സാമ്പത്തിക നഷ്ടം സഹിച്ച് കെഎസ്ആർടിസി സർവീസ് നടത്തണമെന്ന ആവശ്യം ന്യായീകരിക്കാനാവില്ലെന്ന് മനുഷ്യാവകാശ കമ്മീഷൻ

കാസർകോട്: (KasargodVartha) കെഎസ്ആർടിസി എല്ലാ റൂട്ടുകളിലും സാമ്പത്തിക നഷ്ടം സഹിച്ച് സർവീസ് നടത്തണമെന്ന നിർബന്ധിത തീരുമാനം ശരിയല്ലെന്നും ബാധ്യത അടിച്ചേൽപ്പിക്കുന്നത് ന്യായീകരിക്കാനാവില്ലെന്നും മനുഷ്യാവകാശ കമ്മീഷൻ ജുഡീഷ്യൽ അംഗം കെ ബൈജുനാഥ്.

പ്രായോഗികമല്ലെന്ന് കെഎസ്ആർടിസി

ബേഡഡുക്ക അടുക്കത്ത് ഭഗവതി ക്ഷേത്രത്തിൽ നിന്ന് പറശിനിക്കടവ് മുത്തപ്പൻ ക്ഷേത്രത്തിലേക്കും മധൂർ സിദ്ധിവിനായക ക്ഷേത്രത്തിലേക്കും കെഎസ്ആർടിസി ബസ് സർവീസ് വേണമെന്ന ആവശ്യം പ്രായോഗികമല്ലെന്ന് കെഎസ്ആർടിസി മനുഷ്യാവകാശ കമ്മീഷനെ അറിയിച്ച പശ്ചാത്തലത്തിലാണ് ഉത്തരവ്. എടപ്പന്നി ബാലകൃഷ്ണൻ നായർ സമർപ്പിച്ച പരാതിയിലാണ് നടപടി.

അപാകതയില്ലെന്ന് കമ്മീഷൻ

കെഎസ്ആർടിസി സ്വീകരിച്ച നിലപാടിലോ നടപടികളിലോ നിയമപരമോ ഭരണപരമോ ആയ അപാകതയില്ലെന്ന് ജുഡീഷ്യൽ അംഗം കെ ബൈജുനാഥ് ഉത്തരവിൽ പറഞ്ഞു. സർക്കാർ ഗതാഗത സംവിധാനത്തിൻ്റെ സാമൂഹിക ഉത്തരവാദിത്തവും സ്വകാര്യ ഗതാഗത മേഖലയിലെ പ്രവർത്തനക്ഷമതയും ഒരുപോലെ സംരക്ഷിക്കുന്ന തരത്തിലുള്ള സമതുലിത സമീപനമാണ് പൊതുഗതാഗത മേഖലയിലെ ദീർഘകാല താൽപര്യങ്ങൾക്ക് അനുകൂലമെന്ന് കമ്മീഷൻ ഉത്തരവിൽ വ്യക്തമാക്കി.

സ്വകാര്യ ബസുകൾ ലഭ്യമാണ്

പരാതിയിൽ പരാമർശിച്ചിരിക്കുന്ന റൂട്ടുകളിൽ സ്വകാര്യ ബസ് സർവീസുകൾ ലഭ്യമാണെന്നും ജനങ്ങൾ യാത്രാക്ലേശം അനുഭവിക്കുന്നില്ലെന്നും ഉത്തരവിൽ പറയുന്നു. പ്രസ്തുത റൂട്ടുകൾ ദേശസാൽകൃതമല്ലെന്നും കമ്മീഷൻ വിലയിരുത്തി.

കെഎസ്ആർടിസി സർവീസുമായി ബന്ധപ്പെട്ട ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. സമകാലിക വാർത്തകളും മറ്റ് വിവരങ്ങളും അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ താഴെ കമൻ്റായി രേഖപ്പെടുത്തുക.

Article Summary: The Human Rights Commission ruled that KSRTC cannot be forced to operate services at a financial loss on new routes, responding to a petition requesting bus services to specific temples in Kasaragod and Kannur.

#KSRTC #HumanRightsCommission #KasaragodNews #KeralaNews #PublicTransport #LocalNews #RenuNews