത്വം വ്യക്തമാക്കി. ഇത് അധികാരത്തിന് വേണ്ടിയല്ല, മറിച്ച് നിലനിൽപ്പിനായുള്ള പോരാട്ടമാണെന്നും നേതാക്കൾ പറഞ്ഞു.

ഓൺലൈൻ കുത്തകകൾക്കെതിരെ

ആമസോൺ, ഫ്ലിപ്കാർട്ട് തുടങ്ങിയ ഓൺലൈൻ ബഹുരാഷ്ട്ര കുത്തകകളെ നിയന്ത്രിക്കാൻ കേന്ദ്ര സർക്കാർ തയ്യാറാകണമെന്നും, സമഗ്രമായ ഇ-കൊമേഴ്‌സ് നയം രൂപീകരിക്കണമെന്നും സംഘടന ആവശ്യപ്പെട്ടു. 

ഓൺലൈൻ വ്യാപാരത്തിന് 40 ശതമാനം ജിഎസ്ടി ചുമത്തുകയും, ചെറുകിട വ്യാപാരികൾക്ക് ജിഎസ്ടി ഇളവുകൾ അനുവദിക്കുകയും വേണം. ഇ-കൊമേഴ്‌സിൽ നിന്ന് ക്വിക്ക് കൊമേഴ്‌സിലേക്കുള്ള വളർച്ച ഗ്രാമപ്രദേശങ്ങളിലെ വ്യാപാരികളെപ്പോലും ബാധിച്ചിരിക്കുകയാണ്.

സംസ്ഥാന സർക്കാരിനോടുള്ള ആവശ്യങ്ങൾ

● നികുതി വകുപ്പിന്റെ അനാവശ്യ പരിശോധനകൾ ഒഴിവാക്കുക.

● പഞ്ചായത്ത്–മുനിസിപ്പാലിറ്റി ചട്ടങ്ങൾ ലളിതമാക്കുക, ലൈസൻസ് പുതുക്കൽ എളുപ്പമാക്കുക.

● നികുതി അടച്ച് വ്യാപാരം നടത്തുന്നവർക്ക് ഭീഷണിയായ അനിയന്ത്രിതമായ വഴിയോര കച്ചവടം നിയന്ത്രിക്കുക.

● ചെറുകിട വ്യാപാരികൾക്കായി സമഗ്രമായ പെൻഷൻ പദ്ധതി നടപ്പാക്കുക.

● മാലിന്യം ഉൽപ്പാദിപ്പിക്കാത്ത വ്യാപാര സ്ഥാപനങ്ങളെ ഹരിത കർമ്മ സേനയുടെ നിർബന്ധിത പിരിവിൽ നിന്ന് ഒഴിവാക്കുക.

കേന്ദ്ര–സംസ്ഥാന സർക്കാരുകളുടെ വ്യാപാരവിരുദ്ധ നയങ്ങൾക്കെതിരെയുള്ള പോരാട്ടത്തിന്റെ രൂപരേഖ ബേക്കൽ കോൺക്ലേവിൽ തയ്യാറാക്കും. 

വാർത്താ സമ്മേളനത്തിൽ സംസ്ഥാന പ്രസിഡന്റ് രാജു അപ്സര, ജനറൽ സെക്രട്ടറി ദേവസ്യ മേച്ചേരി, സംസ്ഥാന ട്രഷറർ എസ്. ദേവരാജൻ, സംസ്ഥാന വൈസ് പ്രസിഡന്റുമാരായ കെ. അഹമ്മദ് ഷെരീഫ്, ബാബു കോട്ടയിൽ, ജില്ലാ ട്രഷറർ മാഹിൻ കോളിക്കര, ജില്ലാ വൈസ് പ്രസിഡണ്ട് എ.എ അസീസ് എന്നിവർ പങ്കെടുത്തു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക

Article Summary: KVVES President Raju Apsara announced that the organization will support any political front offering an Assembly seat to a merchant representative. 'Retail Conclave 2.0' will be held in Bekal on Jan 20-21.

#KVVES #KeralaPolitics #Kasaragod #RetailConclave #RajuApsara #Merchants #EcommercePolicy