ഇടത് ചിന്താഗതിയുള്ള വ്യാപാരികളെ അടുപ്പിക്കാൻ തന്ത്രം മെനയും; കേരള വ്യാപാരി വ്യവസായി സമിതി ജില്ലാ സമ്മേളനം ചെറുവത്തൂരിൽ, ലക്ഷ്യം അംഗസംഖ്യ ഇരട്ടിയാക്കൽ

ചെറുവത്തൂർ: (KasargodVartha) കേരള വ്യാപാരി വ്യവസായി സമിതിയുടെ അംഗസംഖ്യ അടുത്ത മൂന്ന് വർഷത്തിനകം ഇരട്ടിയാക്കുന്നതിനുള്ള പ്രവർത്തനങ്ങൾക്ക് രൂപം നൽകുന്നു. സമാന സ്വഭാവമുള്ള മുഴുവൻ വ്യാപാരികളെയും സംഘടനയിലേക്ക് കൊണ്ടുവരുന്നതിനൊപ്പം ഇടത് ചിന്താഗതിയോട് ആഭിമുഖ്യമുള്ള വ്യാപാരികളെ കൂടുതൽ അടുപ്പിക്കുന്നതിനുള്ള തന്ത്രങ്ങളും ജില്ലാ സമ്മേളനത്തിൽ ഗൗരവമായി ചർച്ച ചെയ്യുമെന്ന് ഭാരവാഹികൾ അറിയിച്ചു. സംഘടനയ്ക്ക് വ്യക്തമായ രാഷ്ട്രീയമില്ലെന്നും എല്ലാ രാഷ്ട്രീയ പാർട്ടികളിൽപ്പെട്ടവരും അംഗങ്ങളാണെന്നും ഭാരവാഹികൾ വ്യക്തമാക്കി.

കേരള വ്യാപാരി വ്യവസായി സമിതി കാസർകോട് ജില്ലാ സമ്മേളനം 2026 സെപ്റ്റംബർ 26, 27, 28 തീയതികളിൽ ചെറുവത്തൂരിലെ തിമിരി സഹകരണ ബാങ്ക് ഓഡിറ്റോറിയത്തിലാണ് നടക്കുന്നത്. വ്യാപാരികൾക്കിടയിലെ ശക്തമായ സംഘടനയായ വ്യാപാരി വ്യവസായി ഏകോപന സമിതിയിലാണ് പാർട്ടി പ്രവർത്തകരായ പലരും പ്രവർത്തിക്കുന്നതെന്ന് ഭാരവാഹികൾ തന്നെ സമ്മതിക്കുന്നുണ്ട്. ഇതിനൊരു മാറ്റം കൊണ്ടുവരിക എന്നതാണ് സംഘടന പുതിയ ദൗത്യമായി കാണുന്നത്.

സഹായം 2 ലക്ഷം

ഒട്ടേറെ കെട്ടിടങ്ങളും ആസ്തിയുമുള്ള ഏകോപന സമിതിയിൽ നിന്ന് വിട്ടുപോരാനുള്ള വൈമനസ്യമാണ് ഇതിന് തടസമെന്നും ഭാരവാഹികൾ ചൂണ്ടിക്കാട്ടുന്നു. ഒരുപാട് ആനുകൂല്യങ്ങളും ഏകോപന സമിതി നൽകുന്നുണ്ട്. ഏകോപന സമിതിയിലെ അംഗങ്ങൾ മരണപ്പെട്ടാൽ കുടുംബത്തിന് 5 ലക്ഷം രൂപ സഹായം നൽകുമ്പോൾ, ഇത് മറികടക്കാൻ വ്യാപാരി സമിതി ഇപ്പോൾ രണ്ട് ലക്ഷം രൂപയുടെ പദ്ധതി പ്രഖ്യാപിച്ചിട്ടുണ്ട്. സംഘടനാ പ്രവർത്തനം ശക്തിപ്പെടുത്തുന്നതും വ്യാപാരികൾ നേരിടുന്ന വിവിധ പ്രശ്നങ്ങൾ ഏറ്റെടുത്ത് പ്രക്ഷോഭ പരിപാടികൾ സംഘടിപ്പിക്കുന്നതും സമ്മേളനത്തിൽ ചർച്ച ചെയ്യും.

സമ്മേളന പരിപാടികൾ

വ്യാഴാഴ്ച (സെപ്റ്റംബർ 26) കൊടിമര ജാഥയും പതാക ജാഥയും നടക്കും. അന്തരിച്ച നേതാവ് ഗോപിനാഥിൻ്റെ നാട്ടിൽനിന്നാണ് കൊടിമര ജാഥ ആരംഭിക്കുക. രാജൻ മണിയറ ലീഡറും എം മാധവൻ മാനേജരും ഹയറുന്നീസ ഉപലീഡറുമായ ജാഥ വൈകുന്നേരം മൂന്നിന് ജില്ലാ ട്രഷറർ ഉദയൻ പാലായി ഉദ്ഘാടനം ചെയ്യും. പെരിയാട്ടടുക്കത്തെ മുഹമ്മദ് കുഞ്ഞിയുടെ നാട്ടിൽനിന്നാണ് പതാക ജാഥ പുറപ്പെടുക. 

ദിവാകരൻ ആറാട്ടുകടവ് ലീഡറും കെവി സുകുമാരൻ മാനേജരും ലിജു അബൂബക്കർ ഉപലീഡറുമായ ജാഥ ജില്ലാ പ്രസിഡൻ്റ് പികെ ഗോപാലൻ ഉദ്ഘാടനം ചെയ്യും. ഇരു ജാഥകളും വൈകുന്നേരം കയ്യൂർ റോഡിൽ സംഗമിച്ച് പൊതുസമ്മേളനം നടക്കുന്ന ചെറുവത്തൂർ ബസ് സ്റ്റാൻഡ് പരിസരത്ത് എത്തിച്ചേരും. വൈകുന്നേരം ആറിന് സംഘാടക സമിതി ചെയർമാനും ഗ്രാമപഞ്ചായത്ത് പ്രസിഡൻ്റുമായ ടി നാരായണൻ പതാക ഉയർത്തും.

പ്രതിനിധി സമ്മേളനം

ജില്ലയിൽ 5,700 അംഗങ്ങളെ പ്രതിനിധീകരിച്ച് 288 പേർ വെള്ളിയാഴ്ച (സെപ്റ്റംബർ 27) രാവിലെ 10-ന് തിമിരി സഹകരണ ബാങ്ക് ഓഡിറ്റോറിയത്തിലെ ഗോപിനാഥൻ നഗറിൽ പ്രതിനിധി സമ്മേളനത്തിൽ പങ്കെടുക്കും. സംസ്ഥാന സെക്രട്ടറി ഇഎസ് ബിജു സമ്മേളനം ഉദ്ഘാടനം ചെയ്യും. സംസ്ഥാന പ്രസിഡൻ്റ് വികെസി മമ്മദ് കോയ സംഘടനാ റിപ്പോർട്ടും ജില്ലാ സെക്രട്ടറി ശോഭ ബാലൻ പ്രവർത്തന റിപ്പോർട്ടും അവതരിപ്പിക്കും. വൈകുന്നേരം പുതിയ ഭാരവാഹികളെ തിരഞ്ഞെടുക്കും.

സമാപന സമ്മേളനം

ഒരേ നിറത്തിലുള്ള സാരി ധരിച്ച 100 വനിതകളുടെ അകമ്പടിയോടെ 3,500 വ്യാപാരികളും അവരുടെ കുടുംബാംഗങ്ങളും ശനിയാഴ്ച (സെപ്റ്റംബർ 28)  വൈകുന്നേരം മൂന്ന് മണിക്ക് നടക്കുന്ന പ്രകടനത്തിൽ അണിനിരക്കും. ചെറുവത്തൂരിൽ നടക്കുന്ന പ്രകടനം ഇഎംഎസ് ഓഡിറ്റോറിയത്തിൽ സമാപിക്കും. 

തുടർന്ന് നടക്കുന്ന സമാപന സമ്മേളനം സംസ്ഥാന പ്രസിഡൻ്റ് വികെസി മമ്മദ് കോയ ഉദ്ഘാടനം ചെയ്യും. നഗരിയിൽ ബ്യൂട്ടി പാർലർ അസോസിയേഷൻ കലാകാരന്മാരുടെ നൃത്തപരിപാടിയും അരങ്ങേറും. വിവിധ മത്സരങ്ങളിലെ വിജയികൾക്കുള്ള സമ്മാനങ്ങളും ജില്ലാ സമ്മേളനത്തിൽ വിതരണം ചെയ്യും.

വാർത്താസമ്മേളനത്തിൽ സംഘാടക സമിതി ചെയർമാൻ ടി നാരായണൻ, ജില്ലാ സെക്രട്ടറി ശോഭ ബാലൻ, പ്രസിഡൻ്റ് പി കെ ഗോപാലൻ, ജില്ലാ ട്രഷറർ ഉദയൻ പാലായി, സത്യൻ പടന്നക്കാട്, എം മാധവൻ, ലിജു അബൂബക്കർ, സുജിത് ചെറുവത്തൂർ, എ ബി സി ലത്തീഫ് എന്നിവർ പങ്കെടുത്തു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.    

Article Summary: The Kerala Vyapari Vyavasayi Samithi's Kasaragod district conference, aimed at doubling its membership and attracting left-leaning merchants from rival organizations, will be held in Cheruvathur from September 26 to 28, 2026.

#KasargodVartha #VyapariVyavasayiSamithi #Cheruvathur #KasaragodNews #KeralaMerchants #LeftMerchants #KeralaNews #MalayalamNews #AparnaNews